~~~~~~~~⊰❂ unicode ❂⊱~~~~~~~~

မယ်ဆိုင်ဂူအတွင်းမှ ကလေးများကို အမြန်ဆုံးခေါ်ထုတ်ရန် ထိုင်းဘုရင်တိုက်တွန်းလိုက်ပြီး ရေငုပ်အဖွဲ့ဝင်များ နေ့လယ်ပိုင်းတွင် အင်အားထပ်ဖြည့်နေ
******************************
မယ်ဆိုင်ဂူအတွင်းမှ ကလေး(၁၂)ဦးနှင့် နည်းပြတို့အား အမြန်ဆုံးခေါ်ထုတ်ရန် ထိုင်းဘုရင် မဟာဗက်ဂျီယာလောင်ကွန်းက တိုက်တွန်းလိုက်ကြောင်း ThaiPBS ၏သတင်းဖေါ်ပြချက်အရ သိရသည်။

ဂူအတွင်းပိတ်မိနေပြီး (၁၀)ရက်အကြာ ဇူလိုင်လ (၂)ရက်နေ့တွင် ပြန်ရှာတွေ့ရသည့် ကလေးများမှာ လက်ရှိအချိန်ထိ ၎င်းတို့အားတွေ့ရသည့် ဂူအတွင်းရှိ ဖတ္တယားကမ်းခြေနှင့် မီတာ(၄၀၀)အကွာနေရာတွင် ဆရာဝန်များ၊ ရေတပ်အထူးအဖွဲ့များနှင့်အတူရှိနေဆဲဖြစ်သည်။

ဂူအတွင်းပိုင်း ကျဉ်းမြောင်းသည့်လမ်းကြောင်းတွင် ရေစီးသန်နေခြင်းက ကလေးများအား ခေါ်ထုတ်ရန် အဓိကအခက်အခဲဖြစ်နေပြီး လူအင်အားနှင့် ပစ္စည်းများထပ်ဖြည့်ရန် လိုအပ်နေခြင်းဖြစ်ကြောင်း သိရသည်။
အထူးရေတပ်အပါအဝင် ကယ်ဆယ်ရေးလုပ်ဆောင်နေသူများအားလုံး အကောင်းဆုံးလုပ်ဆောင်နိုင်မည်ကို ယုံကြည်သည်ဟု ထိုင်းဘုရင်က မိန့်ကြားကြောင်း ဒုဝန်ကြီးချုပ်က ပြောကြားလိုက်ခြင်းဖြစ်ပြီး ကယ်ဆယ်ရေးလုပ်ဆောင်နေသူအားလုံးကိုလည်း ဘေးအန္တရာယ်မဖြစ်စေရေး သတိထားဆောင်ရွက်ကြရန် တိုက်တွန်းလိုက်ကြောင်း သိရသည်။

ကလေးများအား ကယ်ထုတ်လာပြီးပါက ဆေးရုံပို့ဆောင်ရန် လူနာတင်ယာဉ်နှင့် ဆေးအဖွဲ့များက အဆင်သင့်စောင့်ဆိုင်းနေကြပြီး ချင်းရိုင်းဆေးရုံတွင်လည်း အထူးကုသခန်းကို အသင့်ပြင်ဆင် စောင့်ဆိုင်းနေကြောင်း သိရသည်။

သတင်း -Tachileik News Agency
ဓါတ်ပုံ #ကိုဇောင်း