~~~~~~~~⊰❂ unicode ❂⊱~~~~~~~~

ကျိုင်းတုံ - မိုင်းလား အကြားရှိ ဝမ်တာပင်းဂိတ်အား အောက်တိုဘာလ (၂၃)ရက်နေ့က ရုတ်တရက် ပိတ်လိုက်ခြင်းကြောင့် မိုင်းလားဒေသအတွင်း သောင်တင်နေသော ကျိုင်းတုံမှ တစ်ဆင့် သွားရောက် လည်ပတ်သည့် နိုင်ငံခြားသား ခရီးသွား (၄၂)ဦးအား ဝမ်တာပင်းဂိတ်မှ တစ်ဆင့် အောက်တိုဘာလ(၂၅)ရက်နေ့တွင် ပြည်နယ်(လဝက)မှ စိစစ်၍ ဖြတ်သန်းခွင့်ပေးခဲ့ပြီး ထိုင်းနိုင်ငံသို့ ပြန်လည် ထွက်ခွာသွားခဲ့ကြောင်း သိရသည်။

"ဒီမနက်(၈)နာရီလောက်က မိုင်းလားက ထွက်လာတယ်။ အဲ့ဒီဘက်က ခရီးသွား ကုမ္ပဏီက ခေါ်ဆောင် လာပေးတာ။ ဝမ်တာပင်းဂိတ်မှာ ကျွန်တော်ကိုယ်တိုင် သွားစောင့်ပြီး စိစစ်လက်ခံပေးခဲ့တယ်။ အထောက်အထား အကုန်ပြည့်စုံပါတယ်။ ဒါကြောင့် အခု ထိုင်းနိုင်ငံကို ပြန်ဝင်သွားပါပြီ"ဟု ရှမ်းပြည်နယ် (အရှေ့ပိုင်း) အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ဒုတိယပြည်နယ် ဦးစီးမှူးရုံးမှ ဒုတိယညွှန်ကြားရေးမှူး ဦးကိုကိုသော်က Tachileik News Agency သို့ ပြောသည်။

(Entry Permit)ဖြင့် ထိုင်းနိုင်ငံမှ ဝင်ရောက်လာပြီး ကျိုင်းတုံမှတစ်ဆင့် မိုင်းလားမြို့သို့ သွားရောက် လည်ပတ်သော မလေးရှားနိုင်ငံသား (၃၇)ဦး ထိုင်းနိုင်ငံသား(၅)ဦးမှာ မိုင်းလားမှ မနက်(၈)နာရီခန့်တွင် ထွက်ခွာလာပြီး ပြည်နယ်လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာနရုံးမှ စိစစ်လက်ခံကာ ကျိုင်းတုံသို့ ပြန်လည်ရောက်ရှိလာခဲ့ကြောင်း ထို့နောက် ထိုင်းနိုင်ငံမယ်ဆိုင်မြို့သို့ ပြန်လည် ထွက်ခွာသွားခဲ့ကြောင်း သိရသည်။

နိုင်ငံခြားသားများအား (EP)ဖြင့် ဝင်ရောက်ခွင့်ပြုထားသည့် ကာလမှာ ရက်သတ္တပတ်နှစ်ပတ် ခွင့်ပြုထားခြင်းဖြစ်ပြီး ရှမ်းပြည်နယ်(အရှေ့ပိုင်း)ရှိ တာချီလိတ်၊ မိုင်းဖြတ်၊ ကျိုင်းတုံ၊ မိုင်းလားမြို့များသို့ သွားရောက်လည်ပတ်ခွင့်ရှိကြောင်း သိရပြီး လစဉ်ပျမ်းမျှအားဖြင့် လူဦးရေ(၁၀၀)ခန့်ဝင်ရောက်မှုရှိကြောင်း သိရသည်။

"ပြည်နယ်လဝကမှူးကိုယ်တိုင် ကျွန်မတို့ကို ဝမ်တာပင်းဂိတ်မှာ လာကြိုပေးပါတယ်။ မိုင်းလားဘက်မှာတော့ ရွှေလင်းစတားခရီးသွားလာရေးလုပ်ငန်းရုံးက စီစဉ်ဆောင်ရွက်ပေးပါတယ်၊ အခု ကျွန်မတို့ မယ်ဆိုင်မြို့ကို ရောက်နေပါပြီ"ဟု အဆိုပါ ခရီးသွားတစ်ဦးက ပြောသည်။

အောက်တိုဘာလ (၂၅)ရက်နေ့တွင် UWSA အဖွဲ့မှ မိုင်းလားဒေသမှ မူလနေရာသို့ ပြန်လည် ဆုတ်ခွာသွားခဲ့သော်လည်း၊ လတ်တလောကာလတွင် ဝမ်တာပင်းဂိတ်ပိတ်ထားသည့်အတွက် ကျိုင်းတုံမှ တစ်ဆင့် မိုင်းလားသို့ လာရောက်လည်ပတ်သော နိုင်ငံခြားသားခရီးသွားများအနဖြေင့် မိုင်းလားမြို့ရှိ ရွှေလင်းစတားခရီးသွားလာရေးကုမ္ပဏီရုံးသို့ ဆက်သွယ်ကာ အသိပေးနိုင်ကြောင်းလည်း သိရသည်။

ဝမ်တာပင်းဂိတ်ကို အောက်တိုဘာလ (၂၃)ရက်နေ့ ညနေပိုင်းက ဖြတ်သန်းခွင့် ပိတ်ပင်ထားလိုက်သည့် အတွက် တပ်မတော်မှ လုံခြုံရေးယူထားသည့် ဝမ်တာပင်း ပူးပေါင်းစစ်ဆေးရေးဂိတ်နှင့် မိုင်းလားနယ်မြေအတွင်း "ဝ"တပ်မှ တပ်စွဲထားသည့် ဂိတ် (၂)ဂိတ်မှာ မိုင်(၂၀)ခန့်အတွင်း ဝမ်တာပင်းကျေးရွာမှ ကျိုင်းတုံမြို့သို့ ကျောင်းတက်ရန်လာသော ကလေးငယ်များနှင့် ဒေသတွင်း ခရီးသွားများ ပိတ်မိနပြေီး၎င်းတို့မှာ မိုင်းလားသို့လည်း ဝင်ခွင့်မရဘဲဖြစ်နေကြောင်း သိရသည်။

သတင်း - ကိုဇက်