~~~~~~~~⊰❂ unicode ❂⊱~~~~~~~~

ရှမ်းပြည်နယ်အရှေ့ပိုင်းဒေသ၊ တာချီလိတ်ခရိုင်၊ တာချီလိတ်မြို့နယ် မယ်ခေါင်ရပ်ကွက်ရှိ ရှင်းမန်ရွှေဆိုင်မှ ကျပ်(၈၀၀)သိန်းကျော်တန်ဖိုးရှိ ရွှေထည်ပစ္စည်းများ ဖောက်ထွင်းခံရမှု အခင်းဖြစ်ပွားပြီး တစ်ပတ် အကြာတွင် သံသယရှိသူ ထိုင်းနိုင်ငံသားအား ဖောက်ထွင်းခံရသည့် ပစ္စည်းများနှင့်အတူ ဖမ်းဆီး ရမိလိုက်ကြောင်း သိရသည်။

တာချီလိတ်ခရိုင်/မြို့နယ်ရဲတပ်ဖွဲ့မှူးတို့ ဦးစီးသည့် ရဲတပ်ဖွဲ ဝင်များသည် အောက်တိုဘာလ (၁၈) ရက်နေ့ ည(၁၀)နာရီက မသင်္ကာဖွယ်တွေ့ရသည့် ထိုင်းနိုင်ငံသား Mr.Rachan အား စစ်ဆေးရှာဖွေခဲ့ရာမှ ဖောက်ထွင်းခံရသည့် ပစ္စည်းများနှင့်အတူ ရှာဖွေတွေ့ရှိရခြင်းဖြစ်ကြောင်း သိရသည်။

အဆိုပါ ထိုင်းနိုင်ငံသားထံမှ ဆမ်ဆောင်းအမျိုးအစား လက်ကိုင်ဖုန်း(၁)လုံး၊ Mr.Rachan အမည်ပါ ထိုင်းနိုင်ငံသား မှတ်ပုံတင်တစ်ခု၊ အရှည်(၈)လက်မခန့်ရှိ ဓာတ်မီး(၁)လက်၊Nike တံဆိပ်ပါ ဦးထုပ်တစ်လုံး၊ ကော်စေ့ထည့်ပစ်ရသော ကော်သေနတ်အမာ (၁)လက်တို့နှင့် တကွ ကျောက်စိမ်း၊ စိန်၊ ကျောက်နီတို့ ပါဝင်သည့် ရွှေလက်စွပ် (၄)ကွင်း၊ ပလက်တီနမ်ဆွဲကြိုး (၃)ကုံး၊ ကျောက်စိမ်း(၁)လုံးနှင့် ကျောက်နီ(၁)လုံးတို့ကို စစ်ဆေးတွေ့ရှိခဲ့ပြီး အဆိုပါပစ္စည်းများမှာ ရွှေဆိုင်ဖောက်ထွင်းခံထားရသော အမှုမှ ပျောက်ဆုံးပစ္စည်းများဖြစ်နေကြောင်း စစ်ဆေးတွေ့ရှိရသဖြင့် Mr.Rachanအား တာချီလိတ်မြို့မ ရဲစခန်းတွင် ဆက်လက် စစ်ဆေးနေကြောင်း သိရသည်။

ရှင်းမန်ရွှေဆိုင်အား အောက်တိုဘာလ (၁၂)ရက်နေ့က ဖောက်ထွင်းခံရသဖြင့် ရွှေဆိုင်ပိုင်ရှင်ဖြစ်သူ ဦးချစ်ထူမှ တရားလိုပြုလုပ်တိုင်တန်းခဲ့ရာ တာချီလိတ်မြို့မရဲစခန်းတွင် အမှုအမှတ် ၁၉၂/၂၀၁၆၊ ရာဇသတ်ကြီး ပုဒ်မ(၃၈၀)ဖြင့် အမှုဖွင့်ဆောင်ရွက်နခြေင်းဖြစ်သည်။