~~~~~~~~⊰❂ unicode ❂⊱~~~~~~~~

မကွေးတိုင်းဒေသကြီးအစိုးရအဖွဲ့တွင် လစ်လပ်ဝန်ကြီးနေရာများ  ခန့်ထားနိုင်ရန် အမည်စာရင်း တင်သွင်း
*********
မကွေးတိုင်းဒေသကြီးအစိုးရအဖွဲ့တွင် လစ်လပ်လျှက်ရှိသော ဝန်ကြီးနှစ်ဦးနေရာ၌ ဖြည့်စွက်ခန့်ထားနိုင်ရန် အမည်စာရင်းကို ဖေဖော်ဝါရီ(၁၄)ရက်နေ့တွင် ပြုလုပ်သော တိုင်းဒေသကြီးလွှတ် တော် အရေးပေါ်အစည်းအဝေးတွင် ဝန်ကြီးချုပ်က တင်သွင်းလိုက်ကြောင်း သိရသည်။

" အလုပ်သမား၊ လူဝင်မှုကြီးကြပ်ရေးနဲ့ ပြည်သူ့အင်အားဝန်ကြီးနေရာ ရွေးချယ်ခံထားရသူက ပညာ ရေးအငြိမ်းစားတစ်ဦးလို့ သိရပြီး လယ်ဆည်ဝန်ကြီးနေရာရွေးချယ်ခံရသူကလည်း ပညာအရည်အချင်းက B.E-Civil ဖြစ်ပါတယ်။ ဝန်ထမ်းဟောင်းတွေလည်းဖြစ်နေတာကြောင့် အဲဒီဝန်ကြီးနှစ်ဦးအနေနဲ့ သူတို့ရဲ့ အရည်အချင်းအရ ဝန်ကြီးတာဝန်တွေကို ကောင်းကောင်းမွန်မွန် ထမ်းဆောင်သွားနိုင်လိမ့်မယ်လို့ ယုံကြည်မျှော်လင့်ပါတယ်။ ဝန်ကြီး နှစ်ဦးစလုံးက မကွေးမြို့မှာနေထိုင်သူတွေဖြစ်တယ်လို့ သိရပါတယ်"ဟု လူမှုရေးဝန်ကြီး ဒေါက်တာခင်မောင်အေးက တာချီလိတ်သတင်းအေဂျင်စီသို့ ပြောသည်။

မကွေးတိုင်းဒေသကြီးအစိုးရအဖွဲ့ဝင် ဝန်ကြီး နှစ်ဦးက ၎င်းတို့၏သဘောဆန္ဒအရ နှုတ်ထွက်ခွင့်ပြုထားသဖြင့် လစ်လပ်သွားသည့်နေရာများတွင် ဖြည့်စွက်ခန့်ထားရန် ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံ အခြေခံဥပဒေပုဒ်မ ၁၆၁၊ ပုဒ်မခွဲ(က)ပါ အမည်စာရင်း သတ် မှတ်ချက်များနှင့်ပြည့်စုံသည့် လွှတ်တော်ကိုယ်စားလှယ်မဟုတ်သူ  အသက် (၆၉)နှစ်အရွယ် ဆည်မြောင်းဦးစီးဌာန ညွှန်ကြားရေးမှူး(ငြိမ်း) ဦးအေးငွေနှင့် တွဲဘက်ပညာရေးမှူး(ငြိမ်း) အသက် (၆၇)နှစ်အရွယ် ဦးအောင်ကျော်မိုးတို့ကို တိုင်းဒေသကြီး (သို့)ပြည်နယ်အစိုးရအဖွဲ့ ဥပဒေပုဒ်မ (၈) နှင့်အညီတာဝန် ပေး အပ်လိုကြောင်းနှင့် မကွေးတိုင်းဒေသကြီးလွှတ်တော်မှ သဘောတူညီချက်ပေးပါရန် ဝန်ကြီးချုပ်က အဆို ပြုတင်သွင်းခဲ့ခြင်းဖြစ်သည်။

"ဒီနှစ်ရက်အတောအတွင်းမှာ ဝန်ကြီးချုပ်တင်သွင်းလာတဲ့အမည်စာရင်းပါ ပုဂ္ဂိုလ်နှစ်ဦးကို ကျွန်တော်တို့ လေ့လာသုံးသပ်ရပါဦးမယ်။ တစ်ဦးက စိုက်ပျိုးရေးနဲ့မပတ်သက်တဲ့ တည်ဆောက်ရေးပညာရှင် ဖြစ်နေပါတယ်။ တစ်ဦးကလည်း လဝက နဲ့မပတ်သက်တဲ့ ပညာရေး ကဖြစ်နေတယ်။ ပညာရေးတစ်ခုထဲကောင်းနေပြီး နိုင်ငံရေးမှာ ဇီးရိုးဖြစ်နေသလား။ ဒါတွေကို ကျွန်တော်တို့ လေ့လာသုံးသပ်ပြီး (၁၆) ရက်နေ့မှာလုပ်မယ့် လွှတ်တော်အစည်းအဝေးမှာ ဆွေးနွေးသွားဖို့ရှိပါတယ်"ဟု သရက် အမှတ်(၂) မဲ ဆန္ဒနယ်မှ လွှတ်တော်ကိုယ်စားလှယ် ဦးဇော်မိုးအောင်က ပြောသည်။

မကွေးတိုင်းဒေသကြီးအစိုးရအဖွဲ့တွင် လစ်လပ်လျှက်ရှိသော ဝန်ကြီးနှစ်ဦး၏အမည်စာရင်းကို ဖေဖော်ဝါရီ (၁၄)ရက်နေ့တွင်ပြုလုပ်သည့် ဒုတိယအကြိမ် မကွေးတိုင်းဒေသကြီးလွှတ်တော် အရေးပေါ် အစည်းအဝေး ၁/၂၀၁၈ ပထမနေ့တွင် ဝန်ကြီးချုပ်ကိုယ်စား လူမှုရေးဝန်ကြီးက ဖတ်ကြားတင်သွင်းသွား ခြင်းဖြစ်သည်။

တင်သွင်းလာသည့်ဝန်ကြီး(၂)ဦးအမည်စာရင်းများနှင့်စပ်လျဉ်း၍ ၂၀၁၈ ခုနှစ် ဖေဖော်ဝါရီ (၁၆) ရက်နေ့တွင် ပြုလုပ်မည့် မကွေးတိုင်းဒေသကြီးလွှတ်တော်အစည်းအဝေးတွင် ဆွေးနွေးသွားမည်ဖြစ် ကြောင်း သိရသည်။

သတင်း၊ဓါတ်ပုံ #ဖီးနစ်