လွှတ်တော်နားနေချိန် ကာလအတွင်း ဒေသဖွံ့ဖြိုးရေးအတွက် တာချီလိတ်မြိုနယ် မဲဆန္ဒနယ် အမှတ်(၇)မှ အမျိုးသားလွှတ်တော် ကိုယ်စားလှယ် ဦးဝီလ်ဆင်မိုးသည် စက်တင်ဘာလ ၂၉ရက်နေ့က တာချီလိတ်မြို့နယ်၊ ဖန်မင်ကျေးရွာအုပ်စုရှိ ဟွေလုံရွာနေ ရွာသူ၊ ရွာသားများအား တွေ့ဆုံပြီး ကျေးလက်ဒေသ ဖွံ့ဖြိုးရေးအတွက် လိုအပ်ချက်များအား ဖြည့်ဆည်းဆောင်ရွက်ပေးမှုများ ပြုလုပ်ခဲ့ကြောင်း သိရသည်။

အဆိုပါ ကျေးရွာအတွင်း လိုအပ်ချက်များအား ဖြည့်ဆည်းဆောင်ရွက်ပေးရာသို့ ရှမ်းပြည်နယ် အစိုးရအဖွဲ့ဝင် လားဟူတိုင်းရင်းသားရေးရာဝန်ကြီး ဦးရှာမွှေလှရှဲန် နှင့် ပြည်ခိုင်ဖြိုးပါတီမှ တာချီလိတ်ခရိုင် ပါတီကော်မတီဝင် ဦးလွန်သူ၊ ဦးစိုင်းဆွမ်ဝန်း(ခ)ဦးစိုင်းမိုင်၊ မြို့နယ်အတွင်းရေးမှူး ဦးစိုင်းရွှေထွန်း နှင့် မြို့နယ်ကော်မတီဝင်များ အပါအ၀င် စည်းရုံးရေးမှူးများ လိုက်ပါခဲ့ကြပြီး ကျေးလက်နေ ရွာသူ၊ ရွာသားများအတွက် ရေရရှိစေရန် ၁ လက်မ PVC ရေပိုက် ၉၀ ချောင်း၊ ၂ လက်မ PVC ၂၀ ချောင်း၊ ၃ လက်မ PVC ၂၀ ချောင်း နှင့် ၄ လက်မ PVC ၂၀ ချောင်း တို့အား လှူဒါန်းခဲ့ကြကြောင်း သိရှိရသည်။