~~~~~~~~⊰❂ unicode ❂⊱~~~~~~~~

ထိုင်းနိုင်ငံသို့ လူကုန်ကူးခံရသည့် မကွေးတိုင်း ငဖဲမြို့နယ်မှ ရွှေ့ပြောင်းလုပ်သား (၁၄)ဦးအား မြဝတီနယ်စပ်မှ တစ်ဆင့် မြန်မာနိုင်ငံသို့ ပြန်လည် ပို့ဆောင်ရန်အတွက် ၂၀၁၈ ခုနှစ် ဇွန်လ (၃)ရက်နေ့တွင် ဘန်ကောက်မှ မဲဆောက်သို့ အလုပ်သမားသံအရာရှိရုံးတာဝန်ရှိသူများနှင့်အတူ ထွက်ခွာသွားပြီဖြစ်ကြောင်း သိရသည်။

“ညနေ ငါးနာရီခွဲလောက်က ထွက်သွားကြပါတယ်။ ကျွန်တော်တို့ဆီက သံအရာရှိတစ်ယောက် လိုက်သွားပြီး ဟိုဘက် မဲဆောက်မှာလည်း သံအရာရှိကတော့ အားလုံး စီစဉ်ထားပြီးပါပြီ။ သူတို့ ဟိုဘက်ကို ပြန်ရောက်ပြီ ဆိုတာနဲ့ လူကုန်တားကဆက်ပြီး ဆောင်ရွက်မှာဖြစ်ပါတယ်။ ဒီထိုင်းနိုင်ငံဘက်မှာတော့ ကျူးလွန်သူ (၃)ဦးလုံးကို ထိန်းသိမ်းထားပြီးပါပြီ။ တစ်ယောက်ကတော့ သူတို့ထိုင်းဘက်က ဥပဒေအရ တစ်ယောက်ကတော့ အာမခံနဲ့ လွှတ်ထားပါတယ်”ဟု အလုပ်သမားသံအရာရှိ ဦးစန်းမောင်ဦးက တာချီလိတ်သတင်းအေဂျင်စီသို့ ပြောသည်။

မကွေးတိုင်းဒေသကြီး၊ ငဖဲမြို့နယ်မှ အလုပ်သမား (၁၄) ဦးတို့အား မြန်မာသံရုံး၊ မြန်မာအလုပ်သမား သံအရာရှိ၊ MWRN၊ MOEAF တို့က ပူးပေါင်းကယ်တင်ခဲ့ပြီးနောက် အလုပ်သမားများအား မြန်မာနိုင်ငံသို့ စရိတ်ငြိမ်း ပြန်လည်ပို့ဆောင်ပေးခြင်း၊ အလုပ်သမားများ၏ ကုန်ကျငွေများပြန်လည်ရရှိစေရေးနှင့် ဆက်စပ် လူပွဲစားများအား အမှုဖွင့်တရားစွဲဆိုနိုင်ရေးတို့အတွက် အလုပ်သမားသံအရာရှိရုံးက မြဝတီမြို့ရှိ တာဝန်ရှိသူတို့နှင့် ချိတ်ဆက်ဆောင်ရွက်နခြေင်းဖြစ်ကြောင်း သိရသည်။

အဆိုပါ လုပ်သားများအား ပေကုန်းကျေးရွာနေ ပွဲစား ဦးကြည်မြိုင်ဆိုသူက တစ်ဦးလျှင် မြန်မာကျပ်ငွေ (၈) သိန်းစီရယူပြီး ထိုင်းနိုင်ငံတွင် ဗီဇာ၊ အလုပ်လုပ်ခွင့်လက်မှတ်နှင့် အလုပ်အကိုင်များ အပြီးအစီး ရရှိမည်ဟုဆိုကာ တနင်္သာရီတိုင်း၊ ဘိတ်မြို့နယ် မောတောင်ဂိတ်မှတစ်ဆင့် နယ်စပ်ဖြတ်ကျော် ဂိတ်လက်မှတ်များ ပြုလုပ်ပေးခဲ့ခြင်းဖြစ်ကြောင်း သိရသည်။

လုပ်သား(၁၄)ဦးသည် ၂၀၁၈ ခုနှစ် မတ်လ(၂)ရက်နေ့တွင် မောတောင်နယ်စပ်ဂိတ်မှ နယ်စပ် ဖြတ်ကျော်ခွင့် စာအုပ် (Border-Pass) များဖြင့် ထိုင်းနိုင်ငံ၊ စမုစခွန်နယ် မဟာချိုင်မြို့တွင် နေထိုင်သူ ဦးလှဝင်းနှင့်၎င်း၏ လက်ထောက်ဖြစ်သူ မျိုးမြင့်သိန်းတို့က ခေါ်ဆောင်လာပြီး အလုပ်သမား များထံမှ တစ်ဦးလျှင် ဘတ်တစ်သောင်းရယူပြီး ဘတ်ကတ် (ခေါ်) ပန်းရောင်ကတ်အတုများ ထုတ်ပေးကာ မဟာချိုင်မြို့ရှိ Prantalay Co.,ltd ငါး၊ ပုဇွန် ပင်လယ်အစား အစာနှင့် ရေထွက်ပစ္စည်း အလုပ်ရုံတွင် ၂၀၁၈ ခုနှစ် ဧပြီလ (၅) ရက်နေ့၌ အလုပ်ဝင်ရောက် လုပ်ကိုင်စေခဲ့ခြင်းဖြစ်ကြောင်း သိရသည်။

အဆိုပါ အလုပ်သမား (၁၄) ဦးတို့သည် တရားဝင်ဗီဇာနှင့် အလုပ်လုပ်ခွင့်လက်မှတ်များမရှိဘဲ အလုပ် လုပ်နေရသဖြင့် အလုပ်သမားသံအရာရှိထံ ဆက်သွယ်အကူအညီတောင်းခံမှုကြောင့် ၂၀၁၈ ခုနှစ် ဧပြီလ (၂၁)ရက်နေ့တွင် ခေါ်ထုတ်နိုင်ခဲ့ခြင်းဖြစ်ကြောင်း သိရသည်။

ယင်းနောက် ဧပြီလ(၂၃)ရက်နေ့တွင် ထိုင်းနိုင်ငံ D.O.E ဌာန၊ ထို်င်းလူကုန်ကူးမှု တားဆီးနှိမ်နင်းရေး ရဲတပ်ဖွဲ့၊ ရာဇဝတ်မှုနှိမ်နင်းရေးအထူးရဲတပ်ဖွဲ့၊ ဆဝါဒီကန်အဖွဲ့၊ အလုပ်အကိုင်ဌာန စသည့်အဖွဲ့စုံတို့အား အလုပ်သမားသံအရာရှိက ချိတ်ဆက်အကြောင်းကြားခဲ့သဖြင့် ဧပြီလ(၂၆) ရက်နေ့တွင် မဟာချိုင်နယ်မြေသို့ ထိုင်း D.S.I၊ နယ်မြေခံရဲတပ်ဖွဲ့တို့က သွားရောက်ဖမ်းဆီးခဲ့ရာ မျိုးမင်းသိန်း(ခေါ်)ကုလားလေးနှင့် မလင်းလင်းခိုင်တို့ (၂) ဦးအား ဖမ်းဆီးနိုင်ခဲ့သော်လည်း ဦးဆောင်သူ ပွဲစားဦးလှဝင်းမှာ အဆိုပါအချိန်က ထွက်ပြေးတိမ်းရှောင်နေခဲ့ခြင်းဖြစ်ကြောင်း သိရသည်။

ဖမ်းဆီးရမိထားသည့် ပွဲစား(၃)ဦးအား ဘန်ကောက်မြို့၊ ကျဲဝတ်တနာရှိ DSI ဌာနချုပ်တွင် စစ်ဆေးမေးမြန်းပြီးနောက် မေလ(၃၀) ရက်နေ့တွင် ကျဲဝတ်တနာ တရားရုံးတွင် တရားစွဲဆိုထားကြောင်း သိရသည်။

အဆိုပါ အလုပ်သမားများအနက် ထို်င်းနိုင်ငံသို့ ပြန်လည်ဝင်ရောက်အလုပ်လုပ်ကိုင်လိုသူများအား တရားဝင် MOU စနစ်ဖြင့် ဝင်ရောက်နိုင်စေရေးအတွက် MOEAF က ညှိနှိုင်းဆောင်ရွက်ပေးခဲ့ရာ International focus အေဂျင်စီမှစာချုပ်ချုပ်ဆို၍ အခမဲ့စနစ်ဖြင့် Thai Union Co.,ltd ငါးသေတ္တာစက်ရုံနှင့် South-East Asia Canning Co.,ltd ပင်လယ်အစားအစာလုပ်ငန်းများသို့ တရားဝင်ပြန်လည်ဝင်ရောက် လုပ်ကိုင်ခွင့်ရမည်ဖြစ်ကြောင်း သိရသည်။

ထိုင်းနိုင်ငံတွင် ရွှေ့ပြောင်းလုပ်သားဆိုင်ရာဥပဒေပြောင်းလဲမှုကြောင့် တရားမဝင်နေထိုင် အလုပ်လုပ်ကိုင်နေသည့် မြန်မာရွှေ့ပြောင်းလုပ်သားများသည် မိမိတို့ဆန္ဒသဘောအလျောက် နယ်စပ်အသီးသီးမှ ပြန်လည်ဝင်ရောက်မှုများလည်းရှိနခြေင်းဖြစ်သည်။

မြန်မာနိုင်ငံသားများအနေနှင့် ထိုင်းနိုင်ငံတွင် အလုပ်လုပ်ကိုင်လိုပါက တရားဝင် MoU စနစ်ဖြင့်သာ လာရောက်ကြရန်နှင့် အခက်အခဲတစ်စုံတစ်ရာပေါ်ပေါက်ပါက အလုပ်သမားသံအရာရှိများနှင့် MOEAF(ဘန်ကောက်) သို့ ဆက်သွယ်အကူအညီတောင်းခံနိုင်ကြောင်း သိရသည်။

အလုပ်သမားသံအရာရှိရုံးဖုန်းနံပါတ်များဖြစ်သည့် ဦးစန်းမောင်ဦး ဝ၉၄၈၈၄၅၄၈၄၊ ဦးသန်းနိုင် ဝ၆၅၂၂၀၆၉၅၂၊ ဦးဇော်မင်းအောင် ဝ၆၅၂၂၀၆၉၅၁ (တောင်ပိုင်း၊ရနောင်း)၊ ဦးအောင်မင်း ဝ၆၅၂၂၀၆၉၅၃ (မဲဆောက်)၊ ဦးဦးခင်မောင် ဝ၉၉၀၅၉၂၃၅၂ (ချင်းမိုင်)၊ MOEAF(ဘန်ကောက်)Call Centre, ဝ၈၃ ၅၄၄ ၆၄၄၂ တို့သို့ အချိန်မရွေးဆက်သွယ်နိုင်ကြောင်း သိရသည်။

သတင်း - ချယ်ရီထိုက်
ဓာတ်ပုံ - MOEAF