~~~~~~~~⊰❂ unicode ❂⊱~~~~~~~~

ကျိုင်းတုံမှ ရေသန့်လုပ်ငန်းအားလုံး၏ ရေနမူနာများ ပြန်လည်စစ်ဆေးရန် ပြည်နယ်ဝန်ကြီးညွှန်ကြား
*********
ရှမ်းပြည်နယ် (အရှေ့ပို်င်း) ကျိုင်းတုံမြို့နယ်အတွင်းရှိ ရေသန့်လုပ်ငန်းများအနေဖြင့် အစားအသောက်နှင့် ဆေးဝါးကွပ်ကဲရေးဦးစီးဌာန(FDA)၏ ထောက်ခံချက်ရရှိရေးနှင့် ပတ်သက်ပြီး အောက်ခြေတွင် အငြင်းပွားမှုများ ဖြစ်ပေါ်နေသည့်အတွက် ကျိုင်းတုံမှ ရေသန့်လုပ်ငန်းအားလုံး၏ ရေနမူနာပြန်လည်စစ်ဆေးသွားရန် ရှမ်းပြည်နယ် စီမံကိန်းနှင့် စီးပွားရေးဝန်ကြီး ဦးစိုးညွန့်လွင်က ညွှန်ကြားလိုက်သည်။

FDA မှ ရေသန့်လုပ်ငန်းများကို စစ်ဆေးရာတွင် စစ်ဆေးမှုအောင်မြင်သော ရေသန့်လုပ်ငန်းများမှာ ယနေ့အချိန်ထိ ထောက်ခံချက်လက်မှတ် ရရှိခြင်း မရှိသေးဘဲ စစ်ဆေးမှုမအောင်မြင်သော လုပ်ငန်းအချို့က ညွှန်ချုပ်နှင့် သွားရောက်တွေ့ဆုံလျှင် ထောက်ခံချက်ရရှိလျှက်ရှိကြောင်း ကျိုင်းတုံမြို့ရှိ ရေသန့်လုပ်ငန်းရှင် အချို့က တာချီလိတ်မဲဆန္ဒနယ် အမှတ်(၂)မှ ပြည်သူ့လွှတ်တော်ကိုယ်စားလှယ် ဦးခင်မောင်တင့်အား တိုင်ကြားခဲ့သဖြင့် ၄င်းမှ ယနေ့ ပြုလုပ်သည့် တွေ့ဆုံပွဲတွင် တင်ပြခဲ့ခြင်းဖြစ်သည်။

“FDAက ရေစစ်တဲ့လုပ်ငန်းတွေမှာ တစ်ချို့လုပ်ငန်းတွေက စစ်ဆေးမှုအပိုင်းမှာ အောင်မြင်တာတွေရှိတယ်။ မအောင်မြင်တဲ့ တစ်ချို့လုပ်ငန်းတွေကကျတော့ ညွှန်ချုပ်နဲ့ သွားတွေ့လို့ရှိရင် ထောက်ခံချက်ရလာပြီးတော့ စစ်ဆေးမှု အောင်မြင်တဲ့လူတွေကျတော့ အခုချိန်ထိ လက်မှတ်ထုတ်ပေးခြင်း မခံရဘဲနဲ့ ပြည်သူလူထုကို ဒီတိုင်း ဖြန့်ဝေတဲ့အခါမှာ အန္တရာယ်ရှိပါတယ်”ဟု တာချီလိတ်မဲဆန္ဒနယ် အမှတ်(၂)မှ ပြည်သူ့လွှတ်တော်ကိုယ်စားလှယ် ဦးခင်မောင်တင့်က တင်ပြခဲ့ခြင်း ဖြစ်သည်။

အဆိုပါ တွေ့ဆုံပွဲသို့ ခရိုင်အစားအသောက်နှင့် ဆေးဝါးကွပ်ကဲရေးဦးစီးဌာနမှ ဦးစီးမှူး ဒေါက်တာတေဇာလင်း ခရီးသွားခွင့်တင်ထားသည့်အတွက် အစည်းအဝေးတက်ရောက်နိုင်ခြင်းမရှိ၍ အဆိုပါကိစ္စအား FDA မှ ပြန်လည်ရှင်းလင်းမည့်သူ မရှိသဖြင့် ယင်းကဲ့သို့ ပြန်လည်စစ်ဆေးရန် ညွှန်ကြားလိုက်ခြင်းဖြစ်ကြောင်း သိရသည်။

 “ရေသန့်လိုင်စင်က ရသင့်တဲ့လူကမရဘဲနဲ့ မအောင်တဲ့လူက ရနေတယ်ဆိုတော့ အခုကလည်း FDAက ခရီးသွားခွင့် တင်ထားတယ်ဆိုတော့ စားသုံးသူရေးရာနဲ့ FDA ပေါင်းပြီးတော့ ရေသန့်အကုန်လုံးရဲ့ ရေသန့်နမူနာတွေကို တောင်ကြီးကို ပြန်ပို့ပေးပါ။ တောင်ကြီးမှာ ပြန်စစ်ခိုင်းလိုက်မယ်။ အောက်ခြေမှာက အငြင်းပွားမှုတွေ ဖြစ်နေတာကတော့ မကောင်းပါဘူး။ ဒီတော့ လိုင်စင်ရပြီးသားရော မရသေးတာကိုရော ပို့ပေးပါ”ဟု ရှမ်းပြည်နယ် စီမံကိန်းနှင့်စီးပွားရေးဝန်ကြီး ဦးစိုးညွန့်လွင်က ပြောသည်။

ကျိုင်းတုံမြို့နယ်အတွင်း ရေသန့်လုပ်ငန်းပေါင်း (၁၄)ခုရှိကြောင်း သိရပြီး ဇူလိုင်လအတွင်းက အစားအသောက်နှင့် ဆေးဝါးကွပ်ကဲရေးဦးစီးဌာမှ ဦးဆောင်၍ ရေသန့်လုပ်ငန်းများကို ၄င်းတို့ သတ်မှတ်ထားသည့် စံချိန်စံညွှန်းများနှင့် ညီမညီ စစ်ဆေးမှုများကို ပြုလုပ်ခဲ့ခြင်းဖြစ်သည်။

သတင်း၊ဓါတ်ပုံ #ဇွဲမြတ်