~~~~~~~~⊰❂ unicode ❂⊱~~~~~~~~

ကျန်းမာရေးနှင့်အားကစားဝန်ကြီးဌာနသို့ သွားဘက်ဆိုင်ရာဆေးနှင့် ဆေးပစ္စည်း အတုများ တင်သွင်းသည့် ကုမ္ပဏီကို အမျိုးသားဆေးဝါးဥပဒေအပြင် တရားမကြောင်းအရလည်း တရားစွဲဆိုမည်
*****************
ကျန်းမာရေးနှင့်အားကစားဝန်ကြီးဌာနသို့ သွားဘက်ဆိုင်ရာဆေးနှင့် ဆေးပစ္စည်း အတုများ တင်သွင်းသည့် ကုမ္ပဏီကို အမျိုးသားဆေးဝါးဥပဒေပါ ပြစ်မှုကြောင်းအရ လည်းကောင်း၊ တရားမကြောင်းအရ လည်းကောင်း တရားစွဲဆိုသွားမည်ဖြစ်ကြောင်း ကျန်းမာရေးနှင့်အားကစား ပြည်ထောင်စုဝန်ကြီး ဒေါက်တာ မြင့်ထွေးက ပြောကြားသည်။

အဆိုပါ သွားဘက်ဆိုင်ရာဆေးနှင့် ဆေးပစ္စည်းအတုများအား တိုင်းနှင့်ပြည်နယ်အသီးသီးရှိ ဆေးရုံများတွင် ဖြန့်ဖြူးထားသဖြင့် အတုမှန်းသိချိန်တွင် အသုံးပြုမှုရပ်ဆိုင်းထားရခြင်းဖြစ်ကြောင်း သိရသည်။

၂၀၁၈ ခုနှစ် မေလ (၂၉) ရက်နေ့တွင် ကျင်းပသော ပြည်သူ့လွှတ်တော်အစည်းအဝေးတွင် ပန်တောင်းမဲဆန္ဒနယ်မှ ဒေါ်ခင်နှင်းသစ်က သွားဘက်ဆိုင်ရာဆေးနှင့် ဆေးပစ္စည်းအတုများကို တိုင်းနှင့်ပြည်နယ် အသီးသီးရှိ ဆေးရုံများသို့ ဖြန့်ဖြူးထားခြင်း၊ အတုမှန်းသိ၍ သုံးစွဲခြင်း မပြုလုပ်ရန် ရပ်ဆိုင်းထားရခြင်းတို့ ဖြစ်ခဲ့ခြင်းကြောင့် အဆိုပါ အတုသွင်းသူ၊ အတုမှန်းသိလျက်နှင့် လက်ခံပြီး ဖြန့်ဝေပေးသော သက်ဆိုင်သူတို့အား ဖော်ထုတ် အရေးယူဆောင်ရွက်ရန်နှင့် နောင်တွင် အလားတူကိစ္စများ လုံးဝထပ်မံမဖြစ်ပေါ်စေရန် မည်သို့ စီစဉ်ဆောင် ရွက်ထားသည်ကို သိလိုခြင်းနှင့် စပ်လျဉ်း၍မေးမြန်းခဲ့ခြင်းအား ယင်းကဲ့သို့ ပြန်လည်ဖြေကြားခဲ့ခြင်းဖြစ်သည်။

အဆိုပါ ဆေးနှင့်ဆေးပစ္စည်းအတုများ တင်သွင်းသည့်ကိစ္စနှင့်ပတ်သက်၍ ၂၀၁၈ ခုနှစ် ဖေဖေါ်ဝါရီလ (၂၈) ရက်နေ့ ကျန်းမာရေးနှင့်အားကစားဝန်ကြီးဌာန၏ စီမံခန့်ခွဲရေး ကော်မတီ အမှတ်စဉ် (၂/၂၀၁၈)တွင် ရှေ့နေချုပ်ရုံး၏ပြန်ကြားချက်အတိုင်း အမျိုးသားဆေး ဝါးဥပဒေပါ ပြစ်မှု ကြောင်းအရ လည်းကောင်း၊ တရားမကြောင်းအရ လည်းကောင်း တရားစွဲဆိုဆောင်ရွက်ရန် ဆုံးဖြတ်ခဲ့ပါကြောင်း အဆိုပါမေးခွန်းနှင့် စပ်လျဉ်း၍ ကျန်းမာရေးနှင့်အားကစား ပြည်ထောင်စုဝန်ကြီး ဒေါက်တာ မြင့်ထွေးက လွှတ်တော်တွင် ဖြေကြားသည်။

ပြည်သူ့ကျန်းမာရေးဦးစီးဌာနက နေပြည်တော် ဥတ္တရသီရိမြို့နယ်၊ ဘုရားကုန်းရဲစခန်းတွင် အမျိုးသားဆေးဝါး ဥပဒေပါ ပြစ်မှုကြောင်းအရ အမှုဖွင့်အရေးယူပေးရန် အကြောင်းကြားထားပြီဖြစ်ကြောင်း သိရသည်။
လက်ရှိတွင်လည်း ဆေးနှင့်ဆေးပစ္စည်းများလက်ခံရေးကော်မတီကို စနစ်တကျဖွဲ့စည်းထားပြီး တင်ဒါလာရောက်သွင်းစဉ်က ပေးသောနမူနာပစ္စည်းများနှင့် ကိုက်ညီခြင်းရှိ/မရှိ အထူးဂရုပြု၍ တိုက်ဆိုင်စစ်ဆေးခြင်းကို ဆောင်ရွက်နေကာ ပစ္စည်းတင်သွင်းသည့်ကုမ္ပဏီကိုလည်း တင်ဒါတင်သွင်းစဉ် သတ်မှတ်ထားသည့် အရည်အသွေး၊ စံချိန်စံညွှန်းနှင့် ကိုက်ညီရန်အတွက် တာဝန်ယူကြောင်း လက်မှတ် ထိုးခိုင်းထားကြောင်း သိရသည်။

၎င်းအပြင် လာရောက်ယှဉ်ပြိုင်စဉ် မူလထုတ်လုပ်သည့် တရားဝင်ကိုယ်စား လှယ်လွှဲစာ(Letter of Authorization) ကိုတောင်းခံခြင်း၊ စိစစ်ခြင်းတို့ကိုပြုလုပ်သည့်အပြင် လိုအပ်ပါက Letter of Authorization ပေးသောကုမ္ပဏီကို ဆက်သွယ်စိစစ်ခြင်းများ ဆက်လက်တောင်းမည်ဖြစ်ကြောင်း သိရသည်။
ဝယ်ယူရာတွင် အမျိုးသားဆေးဝါးဥပဒေအရ မှတ်ပုံတင်ရှိထားသောဆေးဝါးဖြစ်ရန်နှင့် ဆေးဝါးတင်သွင်းခွင့် လုပ်ငန်းလုပ်ခွင့် လက်မှတ်ရ တရားဝင်ကိုယ်စားလှယ်များသာ လက်ခံပြီး ပစ္စည်းဖွင့်ဖောက်စိစစ်လက်ခံရာတွင် လိုက်နာရမည့် Standard Operation Producer များရေးဆွဲခြင်း၊ Check List များပြုစု၍ ပစ္စည်းများကို လက်ခံခြင်း၊ ဆေးဝါးပစ္စည်းများကို ကျန်းမာရေးနှင့် အားကစားဝန်ကြီးဌာန ဂိုဒေါင်များတွင် ထားသိုနိုင်ရန် ဂိုဒေါင်များကို တိုးချဲ့ရန် ၂၀၁၈-၁၉ ဘတ်ဂျက်နှစ်တွင် လျာထားဆောင်ရွက်ခြင်းများ လုပ်ဆောင်ထားကြောင်း သိရသည်။