~~~~~~~~⊰❂ unicode ❂⊱~~~~~~~~

မယ်ဆိုင်ဂူအတွင်းမှ ကလေးများ ရက်ပိုင်းအတွင်း ခေါ်ထုတ်လာနိုင်မည်ဟု ခန့်မှန်းထား
****************
မယ်ဆိုင်ဂူအတွင်းမှ ကလေးများအား ယခုရက်ပိုင်းအတွင်း ကယ်ထုတ်နိုင်ဖွယ်ရှိသည်ဟု ခန့်မှန်းမှုများရှိနေပြီး ကလေးများအား ကျွမ်းကျင်ရေငုပ်သမားများအကူအညီဖြင့် အတူတွဲ၍ ခေါ်ထုတ်ရန်စီစဉ်နေကြောင်းလည်း ဇူလိုင်လ(၇)ရက်နေ့တွင် သတင်းများ ထွက်ပေါ်နေသည်ကိုတွေ့ရသည်။

ယင်းသို့ သတင်းများထွက်နေသည့် ဇူလိုင်လ(၇)ရက်နေ့ ညပိုင်းတွင် မယ်ဆိုင်ဂူကယ်ဆယ်ရေးလုပ်ငန်းဝန်းကျင်တွင် ယခင်နေ့များထက် လုံခြုံရေးစိစစ်မှုတင်းကြပ်လိုက်ပြီး သတင်းမီဒီယာများအတွက် ကန့်သတ်ဧရိယာကိုလည်း တိုးမြင့်ကန့်သတ်လိုက်သည်ကို တွေ့ရသည်။

မယ်ဆိုင်ဂူအတွင်းမှ ကလေးများအား ကျွမ်းကျင်ရေငုပ်သမားများအကူအညီဖြင့် အတူတွဲ၍ ခေါ်ထုတ်မည့်အစီအစဉ်ကို ထိုင်းတော်ဝင်ရေတပ်၊ ဗြိတိန်၊ အမေရိကန်နှင့် အခြားနိုင်ငံများမှ ရေငုပ်သမားများပါဝင်သည့်အဖွဲ့က ထိုင်းစစ်တပ်ခေါင်းဆောင်ပိုင်း၊ ပြည်ထဲရေးဝန်ကြီးဌာန တာဝန်ရှိသူများနှင့် ခရိုင်အုပ်ချုပ်ရေးတာဝန်ရှိသူများထံ အဆိုပြုတင်ပြထားကြောင်း အမေရိကန်အစိုးရ၏ ဌာနတွင်းအစီရင်ခံစာကို ကိုးကားပြီး အေဘီစီသတင်းဌာနက ဖေါ်ပြထားသည်ကိုတွေ့ရသည်။

အဆိုပါနည်းလမ်းမှာ အန္တရာယ်မကင်းလှသော်လည်း ဂူအတွင်း အောက်ဆီဂျင်ကောင်းစွာရရှိနိုင်သေးခြင်း၊ ကလေးများ ကျန်းမာရေးအခြေအနေ ကောင်းမွန်နေခြင်း၊ မကြာမီ ဂူအနီးဝန်းကျင်ဒေသတွင် မိုးသည်းထန်စွာရွာသွန်းနိုင်ခြေရှိနေရာ ဂူအတွင်းရေဝင်ရောက်မှုများလာနိုင်ခြင်းတို့ကြောင့် အဆိုပါ နည်းလမ်းကို တင်ပြထားခြင်းဖြစ်ကြောင်း ဖေါ်ပြထားသည်။

အဆိုပါ အစီအစဉ်အား အတည်ပြုပါက ယင်းအစီအစဉ်၏ကနဦးလုပ်ဆောင်ချက်အဖြစ် ဂူအတွင်း လက်ရှိလုပ်ဆောင်နေသည့် ကယ်ထုတ်ရာလမ်းကြောင်းတလျှောက် လိုအပ်မည့်ပစ္စည်းကိရိယာများ အဆင်သင့်ပြင်ဆင်ခြင်းမှာ ဇူလိုင်လ(၇)ရက်နေ့ညနေပိုင်းတွင် အပြီးသတ်လုပ်နိုင်ဖွယ်ရှိကြောင်း သိရသည်။

ယင်းနောက် ဒုတိယလုပ်ဆောင်ချက်အဖြစ် ကလေးတစ်ဦးဆီကို ကျွမ်းကျင်ရေငုပ်သမားတစ်ဦးဆီနှင့် အတူတွဲ၍ ရေငုပ်ထွက်လာရန်ဖြစ်ပြီး ဇူလိုင်လ(၈)ရက်နေ့ နံနက်ပိုင်းတွင် စတင်နိုင်ဖွယ်ရှိသည်ဟု ဆိုထားသည်။

မကြာမီ မိုးရွာသွန်းနိုင်ခြေရှိနေရာ ကလေးများအား ဂူအပြင်သို့ ကယ်ထုတ်ရေးကို စီစဉ်ထားသည်ထက် ပို၍မြန်မြန်ဆန်ဆန်လုပ်ဆောင်ရန် လိုအပ်နေသည်ဟု ကယ်ဆယ်ရေးကိုဦးဆောင်ကြီးကြပ်နေသည့် ချင်းရိုင်းခရိုင်အုပ်ချုပ်ရေးမှူး နရွန်ဆတ်အိုဆထာနကွန်းက ဇူလိုင်လ(၇)ရက်နေ့ နံနက်ပိုင်း သတင်းစာရှင်းလင်းပွဲတွင် ပြောကြားထားသော်လည်း ကယ်ထုတ်မည့်အချိန်၊ အစီအစဉ်များနှင့်ပတ်သက်၍ တိတိကျကျပြောကြားထားခြင်းမရှိသည်ကို တွေ့ရသည်။

ချင်းရိုင်းခရိုင်၊ မယ်ဆိုင်မြို့ ထမ့်လွမ်ဂူအတွင်း ဇွန်လ(၂၃)ရက်နေ့က တောဝက်ဘောလုံးအသင်းက ကလေး(၁၂)ဦးနှင့်နည်းပြတို့ ဝင်သွားပြီးနောက် မိုးရွာသွန်းကာ ဂူအတွင်းရေပြည့်သွားသဖြင့် ပိတ်မိနေခဲ့ကြခြင်းဖြစ်သည်။

အဆိုပါကလေးများအား ကယ်ထုတ်နိုင်ရန် ကနဦးတွင် ဒေသတာဝန်ရှိသူများ၊ ဌာနဆိုင်ရာများ၊ ရေတပ်အဖွဲ့များဖြင့် လုပ်ဆောင်ခဲ့သော်လည်း ဂူအတွင်းရေပြည့်နေသဖြင့် အခက်အခဲဖြစ်လာရာ နိုင်ငံတော်အဆင့် ကယ်ဆယ်ရေးအဖြစ်သတ်မှတ်လုပ်ဆောင်လိုက်ပြီးနောက် နိုင်ငံတကာမှ ပူးပေါင်းကူညီမှုများလည်း လုပ်ဆောင်လာကြခြင်းဖြစ်သည်။

Tachileik News Agency