ရွာငံကော်ဖီ တန် ၅၀ ခန့် ဧပြီလအတွင်း ပြည်ပတင်ပို့မည်
***********
ရှမ်းပြည်နယ်တောင်ပိုင်း ရွာငံမြို့ ကော်ဖီစိုက်တောင်သူအဖွဲ့ (၂၀) ကျော်မှ စုပေါင်းထုတ်လုပ်သော အထူးတန်းကော်ဖီ တန်ချိန် (၅၀) ခန့်အား ဧပြီလအတွင်း ဆွစ်ဇာလန်၊ အမေရိကန်နှင့် ထိုင်ဝမ်နိုင်ငံများသို့ တင်ပို့နိုင်ရန် စီစဉ်နေကြောင်း ရွာငံ ကော်ဖီအစုအသင်းအဖွဲ့  ထံမှ သိရသည်။

“အခုလောလောဆယ်မှာတော့ ဆွစ်ဇာလန်ကို (၆) တန်ပို့ဖို့အတွက် ပြင်ဆင်နေပါပြီ။ အားလုံးတော့ (၁၈) တန် ပို့ရမှာပါ။ ထိုင်ဝမ်ကိုတော့ (၁၂) တန်ပို့မှာပါ။ အားလုံးစာချုပ်လည်းချုပ်ပြီးသွားပြီ။ စျေးနှုန်းလည်း သိပြီးသွားပြီ။ စျေးနှုန်းကတော့ တစ်တန်ကို ဒေါ်လာ (၄၃၀၀) ရပါတယ်။ ရန်ကုန်ဆိမ်ကမ်း သင်္ဘောပေါ်အရောက် ပို့ပေးရတယ်”ဟု ဦးဝင်းအောင်ကျော်က ပြောသည်။

အမေရိကန်နိုင်ငံသို့လည်း တန်ချိန် (၂၀) တင်ပို့ရန်ပြင်ဆင်နေပြီး ယခုနှစ်ကော်ဖီစျေးမှာ ယခင်နှစ်များထက် တောင်သူများ စျေးပိုရကြောင်း သိရသည်။

“ကျွန်တော်တို့ မြန်မာကော်ဖီအသင်းကလည်း ဧပြီ (၁၇) ရက်နေ့က အမေရိကန်ကို ကော်ဖီပြပွဲသွားကြပြီ။ ကော်ဖီစျေးကွက် ရနိုင်ဖို့ပါ။ ကိုရီးယားနဲ့ ဂျပန်ကိုတော့ ပြင်ဦးလွင်၊ မန္တလေးက ပို့တယ်။ ရွာငံကော်ဖီကနေ တောင်သူတွေကနေထုတ်တဲ့ အထူးတန်းကော်ဖီတွေကတော့ အမေရိကန် ပို့ဖို့ ပြင်ဆင်နေကြပါပြီ” ဟု ဦးဝင်းအောင်ကျော်က ပြောသည်။

ကော်ဖီသီးလုံးစိုအမှည့်အား ယခင်နှစ်က တစ်ပိသာလျှင် ကျပ် (၈၀၀)မှ (၉၀၀)အထိသာ စျေးရှိသော်လည်း ၂၀၁၇ ခုနှစ်တွင် တစ်ပိသာလျှင် ကျပ် (၉၀၀)မှ ( ၁၀၀၀)အထိ စျေးပေါက်ကြောင်း သိရသည်။

သတင်း #နိုနို
ဓါတ်ပုံ #U.S Embassy Rangoon