~~~~~~~~⊰❂ unicode ❂⊱~~~~~~~~

ထိုင်းနိုင်ငံ မူးယစ်ဆေးဝါး ထိန်းချုပ်ရေးအဖွဲ့ (ONCB)နှင့် မြန်မာနိုင်ငံမူးယစ်ဆေးဝါး တားဆီးနှိမ်နှင်းရေး ရဲတပ်ဖွဲ့တို့ သတင်းဖလှယ်ဆက်သွယ်ချက်အရ မူးယစ်တပ်ဖွဲ့စု(၃၀)တာချီလိတ်မှ တပ်ဖွဲ့ဝင်များ နှင့် တာချီလိတ်မြို့နယ် အကောက်ခွန်ဦးစီးဌာနမှ တာဝန်ရှိသူများ ပါဝင်သော သက်ဆိုင်ရာ ပူးပေါင်းအဖွဲ့သည် ၂၀၁၈ခုနှစ် ဇွန်လ(၂)ရက်နေ့ နံနက်(၁၁)နာရီခွဲဝန်းကျင်အချိန်က ချစ်ကြည်ရေးအမှတ်(၂)တံတားတွင် ထိုင်းနိုင်ငံသား မောင်းနှင်လာသည့် (၁၀)ဘီးယာဉ်အတွင်းမှ ဆိုဒီယမ်ဆိုင်ရာနိုက်(Sodium Cyanide )များကို ဖမ်းဆီးရမိခြင်းဖြစ်သည်။

အဆိုပါ ပူးပေါင်းအဖွဲ့က မယ်ဆိုင်ဘက်မှ တာချီလိတ်ဘက်သို့ ထိုင်းနိုင်ငံသား Mr. Sawat Kaeodam မောင်းနှင်ဝင်ရောက်လာသော (၁၀)ဘီးယာဉ်အား ရပ်တန့်ရှာဖွေရာမှ ယာဉ်အနောက်ခန်းတွင် အနက်ရောင် မိုးကာဖြင့် အုပ်လျက် မသင်္ကာဖွယ် သံပုံးများကို တွေ့ရှိရ၍ ချစ်ကြည်ရေးအမှတ်(၂)တံတား အနီးရှိ မူးယစ်တပ်ဖွဲ့စု(၃၀)တာချီလိတ်ရုံးသို့ မောင်းနှင်ခေါ်ဆောင်လာပြီး ဖွင့်ဖောက်စစ်ဆေးရာမှ ဆိုဒီယမ်ဆိုင်ရာနိုက်(Sodium Cyanide )များဖြစ်နေကြောင်း သိရသည်။

ယာဉ်အတွင်း၌ အမြင့်(၂၀)လက်မ၊ အချင်း(၁၄)လက်မဝန်းကျင်ရှိ အနက်ရောင်သံပုံးများဖြင့် ဆိုဒီယမ်ဆိုင်ရာနိုက်(Sodium Cyanide )များထည့်ထားသည့် အလေးချိန် ကီလို(၅၀)ဝန်းကျင်စီပါသည့် သံပုံး(၃၀၀)အား တွေ့ရှိရာ စုစုပေါင်း အလေးချိန်မှာ ကီလို(၁၅၀၀၀)ရှိပြီး ဒေသတန်ဖိုးငွေမှာ ကျပ်သိန်းပေါင်း (၉၀၀)ဝန်းကျင်ရှိကြောင်း မူးယစ်ရဲတပ်ဖွဲ့ထံက သိရသည်။

ဆိုဒီယမ်ဆိုင်ရာနိုက်(Sodium Cyanide )များသယ်ဆောင်လာသည့် ထိုင်းနိုင်ငံသားထံက ဘဏ်ကတ်များနှင့်နိုင်ငံကူးစာအုပ်များနှင့်အတူ လက်ကိုင်ဖုန်း(၁)လုံးတို့ကိုလည်း သိမ်းဆည်းရမိကြောင်း သိရသည်။

ဆက်လက်၍ ဆိုဒီယမ်ဆိုင်ရာနိုက်(Sodium Cyanide )များနှင့်အတူ ဖမ်းဆီးရမိသည့် ထိုင်းနိုင်ငံ ကျင်းရှဲန်မြို့တွင်နေထိုင်သူ အသက်(၄၂)နှစ်ရှိ ထိုင်းနိုင်ငံသား Mr. Sawat Kaeodam အား တာချီလိတ်မြို့မရဲစခန်းတွင် (ပ)၁၆၉/၂၀၁၈၊ ဓာတုပစ္စည်းနှင့် ဆက်စပ်ပစ္စည်းများအန္တရာယ်မှ တားဆီးကာကွယ်ရေး ဥပဒေပုဒ်မ ၃၇ နှင့် ၃၈ တို့ အရ အမှုဖွင့်အရေးယူ ဆောင်ရွက်ထားရှိကြောင်း သိရသည်။

ဆိုဒီယမ်ဆိုင်ရာနိုက်အား လက်ဝတ်ရတနာများ ပြုလုပ်ရာတွင် လည်းကောင်း၊ သွပ်ရည်စိမ်လုပ်ငန်းများတွင် စက္ကူ၊ ချည်မျှည်နှင့် အထည်လုပ်ငန်းများ၊ ပလတ်စတစ် လုပ်ငန်းများတွင် လည်းကောင်း၊ ရွှေ၊ကြေး သတ္ထုထုတ်လုပ်ရာတွင် လည်းကောင်း အသုံးပြုလေ့ရှိပြီး ပတ်ဝန်းကျင်အား အဆိပ်သင့်စေတတ်သဖြင့် သက်ဆိုင်ရာဌာနများ၏ စိစစ်ပြီး ခွင့်ပြုချက်ဖြင့်သာ အသုံးပြုခွင့်ရှိသည့် ဓာတုပစ္စည်းဖြစ်သည်။

သတင်း - စိုင်းဇေယျာ
ဓာတ်ပုံ - ရဲတပ်ဖွဲ့