~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း) ကျိုင်းတုံမြို့နယ်၊ နောင်ကုန်ကျေးရွာအုပ်စု၊ ကျိုင်းလိတ်ရွာတွင် ဇနီးဖြစ်သူ အပြင်သွားနေစဉ် ခင်ပွန်းဖြစ်သူက နေအိမ်အတွင်းရှိ ဆိုင်ကယ်ကို မီးရှို့မှုဖြစ်ပွားကြောင်း သိရသည်။

ကျိုင်းလိတ်ရွာမှ ဒေါ်စုစုလှိုင်သည် ၂၀၁၈ ခုနှစ်၊ သြဂုတ်လ(၁)ရက်နေ့ နံနက်(၇)နာရီအချိန်က အမှတ်(၃)ရပ်ကွက်ရှိ မိခင်ဖြစ်သူ၏ နေအိမ်သို့ သွားနေစဉ် နေအိမ်တွင် ခင်ပွန်းဖြစ်သူ တင်ထွန်းကျော် ကျန်နေခဲ့ခြင်းဖြစ်ပြီး ည(၇)နာရီဝန်းကျင်တွင် တင်ထွန်းကျော်က နေအိမ်ကို မီးရှို့နေကြောင်း အိမ်နီးချင်းတစ်ဦးက ဒေါ်စုစုလှိုင်အား လာရောက် ပြောပြခြင်းဖြစ်ကြောင်း သိရသည်။

ဒေါ်စုစုလှိုင် နေအိမ်ပြန်ရောက်ချိန်တွင် တစ်ထပ်အိမ်၏ ဝရံတာတွင် ရပ်ထားသည့် ဆိုင်ကယ်၏ ရှေ့ပိုင်းမှာ မီးလောင်နေသည်ကို တွေ့ရပြီး အိမ်နီးချင်းများက ငြှိမ်းသတ်ထားကြောင်း သိရသဖြင့် မီးရှို့သည့် ခင်ပွန်းဖြစ်သူအား အရေးယူပေးရန် တိုင်တန်းလာခြင်းဖြစ်ကြောင်း သိရသည်။

တင်ထွန်းကျော်မှာ အရက်မူးပြီး ဆိုင်ကယ်အား မီးရှို့ခြင်းဖြစ်ကြောင်း သိရသဖြင့်၎င်းအား ကျိုင်းတုံမြို့မ ရဲစခန်းတွင် (ပ)၂၅၉/၂၀၁၈၊ ရာဇသတ်ကြီးပုဒ်မ ၄၃၆ ဖြင့် အမှုဖွင့်စစ်ဆေးနေကြောင်း သိရသည်။

သတင်း - ငြိမ်းချမ်း(ပြည်)
ဓာတ်ပုံ - ရဲတပ်ဖွဲ့