~~~~~~~~⊰❂ unicode ❂⊱~~~~~~~~

ဂျပန် ဦးနှောက်ရောင် ကာကွယ်ဆေး ထိုးနှံခြင်းလုပ်ငန်းနှင့်ပတ်သက်၍ ရှမ်းပြည်နယ်(မြောက်ပိုင်း)၊ ကျောက်မဲမြို့ရှိ ပြည်သူ့ဆေးရုံတွင် အောက်တိုဘာလ (၁၁) ရက်နေ့ နံနက်ပိုင်းက အသိပညာပေး ဆွေးနွေးပွဲကို ပြုလုပ်ခဲ့ပြီး လာမည့် နိုဝင်ဘာလနှင့်ဒီဇင်ဘာလတို့တွင် ကျောက်မဲမြို့နယ်အတွင်းရှိ အသက် (၉)လမှ (၁၅) နှစ်အရွယ်ကြား ကလေးများအား အခမဲ့ ထိုးနှံပေးသွားမည်ဖြစ်ကြောင်း သိရသည်။

"မနက်(၉)နာရီမှာ စတင်ပြုလုပ်တာဖြစ်ပါတယ်၊ အဓိကရည်ရွယ်ချက်ကတော့ ဂျပန်ဦးနှောက်ရောင် ရောဂါဟာ (၁၅)နှစ်အောက် ကလေးငယ်တွေမှာပိုပြီး ပြင်းထန်စွာ ဖြစ်ပွားတတ်တယ်၊ ရောဂါဖြစ်သူအားလုံးရဲ့ သုံးပုံတစ်ပုံဟာ သေဆုံးနိုင်ခြေရှိပြီး သုံးပုံတစ်ပုံကတော့ ဦးနှောက်ရောင်ရမ်းတာတွေ ဖြစ်ကျန်နေနိုင်တဲ့အတွက် ခန္ဓာကိုယ် ဖွံ့ဖြိုးမှုကိုလည်း ထိခိုက်စေနိုင်ပါတယ်၊ ဒါဟာ အရေးတကြီးကာကွယ်ရမဲ့ ရောဂါဖြစ်ပြီး ကာကွယ်ဆေးထိုးနှံခြင်းကသာ ဒီရောဂါကိုတားဆီးနိုင်တာဖြစ်တဲ့အတွက် တစ်နိုင်ငံလုံး အတိုင်းအတာနဲ့ ကာကွယ်နေရတဲ့ ရောဂါလည်း ဖြစ်ပါတယ်"ဟု ကျောက်မဲခရိုင်ကျန်းမာရေးဦးစီးမှူး (ကျောက်မဲပြည်သူ့ဆေးရုံအုပ်ကြီး) ဒေါက်တာ အောင်အောင်က တာချီလိတ်သတင်းအေဂျင်စီ သို့ ပြောသည်။

အဆိုပါ ဆွေးနွေးပွဲ ဖွင့်ပွဲတွင် ကျောက်မဲခရိုင်အုပ်ချုပ်ရေးမှူးမှ အဖွင့်အမှာစကား ပြောကြားခဲ့ပြီး ဆွေးနွေးပွဲသို့ တက်ရောက်လာသည့် ခရိုင်နှင့် မြို့နယ်ဌာနဆိုင်ရာအသီးသီးမှ တာဝန်ရှိသူများအား ကျောက်မဲခရိုင် ကျန်းမာရေးဦးစီးမှူးမှ ဂျပန်ဦးနှောက်ရောင်ရောဂါနှင့်ပတ်သက်သည့် ကြိုတင်ကာကွယ်ဆေးထိုးနှံခြင်း လုပ်ငန်း လုပ်ဆောင်ရန် အစီအစဉ်များအား ဆွေးနွေးခဲ့ကြောင်း သိရှိရသည်။

"နိုဝင်ဘာလမှာ ကျောင်းအခြပြေု ဂျပန်ဦးနှောက်ရောင် ကာကွယ်ဆေးထိုးနှံခြင်းနဲ့ ဒီဇင်ဘာလမှာ ပြည်သူလူထု အခြပြေု ဂျပန်ဦးနှောက်ရောင် ကာကွယ်ဆေး ထိုးနှံခြင်းလုပ်ငန်းတွေကို လုပ်ဆောင်သွားဖို့ ရှိတဲ့အတွက် ကျောက်မဲ ခရိုင်/ မြို့နယ်က ဌာနဆိုင်ရာအသီးသီးက တာဝန်ရှိသူတွေကို ကြိုတင်အသိပညာပေးဆွေးနွေးမှု ဆောင်ရွက်ခြင်းဖြစ်ပါတယ်"ဟု ကျောက်မဲခရိုင်ကျန်းမာရေးဦးစီးမှူးက ပြောသည်။

တစ်နိုင်ငံလုံး အတိုင်းအတာဖြင့် အခမဲ့ထိုးနှံပေးနေသည့် ပိုလီယိုရောဂါ ကာကွယ်ဆေးများကဲ့သို့ ဂျပန်ဦးနှောက်ရောင်ကာကွယ်ဆေးအား လာမည့် ၂၀၁၈ ဘဏ္ဍာနှစ်အတွင်း အသက် (၉) လအရွယ်နှင့် အသက် (၁၅)နှစ် အရွယ်ကြားရှိ ကလေးများအား ထိုးနှံပေးသွားမည်ဖြစ်ကြောင်း သိရှိရသည်။

သတင်း - နဖြေိုးမြင့်
ဓာတ်ပုံ - Dr.Aung Aung