ရှမ်းပြည်နယ်(အရှေ့ပိုင်း) ကျိုင်းတုံခရိုင်၊ မိုင်းခတ်မြို့၊ မိုင်းဟန်ကျေးရွာအုပ်စု၊ ဝမ်မဟီးကျေးရွာတွင် ၂၀၁၈ ခုနှစ်၊ ဇူလိုင်လ (၁၇)ရက်နေ့က အရက်မူးပြီး အိမ်နီးချင်း၏နေအိမ်ကို မီးရှို့မှုဖြစ်ပွားပြီး မီးရှို့သူတိမ်းရှောင်နေကြောင်း သိရသည်။

ဝမ်မဟီးကျေးရွာတွင် မီးလောင်မှုဖြစ်ပွားကြောင်း ဇူလိုင်လ(၁၈)ရက်နေ့ နံနက်(၇)နာရီခွဲအချိန်တွင် သတင်းရသဖြင့် မိုင်းခတ်မြို့မရဲတပ်ဖွဲ့၊ မြို့နယ်မီးသတ်တပ်ဖွဲ့တို့က အခင်းဖြစ်နေရာအား သွားရောက်စစ်ဆေးရာ ဒေါ်အာဒွန်း၏နေအိမ်မှာ မီးလောင်ဆုံးရှုံးနေသည်ကို တွေ့ရကြောင်း သိရသည်။

အဆိုပါနေအိမ်ကို ဇူလိုင်လ(၁၇)ရက်နေ့ ည(၆)နာရီခွဲဝန်းကျင်က အိမ်နီးချင်းဖြစ်သူ အသက်(၃၇)နှစ်အရွယ် လီခေါ်ဆိုသူက အရက်မူးပြီး တူမီးသေနတ်ဆွဲကိုင်ကာ ရောက်လာပြီး ၎င်း၏မိန်းမနေအိမ်မှဆင်းသွားသည့်ကိစ္စနှင့်ပတ်သက်၍ ဆဲဆိုခြိမ်းခြောက်သဖြင့် ဒေါ်အာဒွန်းတို့ မိသားစုက နေအိမ်မှ တိမ်းရှောင်နေစဉ် နေအိမ်အား မီးရှို့သွားခြင်းဖြစ်ကြောင်း သိရသည်။

မီးလောင်မှုကြောင့် နေအိမ်(၁)လုံး၊ သုံးဘီးဆိုင်ကယ်(၁)စီး၊ စပါးကြိတ်စက်အသေး(၁)လုံး၊ ဆိုင်ကယ်(၁)စီးတို့ မီးလောင်ဆုံးရှုံးသွားပြီး မီးလောင်မှုကို ဒေသခံများဝိုင်းဝန်းငြှိမ်းသတ်ရာ ည (၈)နာရီခွဲတွင် မီးငြိမ်းသွားကြောင်း သိရသည်။

နေအိမ်ကိုမီးရှို့သူ လီခေါ်ကို မိုင်းခတ်မြို့မရဲစခန်းတွင် (ပ)၁၀/၂၀၁၈၊ ရာဇသတ်ကြီးပုဒ်မ ၄၃၆ ဖြင့် ဇူလိုင်လ(၁၈)ရက်နေ့တွင် အမှုဖွင့်ထားပြီး လီခေါ်အားဖမ်းဆီးရမိရေးဆောင်ရွက်နေကြောင်း သိရသည်။

သတင်း #ငြိမ်းချမ်း(ပြည်)
ဓါတ်ပုံ #ရဲတပ်ဖွဲ့