~~~~~~~~⊰❂ unicode ❂⊱~~~~~~~~

ယခင် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းကို၎င်း၏ သဘောဆန္ဒအရ ရာထူးမှ နှုတ်ထွက်ခြင်းကို၂၀၁၈ ခုနှစ် မေလ (၂၅)ရက်နေ့တွင် နိုင်ငံတော်သမ္မတရုံး၏ အမိန့်အမှတ် ၂၄/၂၀၁၈ ဖြင့် ခွင့်ပြုခဲ့ပြီးနောက် လစ်လပ်နေသည့် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး နေရာအတွက် နိုင်ငံတော်သမ္မတက အမည်စာရင်းတင်သွင်းသည့် ဦးစိုးဝင်းကို မေလ (၃၁)ရက်နေ့တွင် ကျင်းပသည့် ပြည်ထောင်စုလွှတ်တော်က ကန့်ကွက်သူမရှိ အတည်ပြု ခန့်အပ် လိုက်ခြင်းဖြစ်သည်။

ဦးစိုးဝင်းသည် ၁၉၆၃ ခုနှစ်ဝန်းကျင်တွင် ဘဏ်အရာရှိအဖြစ် လည်းကောင်း၊ ၁၉၇၆ ခုနှစ်မှ ၁၉၉၆ ခုနှစ်အထိ Myanmar Foreign Trade Bank တွင် လည်းကောင်း ၂၀၀၀ ခုနှစ်တွင် MFTB မှပင်စင်ယူ၍ ၂၀၁၄ မှစတင်ကာ Deloitte Touche Myanmar Vigour Advisory Ltd.၏ Country Managing Partner အဖြစ်လည်း လုပ်ကိုင်နေသူဖြစ်ကြောင်း ကိုယ်ရေးရာဇဝင်ဖော်ပြချက်အရ သိရသည်။