ဇူလိုင်လ(၁၉)ရက်နေ့၌ ကျရောက်မည့် (၆၆)နှစ်မြောက် အာဇာနည်နေ့အား တာချီလိတ်မြို့တွင် ဌာနဆိုင်ရာများနှင့် ဦးတင့်ဆွေ(မဇ္ဈိမလူမှုကူညီရေးအသင်း - ဥက္ကဌ)၊ ဦးအောင်ဖြိုးရှိန် (မြို့နယ်သတင်းထောက်) နှင့် ဦးအောင်မျိုးဝင်း (ရှင်အရဟံနှင့်အနော်ရထာအဖွဲ့)တို့ ဦးဆောင်သော လူငယ်အဖွဲ့တို့ ပူးပေါင်းကာ အခမ်းအနားအား အောင်မြတ်ခန်းမ၌ ကျင်းပပြုလုပ်မှာ ဖြစ်ကြောင်း သိရသည်။
အခမ်းအနား၏ အစီအစဉ်အရ ဇူလိုင်လ(၁၉)ရက်နေ့ နံနက်(၇)နာရီမှ စတင်ကာ တစ်ဦးချင်းစီသော် လည်းကောင်း၊ မိသားစု အလိုက်သော် လည်းကောင်း၊ အသင်းအဖွဲ့ အလိုက်သော် လည်းကောင်း ပွင့်လင်း လွတ်လပ်စွာ လွမ်းသူ့ပန်းခွေများ/ပန်းခြင်းများကို အခမ်းအနားကျင်းပရာ အောင်မြတ်ခန်းမရှေ့တွင် အာဇာနည်ကြီးများအား ရည်စူးကာ ဂါရ၀ပြုနိုင်ကြောင်း သိရသည်။
"နှစ်ပေါင်း(၂၀)ကျော်ကြာ သမိုင်းတကွေ့မှာ တိမ်မြုပ်ပျောက်ကွယ်ခဲ့ရတဲ့ မြန်မာ့သမိုင်းကို ပြန်လည်ဖေါ်ထုတ်ဖို့နဲ့ နောင်လာနောင်သားများ အနေဖြင့် အာဇာနည်ခေါင်းဆောင်ကြီးတွေလို တိုင်းပြည်နဲ့လူမျိုးရဲ့အကျိုးစီးပွားအတွက် အသက်-သွေး-ချွေးတို့ကို ပေးဆပ်ကာ တာဝန်ကျေပွန်ခဲ့မှုများအား စံနမူနာပြုနိုင်စေရန် ရည်ရွယ်ပါတယ်၊ ဒါ့အပြင် အချုပ်အခြာ အာဏာပိုင်နိုင်ငံတစ်နိုင်ငံရယ်လို့ ကမ္ဘာ့အလည်မှာဝင့်ထည်စွာ ရပ်တည်နိုင်အောင် စွမ်းဆောင်ပေးခဲ့တဲ့ အာဇာနည်ခေါင်းဆောင်ကြီးများ၏ ကျေးဇူးတရားအား မိမိတို့တတ်စွမ်းသမျှ အောက်မေ့သတိရစွာဖြင့် ကျေးဇူးဆပ်တဲ့သဘောလဲဖြစ်ပါတယ်"ဟု အာဇာနည်နေ့ အခမ်းအနားဖြစ်မြောက်ရေးအဖွဲ့မှ ဦးအောင်ဖြိုးရှိန် က ရှင်းပြသည်။
အခမ်းအနားဖြစ်မြောက်ရေးအဖွဲ့မှ အာဇာနည်နေ့ အခမ်းအနားသို့ တက်ရောက် ဂါရ၀ပြုနိုင်ရန်အတွက် ပြည်သူများအား အသိပေးကြေငြာအဖြစ် ပြုလုပ်ထားသော လက်ကမ်းစာရွက်တွင် "ဇူလိုင်လ(၁၉)ရက်နေ့ နံနက်(၁၀)နာရီ (၃၇)မိနစ် အချိန်တွင် ဗိုလ်ချုပ်အောင်ဆန်းနှင့်တကွ အာဇာနည်ခေါင်းဆောင်ကြီးများအား ၀မ်းနည်းခြင်း အထိမ်းအမှတ်အဖြစ် ဆိုင်ကယ်များ၊ ကားများ(၁)မိနစ် ဟွန်းရှည်တီး၍ လည်းကောင်း၊ နိုင်ငံတော်အလံအား တိုင်ဝက်လွှင့်ထူခြင်းဖြင့် လည်းကောင်း ခေတ္တငြိမ်သက်၍ လည်းကောင်း အလေးပြုကြပါရန်"ဟု ရေးသားကြေငြာထားသည့်ကို တွေ့ရှိရသည်။
တာချီလိတ်မြို့တွင် ပြီးခဲ့သော ၂၀၁၂ခုနှစ်က အာဇာနည်နေ့ အခမ်းအနားအား အ.ထ.က(တာချီလိတ်)တွင်သာ ကျင်းပနိုင်ခဲ့သည့်အတွက် ယခုနှစ်မှာတော့ အားလုံးပူးပေါင်းကာ အောင်မြတ်ခန်းမ၌ ကျင်းပမှာဖြစ်ကြောင်းသိရသည်။
