ကြက်ငှက်တုပ်ကွေး ရောဂါဖြစ်ပွားမှုကြောင့် ဆုံးရှုံးနစ်နာခဲ့ရသည့် စစ်ကိုင်းတိုင်းဒေသကြီး မုံရွာမြို့ ကြက်ငှက် မွေးမြူရေးဇုန်မှ လုပ်ငန်းရှင်များ တင်ပြသော ပမာဏအတိုင်း နိုင်ငံတော်သမ္မတ၏ သီးသန့်ရန်ပုံငွဖြေင့် ထောက်ပံ့လိုက်သဖြင့် လုပ်ငန်းထူထောင်ရေး အဆင်ပြေသွားကြောင်း လုပ်ငန်းရှင်များထံမှ သိရသည်။

"အရင်တုန်းက ထောက်ပံ့ကြေးကို အစိုးရက သတ်မှတ်ပေးတာ။ အခုပေးတာက ခြံပိုင်ရှင်တွေ တင်ပြ တောင်းဆိုထားတဲ့ အတိုင်း အကောင်အရေအတွက်နဲ့ လိုအပ်တဲ့ ပမာဏအတိုင်း ထောက်ပံ့ပေးတာပါ။ ကျွန်တော်တို့ အနေနဲ့ လိုချင်တဲ့ ထောက်ပံ့ငွေအတိုင်းရတော့ လုပ်ငန်းပြန်လည်ထူထောင်ဖို့ အဆင်ပြေသွားတယ်" ဟု ကြက်ခြံပိုင်ရှင် ဦးကြံက ပြောသည်။

ယခင်က လုပ်ငန်းဆုံးရှုံး နစ်နာမှုများအတွက် ထောက်ပံ့ငွေများ ပေးအပ်ရာတွင် အစိုးရက သတ်မှတ်လေ့ ရှိသော်လည်း စက်တင်ဘာ (၃၀)ရက်က နိုင်ငံတော်သမ္မတ၏ သီးသန့်ရန်ပုံငွေမှ ထောက်ပံ့မှုတွင် ယခင်နှင့် မတူတော့ဘဲ ပြောင်းလဲသွားကြောင်း တိုင်းဒေသကြီး အစိုးရထံမှ သိရသည်။

"ဆုံးရှုံးနစ်နာခဲ့တဲ့ ကြက်ခြံပိုင်ရှင်တွေကို စာနာထောက်ထားတဲ့အနေနဲ့ နိုင်ငံတော်သမ္မတကြီးရဲ့ သီးသန့် ရန်ပုံငွေထဲကနေ ပေးတာပါ။ ဒါကလည်း ဒီထောက်ပံ့ ငွေနဲ့ ခြံပိုင်ရှင်တွေကို လုပ်ငန်း ပြန်လည် ထူထောင်နိုင်ဖို့နဲ့ ဇီဝလုံခြုံရေးမြှင့်တင် နိုင်ဖို့ရာ ရည်ရွယ်ချက်နဲ့ ထောက်ပံ့ပေးတာ ဖြစ်ပါတယ် " ဟု စစ်ကိုင်းတိုင်းဝန်ကြီးချုပ် ဒေါက်တာမြင့်နိုင်က ပြောသည်။

ခြံပိုင်ရှင်များ အနဖြေင့် တင်ပြခဲ့သည့် သေဆုံးကြက်ကောင်ရေကို သက်တမ်းအလိုက် ဈေးနှုန်းသတ်မှတ်ကာ ထောက်ပံ့ခြင်းဖြစ်ပြီး စုစုပေါင်း ထောက်ပံ့ကြေးငွေ ကျပ်သိန်းပေါင်း(၆,၆၂၉)ကျော်ရှိကြောင်း သိရသည်။

မုံရွာမြို့ ကြက်ငှက်မွေးမြူရေးဇုန်တွင် ၂၀၁၆ ခုနှစ် မတ်လ(၃၁)ရက်က ကြက်ငှက်အကောင်ရေ သာမန်ထက် သေဆုံးမှု များပြားနေသည့်အတွက် စစ်ဆေးရာတွင် H5၊ H9၊ N2 ဗိုင်းရပ်စ် အမျိုးအစားများကြောင့် ကြက်ငှက်တုပ်ကွေးရောဂါ ဖြစ်ပွားနေကြောင်း တွေ့ရှိရပြီးနောက် ဧပြီလ (၃ ) ရက်နေ့မှ မေလ (၁၉) ရက်အတွင်း ပိုင်ရှင် (၉၈) ဦးတို့၏ ခြံပေါင်း (၁၇၄) ခြံမှ ကြက်အကောင်ရေ (၈၈၆၂၂)အား သုတ်သင်ရှင်းလင်းခဲ့ရခြင်းဖြစ်သည်။

အဆိုပါ မွေးမြူရေးဇုန်တွင် ကြက်ငှက်တုပ်ကွေးဖြစ်ပွားမှုကြောင့် ၂၀၁၂ ခုနှစ် မေလအတွင်း တစ်ကြိမ်၊ ၂၀၁၅ ခုနှစ် ဖော်ဖော်ဝါရီလ အတွင်း တစ်ကြိမ် နှင့် ၂၀၁၆ ခုနှစ် မတ်လအတွင်းတစ်ကြိမ် ကြက်ငှက်သေဆုံးမှု အများအပြား ရှိခဲ့ခြင်းဖြစ်သည်။

သတင်း - ရန်နိုင်စိုး