~~~~~~~~⊰❂ unicode ❂⊱~~~~~~~~

မြန်မာ - ထိုင်းနယ်စပ်၊ ထိုင်းနိုင်ငံ၊ မယ်ဆိုင်မြို့ လှိုဏ်ဂူအတွင်းပိတ်မိနေသည့် ကျောင်းသားလူငယ်(၁၃)ဦးအား ရှာဖွေနေသည့် (၄)ရက်မြောက်နေ့ ၂၀၁၈ ခုနှစ်၊ ဇွန်လ (၂၆)ရက်နေ့ ညပိုင်းတွင် ရှာဖွေရေး အင်အား နှစ်ဆတိုး၍ ဆောင်ရွက်သွားမည် ဖြစ်ကြောင်း အမျိုးသားဥယျာဉ်ထိန်းသိမ်းရေးဌာနမှ ညွန်ကြားရေးမှူး Mr. Htanyar Nethtammakol က ပြောကြားလိုက်သည်။

ဂူအတွင်းသို့ ဆက်သွယ်ရေးကြိုးများ၊ ရေစုပ်ယူရန် လျှပ်စစ်ဓာ်အားအတွက် ရေထဲတွင် အသုံးပြုနိုင်သည့် မီးကြိုးများကို စစ်သည်အင်အား(၄၀၀) ဖြင့် သွယ်တန်းလိက်ရှိပြီး လက်ရှိတွင် (၃) ကီလိုမီတာ အရှည်သို့ ရောက်ရှိနပြေီဖြစ်သည်။

ခြေလျင်စစ်သည်နှင့် သစ်တောအဖွဲ့ပူးပေါင်းအင်အား (၂၀၀)ခန့်သည် ဝက်ဝံတောင်ကြော( ဒွိုင်ဖာမီ)နှင့် ထမ့်လွမ်ဂူ အထက် ဒွိုင်နန်းနွန်းတောင်ထိပ် ( Point) အနီးတစ်ဝိုက်တွင် ဂူပေါက်ငယ်တွေ့ရှိပြီး အစားအသောက်များကို ပစ်ချပေးခဲ့သော်လည်း ဂူအတွင်း ပဲ့တင်သံများ မကြားရသဖြင့် ဂူ၏လျှိုပေါက်မှ အောက်ခြေသို့ ရောက်ရှိကြောင်း သုံးသပ်ထားကြသည်။

ပိတ်မိနေသူများသည် ဂူအတွင်းလမ်းကြောင်း (၃)ခုရှိနေသည့် အနက် အဆိုပါ အဖွဲ့သွားနေကျ Pattaya Beach တွင် ရှိမနေတော့ဘဲ ရှေ့သို့တိုးသွားသဖြင့် နောက်မှကယ်ဆယ်ရေးအဖွဲ့များဖြင့် မဆုံနိုင်သေးခြင်း ဖြစ်မည်ဟု ကယ်ဆယ်ရေးအဖွဲ့များက သုံးသပ်ထားကြပြီး ရေနှင့်လွတ်ရာ ဂူအတွင်းရှိ အမြင့်တစ်နေရာတွင် ခိုအောင်းနေနိုင်ကြောင်းလည်း သုံးသပ်ထားကြသည်။

အကူနည်းပြသည် ဂူအတွင်းသို့ စတင်ဝင်သွားစဉ်က စားစရာမုန့်များ ဘတ်(၁၀၀၀)ဖိုး ဝယ်သွားသဖြင့် အနည်းဆုံး(၂)ရက်စာဖူလုံနိုင်ပြီး ဂူနံရံရှိ ကျောက်ခက်ကျောက်စွယ်များမှ ရေကိုသောက်နိုင်ခြင်းကြောင့် အနည်းဆုံး နှစ်ပတ်အထိ အသက်ရှင်နိုင်သည်ဟု မိသားစုများကလည်း မျှော်လင့်နကြေသည်။

ပိတ်မိနေသည့် အဖွဲ့အားတွေ့ရှိပါက ဂူအတွင်းရှိ အပူချိန်မှာ (၂၁) ဒီဂရီစင်တီဂရိတ်မှ (၂၅)ဒီဂရီစင်တီဂရိတ်ကြား ရှိနေသဖြင့် ခန္ဓာကိုယ် အနွေးဓာတ်ရရှိရန် ပြုစုကုသခြင်းနှင့် အာဟာရဖြည့်ရန် အချိုရည်နှင့် အာဟာရသကြားလုံးများသာ ကျွေးပြီး အခြားအစားအစာများ မကျွေးရန်၊ ဂူထဲမှ ထွက်လာချိန်တွင် မျက်လုံးကို အလင်းရောင်ချက်ချင်း မထိတွေ့စေရန်၊ ဂူအတွင်းရှိ လင်းနို့ငှက်များ ကိုက်ခံရပါက ခွေးရူးရောဂါများ ရရှိနိုင်သဖြင့် ကျန်းမာရေး စစ်ဆေးမှုနှင့် အနီးကပ်စောင့်ရှောက်မှုများ လုပ်ဆောင်ရန်တို့ကိုလည်း ကျွမ်းကျင်ဆရာဝန်များက အကြံပြုမှာကြားထားကြောင်း သိရသည်။

သတင်း - #စည်သူမောင်
Photo crd : Rungrot Kongpiban