~~~~~~~~⊰❂ unicode ❂⊱~~~~~~~~

နယ်စပ်ကုန်သွယ်မှုလမ်းကြောင်းများတွင် တရားမဝင်ကုန်သွယ်မှုများ တားဆီးနိုင်ရေးအတွက် ယခင် Mobile Team ကဲ့သို့ တရားမဝင်ကုန်သွယ်မှု တားဆီးထိန်းချုပ်ရေးအထူးအဖွဲ့များဖြင့် ဖွဲ့စည်း ဆောင်ရွက်သွားတော့မည် ဖြစ်ကြောင်း သိရသည်။

“တရားမဝင်ကုန်စည်တွေ ခိုးဝင်၊ ခိုးထွက်တာတွေရှိနေတော့ ဒါတွေကို တားဆီးဖို့ သက်ဆိုင်ရာ အဖွဲ့အစည်းတွေ ပါဝင်တဲ့ အထူးအဖွဲ့အနေနဲ့ ဖွဲ့စည်းဆောင်ရွက်သွားမှာပါ။ ပြည်ထောင်စုအစိုးရရဲ့ ညွှန်ကြားချက်နဲ့ ဆောင်ရွက်တာဖြစ်ပါတယ်။ အခုတော့ အဖွဲ့တွေ ပြင်ဆင်တုန်းရှိပါသေးတယ်”ဟု ရှမ်းပြည်နယ်အစိုးရအဖွဲ့ဝင် ဘဏ္ဍာရေးဝန်ကြီး ဦးစိုင်းရှဲန်တစ်လုံက တာချီလိတ်သတင်းအေဂျင်စီသို့ ပြောသည်။

တရားမဝင်ကုန်သွယ်မှု တားဆီးထိန်းချုပ်ရေး အထူးအဖွဲ့များ ဖွဲ့စည်းရေး လုပ်ငန်းစဉ်များကို နယ်စပ်ကုန်သွယ်ရေး ပမာဏ အများဆုံးရှိနေသည့် ရှမ်းပြည်နယ်တွင် ဆောင်ရွက်နပြေီဖြစ်ကြောင်း ပြည်နယ်အစိုးရအဖွဲ့ထံမှ သိရပြီး လက်ရှိ ရှမ်းပြည်နယ်၏ နယ်စပ်ကုန်သွယ်မှုများတွင် ထက်ဝက်ခန့်မှာတရားမဝင် ကုန်သွယ်မှုများဖြစ်နေသည်ဟု နယ်စပ်ဝင်/ထွက်လမ်းကြောင်းများ ကြီးကြပ်ရေး ရှမ်းပြည်နယ်အစိုးရအဖွဲ့ ကိုယ်စားလှယ်က ခန့်မှန်းထားသည်။

“လက်ရှိ အနေအထားအရ ရှမ်းပြည်နယ်တစ်ခုလုံးမှာ ဝင်/ထွက်နေတဲ့ ရာခိုင်နှုန်း(၅၀)ကျော်က တရားမဝင်တွေပဲ။ တချို့ကျတော့လည်း တရားဝင်တွေဖုံးပြီး တရားမဝင်တာတွေ သွားလာနေတာပဲ။ ရှမ်းပြည်နယ်(အရှေ့ပိုင်း)မှာဆို တာချီလိတ်မှာသုံးစွဲဖို့ပဲ တံတားပေါ်ကနေ သုံးရာခိုင်နှုန်းနဲ့ တင်သွင်းခွင့်ပြုတယ်။ တာချီလိတ်ကနေ တခြားသယ်မယ်ဆိုရင် မယ်ယန်းဂိတ်မှာ အခွန်ဆောင်ရမယ်။ ဒီလို ပြဌာန်းထားပေမဲ့ လက်ရှိမှာ တာချီလိတ်၊ ကျိုင်းတုံကနေလာတဲ့ ကားတွကြေည့်လိုက် ခေါင်မိုးပေါ်ကအစ ထိုင်ခုံအောက်တွေမှာပါ တရားမဝင် သယ်ဆောင်လာတဲ့ ကုန်ပစ္စည်းတွေနဲ့ ပြည့်နေတာပဲလေ။ တာဝန်ရှိတဲ့ သူတွေကလည်း ထိထိရောက်ရောက် လုပ်ဖို့ဆိုတာ ဖြစ်နေတာက သူလိုငါလိုလူတွေက များနေတာပေါ့။ ဒီလိုများနေတော့ ကြားထဲမှာ ဘာဖြစ်လဲဆိုတော့ အဂတိလိုက်စားမှုတွဖြေစ်လာတာပေါ့”ဟု နယ်စပ်ဝင်ထွက်လမ်းကြောင်းများ ကြီးကြပ်ရေး ရှမ်းပြည်နယ်အစိုးရအဖွဲ့ ကိုယ်စားလှယ်ဖြစ်သူ ရှမ်းပြည်နယ်စားသုံးသူရေးရာဦးစီးဌာန လက်ထောက်ညွှန်ကြားရေးမှူး ဦးမင်းအောင်က ပြောသည်။

စားသုံးသူများအတွက် ဘေးအန္တရာယ်ကင်းပြီး အရည်အသွေးပြည့်မီသည့် ကုန်ပစ္စည်းများ ရောက်ရှိရေးနှင့် ကုန်သွယ်မှု လုပ်ငန်းတွင် တရားဝင်တင်သွင်းသူများ၏ အခွင့်အရေးကို ကာကွယ်ပေးရေးတို့အတွက် နယ်စပ်ကုန်သွယ်ရေးမှ တရားမဝင်ကုန်သွယ်မှုများအား ထိထိရောက်ရောက်တားဆီးနိုင်ရန် လိုအပ်နေရာ တရားမဝင်ကုန်သွယ်မှု တားဆီးထိန်းချုပ်ရေးအထူးအဖွဲ့များက ဆောင်ရွက်နိုင်ရန် မျှော်လင့်ထားကြောင်း ရှမ်းပြည်နယ်အစိုးရအဖွဲ့ ကိုယ်စားလှယ်က ဆိုသည်။

"ကျွန်တော်တို့ဆို သွင်းကုန်ထုတ်ကုန်ကုမ္ပဏီတရားဝင် မှတ်ပုံတင်ထားတယ်။ ဒါပေမဲ့ ကျွန်တော်တို့ ဈေးကွက်မှာ တရားဝင်တင်ပြီး ဈေးကွက် မယှဉ်နိုင်ဘူးလေ။ ကိုယ်က တရားဝင်တင်သွင်းရင် ကျသင့်မယ့် အခွန်အခနဲ့ ပစ္စည်းတစ်ခုကို ရောင်းနိုင်မယ့်ဈေးနှုန်းထက် တရားမဝင် တင်လာသူတွေက လျှော့ပြီး သက်သာတဲ့ ဈေးနဲ့ရောင်းနေမှတော့ ဈေးကွက်က ဘယ်လိုမှ မယှဉ်နိုင်တော့ဘူးလေ။ အစိုးရအနေနဲ့ တရားမဝင်ကုန်သွယ်မှုတွေကို တကယ်ကို တားပေးနိုင်မလား။ ဒီလိုလုပ်ပေး နိုင်ရင်တော့ သွင်းကုန်ထုတ်ကုန်တွေ တရားဝင် လုပ်မယ့်သူတွေ လုပ်လို့ရတာပေါ့”ဟု ရှမ်းပြည်နယ်(အရှေ့ပိုင်း)တာချီလိတ်မြို့ရှိ သွင်းကုန်ထုတ်ကုန်လုပ်ငန်းမှ ဦးမောင်မောင်က ပြောသည်။

နယ်စပ်ကုန်သွယ်ရေးလမ်းကြောင်းများတွင် ယခင်က Mobile Team များဖြင့် စစ်ဆေးမှုများ လုပ်ဆောင်ခဲ့ပြီးနောက် ယခင်အစိုးရသက်တမ်းကုန်ခါနီးတွင် Mobile Team များကို ဖျက်သိမ်း ခဲ့ခြင်းဖြစ်သည်။

"ကျွန်တော်တို့ လက်ရှိ တရားမဝင်ကုန်သွယ်မှု တားဆီးရေး အထူးအဖွဲ့ဆိုတာ တကယ်တော့ လိုအပ်ပါတယ်။ ဘာကြောင့် လိုအပ်သလဲဆိုတော့ ပထမတစ်ချက်က ပြည်တွင်းက SME လုပ်ငန်းတွေ၊ စိုက်ပျိုးရေး လုပ်ငန်းတွေ ထိခိုက်တယ်။ အသေးစား အလတ်စားမှာ စိုက်ပျိုးရေး၊မွေးမြူရေး အကုန်တော့ ပါတာပေါ့နော်။ ဒါ့အပြင် အရည်အသွေးနိမ့်တဲ့ ကုန်ပစ္စည်းတွေ ပြည်တွင်းဈေးကွက်ကို တင်သွင်း လာတာတွေ၊ လိုင်စင်မှာ (၁၀၀)ပြပြီး (၁၀၀၀)ဖိုးလောက်တင်သွင်းလာတာတွေ အများကြီး ကျွန်တော်တို့ ကြုံနေရပါတယ်။ တချို့ကျတော့ သက်ဆိုင်ရာဌာနထောက်ခံချက်မပါဘဲ တခြားနိုင်ငံက လယ်ယာထွက်ကုန်တွေကို တင်သွင်းနေတာက ကျွန်တော်တို့နိုင်ငံ လယ်ယာကဏ္ဍအတွက် အများကြီး နစ်နာပါတယ်။ ခိုးသွင်းလာတာတွေရှိတော့ တရားဝင်တင်သွင်းနေသူတွေမှာလည်း နစ်နာပါတယ်။ ဒီလိုတွေရှိနေတာကြောင့် ဈေးကွက်အတွင်းမှာက တရားမဝင်တင်သွင်းဖက်ကို အားသာနေတဲ့ အနေအထားမှာ ရှိနေပါတယ်”ဟု နယ်စပ်ဝင်ထွက်လမ်းကြောင်းများ ကြီးကြပ်ရေး ရှမ်းပြည်နယ်အစိုးရအဖွဲ့ ကိုယ်စားလှယ်ဖြစ်သူ ရှမ်းပြည်နယ်စားသုံးသူရေးရာဦးစီးဌာန လက်ထောက်ညွှန်ကြားရေးမှူး ဦးမင်းအောင်က ပြောသည်။

တရားမဝင်ကုန်သွယ်မှု တားဆီးထိန်းချုပ်ရေးအထူးအဖွဲ့များကို တိုင်းဒေသကြီးနှင့် ပြည်နယ်များရှိ နယ်စပ်ကုန်သွယ်ရေး လမ်းကြောင်းများတွင် စစ်ဆေးရေး အတွက် ဖွဲ့စည်းဆောင်ရွက်သွားမည် ဖြစ်ကြောင်း သိရသည်။

သတင်း - #ချယ်ရီထိုက်