~~~~~~~~⊰❂ unicode ❂⊱~~~~~~~~

လှည်းကူးမြို့နယ်၌ ပေါက်ကွဲမှုဖြစ်ပွားသည့်နေရာတွင် ဗုံးသီး ၂၁ လုံးအပြင် ကျည်ထိပ်ဖူး ၁၁၅ ခု ထပ်မံတွေ့ရှိ
****************
ရန်ကုန်တိုင်းဒေသကြီး၊ လှည်းကူးမြို့နယ်၊ ကြို့ကုန်းတောင်ကျေးရွာတွင် ဗုံးပေါက်ကွဲမှုဖြစ်ပွားသည့် သံတိုသံစဝယ်ယူသည့်နေအိမ်၌ ဗုံးသီး (၂၁)လုံးတွေ့ရှိထားရာမှ ၂၀၁၈ ခုနှစ် မေလ (၁၀)ရက်နေ့တွင် ပွိုင့်-၅ ကျည်ထိပ်ဖူး အဟောင်း (၁၁၅) တောင့်အားထပ်မံ ရှာဖွေတွေ့ရှိရကြောင်း သိရသည်။

အဆိုပါနေအိမ်တွင် အင်းတိုင်တိုက်နယ် စအရ(၉၀၅)မှ တပ်မတော်သားများ၊ ဖောင်ကြီးနယ်မြေရဲစခန်းမှ တပ်ဖွဲ့ဝင်များ၊ ဟိုင်းကူးကျေးရွာ အုပ်စု အုပ်ချုပ်ရေးမှူးတို့ပါဝင်သည့်ပူးပေါင်းအဖွဲ့က မေလ (၁၀) ရက်နေ့က ထပ်မံရှာဖွေရာ နေအိမ်မီးဖိုချောင်အဖီအောက်ဘက် စဉ့်အိုးများအနီးမှ ပွိုင့်-၅ ကျည်ထိပ်ဖူး အဟောင်း (၁၁၅) တောင့်အားထပ်မံတွေ့ရှိခဲ့ခြင်းဖြစ်ကြောင်း သိရသည်။

ကြို့ကုန်းတောင်ကျေးရွာမှ အသက် (၅၁)နှစ်အရွယ် ဦးအေးသွင်၏နေအိမ်တွင် ပေါက်ကွဲမှုဖြစ်ပွားကြောင်း သတင်းအရ မေလ (၉)ရက်နေ့ ညနေ (၄)နာရီကျော်တွင် ဖောင်ကြီးနယ်မြေရဲစခန်းမှ တပ်ဖွဲ့ဝင်များ သွားရောက်စစ်ဆေးရာ ဦးအေးသွင်သည် ၎င်းနေအိမ်ရှေ့ပေ (၂၀) ခန့်အကွာ နေအိမ်ခြံဝန်းဝင်ပေါက်အနီး၌  ပေါက်ကွဲမှုမှရရှိသည့်ဒဏ်ရာများဖြင့် သေဆုံး နေသည်ကိုတွေ့ရှိရခြင်းဖြစ်ကြောင်း သိရသည်။

ဦးအေးသွင်သည် ရေခဲထုပ်ရောင်းခြင်း၊ သံတိုသံစများအား ရေခဲထုပ်ဖြင့် လဲလှယ်ခြင်း၊ သံတိုသံစများ ကောက်ခြင်းတို့ လုပ်ကိုင်နေသူတစ်ဦးဖြစ်ပြီး ယင်းနေ့ ညနေ(၂)နာရီဝန်းကျင်က ၎င်းယူဆောင်လာသော သံတိုသံစများအား ခွာနေသည်ကို အိမ်နီးချင်းဖြစ်သူ ဒေါ်အုန်းညွန့်ကတွေ့သဖြင့် ဦးအေးသွင်ထံလာနေစဉ် ခွာနေသောသံထည်ပစ္စည်းမှ မီးခိုးများ ထွက်လာသည်ကိုတွေ့ရ၍ နောက်ပြန်ပြေးသွားစဉ် ပေါက်ကွဲသံနှင့်အတူ ဒေါ်အုန်းညွှန့်၏ ယာဘက်ပေါင်တွင် ထိမှန်ဒဏ်ရာရရှိသွားကြောင်း သိရသည်။

သေဆုံးသူ ဦးအေးသွင်နှင့် ဒဏ်ရာရရှိသူ ဒေါ်အုန်းညွန့်တို့အား ဖောင်ကြီးတိုက်နယ်ဆေးရုံသို့ ပို့ဆောင်ခဲ့ပြီး ရဲတပ်ဖွဲ့က အင်းတိုင်တပ်နယ်မှူး ဗိုလ်မှူးကြီး သန်းနိုင်ဝင်း ဦးစီးအဖွဲ့၊ စအရ (၉၀၅)မှ ဗိုလ်ကြီး ထက်ဝေဦး ဦးစီးအဖွဲ့၊ လှည်းကူးမြို့နယ်ရဲတပ်ဖွဲ့ ရဲမှူး သောင်းငွေ ဦးစီးပူးပေါင်းအဖွဲ့တို့ဖြင့် အခင်းဖြစ်နေအိမ်တွင် အသေးစိတ်စစ်ဆေးရှာဖွေခဲ့ရာ ဦးအေးသွင်၏ နေအိမ်ရှေ့ သံတိုသံစအဟောင်းပုံအတွင်းမှ (၈၄) မမ ဗုံးသီး (၄) လုံး၊ (၈၂) မမဗုံးသီး (၅) လုံး၊ (၇၅) မမဗုံးသီး (၂) လုံး၊ (၆၀) မမ ဗုံးသီး (၁) လုံး၊ (၈၄) မမ ဒုံးကျည် (၂) လုံး၊ အာပီဂျီ ဗုံးသီးအဟောင်း (၇) လုံး၊ စုစုပေါင်း ဗုံးသီး (၂၁) လုံးအား ထပ်မံရှာဖွေတွေ့ရှိခဲ့ပြီးနောက်
မေလ (၁၀)ရက်နေ့တွင် ထပ်မံရှာဖွေရာ ကျည်ထိပ်ဖူးများအား ထပ်မံတွေ့ရခြင်းဖြစ်ကြောင်း သိရသည်။
အဆိုပါပေါက်ကွဲမှုနှင့်ပတ်သက်၍ ဖောင်ကြီး နယ်မြေရဲစခန်းတွင် သေမှုသေခင်းအမှတ်စဉ် (၈/၂၀၁၈)ဖြင့် အမှုဖွင့်ဆောင်ရွက်နေကြောင်း သိရသည်။
သတင်း #နန်းဟွမ်ခမ်း
ဓါတ်ပုံ #ပြည်ထဲရေး