ရှမ်းပြည်နယ်(အရှေ့ပိုင်း)၊ တာချီလိတ်မြို့ရှိ ရွှေတိဂုံစေတီတော်အား ထီးတော်တင်လှူခြင်း အထိမ်းအမှတ် အဖြစ် (၁၇) ကြိမ်မြောက် ဘုရားအနေကဇာတင်ခြင်းနှင့် စုပေါင်း ဆွမ်းလောင်းလှူပွဲကို ယနေ့ ၂၀၁၅ခုနှစ် နိုဝင်ဘာလ (၂၄) ရက် နံနက်အစောပိုင်းက ပြုလုပ်ပြီး သံဃာတော် နှင့် သီလရှင် စုစုပေါင်း အပါး(၄၀၀) ကျော်တို့အား တာချီလိတ်မြို့နယ်လုံးရှိ သဒ္ဓါထက်သန် စေတနာရှင် အလှူရှင်များက စည်ကား သိုက်မြိုက်စွာ ဆွမ်းဆန်စိမ်း လောင်းလှူခဲ့ကြသည်။

နံနက် အရုဏ်မိုးသောက်အချိန်တွင် နိုင်ငံတော် သြ၀ါဒါစရိယ အဘိဓဇ အဂ္ဂမဟာသဒ္ဓမ္မဇောတိက အဂ္ဂမဟာပဏ္ဍိတ Honorary Ph.D. နဂါးနှစ်ကောင်ဆရာတော် ဘုရားကြီး "ဘဒ္ဒန္တဓမ္မသီရိ" အမှူးပြု၍ ဆရာတော်ကြီးများမှ တာချီလိတ်ရွှေတိဂုံစေတီတော်အား အနေကဇာတင်ခြင်းများအဖြစ် ပူဇော်ခဲ့ကြပြီးနောက် တာချီလိတ်ရွှေတိဂုံဓမ္မာရုံတွင် နဂါးနှစ်ကောင်ဆရာတော်ဘုရားကြီး အမှူးပြုသည့် ဆရာတော်၊ သံဃာတော်များမှ ဆွမ်းဆန်စိမ်းလောင်းလှူခြင်းအတွက် တရားတော်ချီးမြှင့်ရာ စစ်ဗျူဟာအဖွဲ့ (အခြေချ) တာချီလိတ် စစ်ဗျူဟာမှူး ဗိုလ်မှူးကြီးဇော်မင်းထွန်း ၊ တာချီလိတ်ခရိုင် အုပ်ချုပ်ရေးမှူး ဦးတင်ဝင်းရွှေနှင့် ဇနီး၊ တာချီလိတ်မြို့နယ် အုပ်ချုပ်ရေးမှူး ဦးထွန်းဝင်းအောင် နှင့် ဌာနဆိုင်ရာများ၊ ရပ်ကွက်/ကျေးရွာအုပ်ချုပ်ရေးမှူးများ၊ မြို့နယ်ဂေါပကအဖွဲ့ဝင်များ စသည်တို့မှ တက်ရောက်လာပြီး လှူဘွယ်အစုစုတို့အတွက် ရေစက်သွန်းချ တရားတော်များကို နာယူခဲ့ကြသည်။

ယနေ့ ပြုလုပ်သော ဆွမ်းဆန်စိမ်းလောင်းလှူပွဲတွင် တာချီလိတ်တပ်နယ်အပါအ၀င် ခရိုင်/မြို့နယ်/ရပ်ကွက် အုပ်ချုပ်ရေးမှူးများ၊ ဌာနဆိုင်ရာများ၊ လူမှုရေးအသင်းအဖွဲ့များ၊ နိုင်ငံရေးပါတီများ နှင့် စေတနာရှင် တိုင်းရင်းသားများ စသည်တို့မှ လာရောက်၍ ဆွမ်းလောင်းလှူကြတာကို တွေ့ရသည်။

ကြွရောက်၍ ဆွမ်းဆန်စိမ်း အလှူခံတော်မှုသည့် မြို့ပေါ်ကျောင်းများတွင် နဂါးနှစ်ကောင် ကျောင်းတိုက် အပါအ၀င် မဟာမြတ်မုနိကျောင်းတိုက်၊ ၀န်ထမ်းကုန်းကျောင်းတိုက်(၀မ်ကောင်း)၊ ငွေတောင်ဦးကမ္မဌာန်း ကျောင်းတိုက်(ပုန်းထွန်)၊ အောင်မင်္ဂလာတောရ ကျောင်းတိုက်၊ ရွှေဥတောင် ကျောင်းတိုက်၊ သီရိမင်္ဂလာဆန်ဆိုင်းကျောင်းတိုက် (ဆန်ဆိုင်း(ခ) )၊ ပုန်းထွန်ရှမ်းကျောင်းတိုက်၊ ပါလျှံဘုရားကြီးကျောင်း၊ လွမ်မွန်းကျောင်းတိုက်၊ ရွှေဥတောင်စာသင်တိုက် နှင့် သာသနာပြု သီလရှင်ကျောင်း (ပုန်းထွန်) အပါအ၀င် မြို့ပေါ်ရှိ ဘုန်းကြီးကျောင်း၊ သီလရှင်ကျောင်း စုစုပေါင်း (၂၄)ကျောင်းတို့မှ  သံဃာတော် နှင့် သီလရှင် စုစုပေါင်း အပါး (၄၀၀)ကျော် ကြွရောက်ကြောင်း သိရှိရသည်။