~~~~~~~~⊰❂ unicode ❂⊱~~~~~~~~

မွေးရာပါချို့ယွင်းချက်ရှိသော်လည်း ငွေကြေးအရ ဆေးကုသနိုင်ခြင်းမရှိသူများ သီပေါပြည်သူ့ဆေးရုံသို့ ဆက်သွယ်နိုင်
********
ရှမ်းပြည်နယ်(မြောက်ပိုင်း) သီပေါမြို့နယ်အတွင်း မွေးရာပါရုပ်ဆင်းအင်္ဂါချို့ယွင်းခြင်းများကို ငွေကြေးအရ ဆေးကုသနိုင်ခြင်းမရှိပါက နီးစပ်ရာကျန်းမာရေးဌာနများမှတစ်ဆင့် သီပေါမြို့ ပြည်သူ့ဆေးရုံသို့ ဆက်သွယ် ကုသမှုခံယူနိုင်ကြောင်း သိရသည်။

“အခု နှာခေါင်းကွဲ၊ အာခေါင်ကွဲလူနာ (၁၀)ယောက်လောက်ကို မေလ (၄)ရက် သို့မဟုတ် (၅)ရက်နေ့လောက်မှာ ပြင်ဦးလွင် သွားပြမှာ ဖြစ်ပါတယ်။ အကုန်လုံးက သီပေါမြို့နယ်အတွင်းကပါ။ သီပေါမြို့နယ်အတွင်းက ဒီလိုကုသချင်သူတွေရှိရင် ကိုယ်နဲ့အနီးစပ်ဆုံး သက်ဆိုင်ရာ ကျန်းမာရေးဌာနမှတစ်ဆင့် ဆက်သွယ်ပါ။ ဒီလိုဆက်သွယ်ခိုင်းတာက သွားဖို့လာဖို့ကအစ စီစဉ်ပေးဖို့ပါ။ သွားရေးလာရေးအခက်အခဲရှိနေရင် သွားခေါ်ပေးပါမယ်”ဟု သီပေါပြည်သူ့ဆေးရုံကြီး၏ ဆေးရုံအုပ် ဒေါက်တာနန္ဒဝင်းက တာချီလိတ်သတင်းအေဂျင်စီသို့ ပြောသည်။

 ရင်သားဟော်မုန်းအဆမတန်ကြီးထွားနေပြီး ဆေးကုသရန် အခက်အခဲရှိနေသည့် သီပေါမြို့နယ်အတွင်းမှ မိန်းကလေးငယ်တစ်ဦးအား သီပေါပြည်သူ့ဆေးရုံတွင် ဧပြီလအတွင်းက အောင်မြင်စွာ ခွဲစိတ်ကုသပေးပြီးသည့်နောက် မွေးရာပါ ရုပ်ဆင်းအင်္ဂါချို့ယွင်းနေသည့် လူနာမိန်းကလေးတစ်ဦးလည်း ထပ်မံဆေးကုသလိုကြောင်း ဆက်သွယ်လာသဖြင့် ဆေးကုသမှုကုန်ကျစရိတ်ပေးလှူမည့် အလှူရှင်ရှာဖွေခြင်းအပါအဝင် ခွဲစိတ်ကုသမှုများအတွက် ဆေးရုံမှ ဆောင်ရွက်ပေးထားကြောင်း သိရသည်။

မွေးရာပါ ချို့ယွင်းချက်ရှိပြီး ငွေရေးကြေးရေးအရ ဆေးမကုနိုင်သည့်လူနာများအနေဖြင့် သီပေါပြည်သူ့ဆေးရုံတွင် ကုသမှုခံယူနိုင်ကြောင်း သိရသည်။

သတင်း #ဇာနှင်း
ဓါတ်ပုံ #NMK

⊰❂ #TachileikNewsAgency #TachileikOnlineNews  #တာခ်ီလိတ္သတင္းေအဂ်င္စီ www.tachileik.net  ❂⊱