ဂူအတွင်းရှိ ကလေးများ၏ ကျန်းမာရေးအခြေအနေကောင်းမွန်နေပြီး ရေတပ်မှဆရာဝန်၊သူနာပြု (၈)ဦးလည်း အတူရှိနေကာ ရေငုပ်လေ့ကျင့်ရန်လည်း ပြင်ဆင်နေပြီဖြစ်ကြောင်း  ဇူလိုင်လ (၄)ရက်နေ့မှာ ချင်းရိုင်းသတင်းပြန်ကြားရေး တာဝန်ရှိသူက တာချီလိတ်သတင်းအေဂျင်စီသို့ ပြောကြားလိုက်သည်။

"ကလေးတွေ ကျန်းကျန်းမာမာရှိနေပါတယ်။ အခုဆိုရင် သူတို့နဲ့အတူ ဆရာဝန်၊ သူနာပြု (၈)ယောက်လည်း အတူရှိနေပါတယ်။ ဘောလုံးအသင်းက(ဂူအတွင်းမှကလေးများ) အခုဆိုရင် ရေငုပ်တာလည်း လေ့ကျင့်ဖို့ ပြင်နေပါပြီ။ ကလေးတွေ ပြန်ထွက်လာဖို့ အရေးကြီးတာက ရေကျသွားဖို့ဖြစ်လို့ ရေကိုစုပ်ထုတ်နေပါတယ်။ ကလေးတွေ ကျန်းမာရေးတိုးတက်မှုကိုလည်း အချိန်နဲ့တပြေးညီ ဂူထဲကနေအပြင်ကို တင်ပြပေးနေသလို လိုအပ်တာတွေကို ဆောင်ရွက်ပေးနေပါတယ်။ တယ်လီဖုန်းလိုင်းလည်း ဆယ်သွယ်ထားပြီးဖြစ်လို့ သူတို့မိသားစုတွေနဲ့ မနက်ဖြန်ဆို စကားပြောလို့ရပါပြီ" လို့ PR Chaingrai ၏ တာဝန်ခံက တာချီလိတ်သတင်းအေဂျင်စီသို့ ပြောသည်။

ဂူအတွင်း ပိတ်မိနေသည့် ဘောလုံးအသင်းမှ ကလေး (၁၂)ယောက်နှင့် နည်းပြတို့မှာ တောတောင်သဘာဝဖြတ်ကျော် စက်ဘီးစီးအဖွဲ့ဖြစ်သည့်အပြင် ဘောလုံးအားကစားသမားများ ဖြစ်သည့်အတွက် ကျန်းမာရေးကြံ့ခိုင်မှုကောင်းမွန်နေခြင်းကြောင့် စိုးရိမ်ဖွယ်အခြေအနေမရှိကြောင်း သိရသည်။

ဂူအတွင်းပိတ်မိနေသည့်ကလေးများနှင့်ပတ်သက်၍ မြန်မာနိုင်ငံဘက်မှ စိုးရိမ်ပူပန်မှုများအတွက်လည်း မြန်မာနိုင်ငံသားများကို ကျေးဇူးတင်ကြောင်း တာဝန်ခံက ပြောကြားသွားခဲ့သည်။

သတင်း #Tachileik News Agency
ဓါတ်ပုံ#Tachileik News Agency, ThainavySEAL