~~~~~~~~⊰❂ unicode ❂⊱~~~~~~~~

သွားနှင့်ခံတွင်းရောဂါနယ်လှည့်ကုသရေးအစီအစဉ်တွင် ကျိုင်းတုံမြို့နယ် တောင်ပေါ်ကျေးရွာအုပ်စု(၅)ခုမှ ဒေသခံ (၃၀၀)ကျော် ကုသမှုခံယူ
***********
ရှမ်းပြည်နယ် အရှေ့ပိုင်းဒေသအတွင်း သွားနှင့်ခံတွင်းရောဂါ နယ်လှည့်ကုသရေးအစီအစဉ်၏ (၂)ရက်တာ ကုသမှုအတွင်း ကျိုင်းတုံမြို့၊ မိုင်းခွန်ကျေးရွာအုပ်စု၊ တောင်ပေါ်ကျေးရွာအုပ်စု (၅)ခုရှိ ကျေးရွာများမှ သွားနှင့်ခံတွင်းလူနာစုစုပေါင်း(၃၀၀)ကျော် လာရောက်ကုသမှုခံယူကြကြောင်း သိရသည်။

“ဆေးကုပေးရင်းတွေ့တဲ့ (၇)လသား နှုတ်ခမ်းကွဲလူနာကလေးကိုတော့ တစ်နှစ်ကျော်ရင် နေပြည်တော်ကို ခေါ်ပြီး ကုပေးမယ်လို့ ပြောတယ်။ အခုသွားကုပေးတဲ့ဒေသမှာက ဆေးရုံဆေးခန်းလည်း အလှမ်းဝေးကြတယ်။ ဒီဘက်ဒေသမှာ ဆေးကုပေးဖို့အတွက် ရပ်/ကျေးအပါအဝင် အားလုံးက ဝိုင်းဝန်းပြီး တက်တက်ကြွကြွ ကူညီကြလို့ လူနာဒီလောက်များများ လာကုသနိုင်တာပါ”ဟု ကျိုင်းတုံမှ ပြည်နယ်လွှတ်တော်ကိုယ်စားလှယ် ဒေါက်တာဝဏ္ဏစိုးက တာချီလိတ်သတင်းအေဂျင်စီသို့ ပြောသည်။

ဝေးလံခေါင်းပါး၍ ခက်ခဲသောအရပ်ဒေသများသို့ နယ်လှည့်ဆေးကုသရေး အစီအစဉ်ကို ကျန်းမာရေးဝန်ကြီးဌာန၊ ကုသရေးဦးစီးဌာန၊ သွားခံတွင်းဌာန ညွှန်ကြားရေးမှူး ဒေါက်တာခင်မောင်၊ မြန်မာနိုင်ငံသွားနှင့်ခံတွင်းဆိုင်ရာ ဆေးကောင်စီမှ ပါမောက္ခဒေါက်တာပိုင်စိုး၊ ဒေါက်တာမျိုးသန့်၊ ဒေါက်တာလှမြင့်ဦး၊ အတိုင်ပင်ခံသင်ကြားရေး မေးရိုးခံတွင်း ခွဲစိတ်ပါရဂူဒေါက်ဇော်ဝင်းထွန်းတို့ ဦးဆောင်၍ သွားကျန်းမာရေးပညာဌာနမှ သွားရာဝန်များနှင့် ရန်ကုန်၊ မန္တလေး၊ နေပြည်တော်မှ သွားဆရာဝန်များ၊ သွားတုလုပ်ငန်းကျွမ်းကျင်သူများ၊ သူနာပြုအကူ စုစုပေါင်း (၄၅)ဦးတို့က ဆောင်ရွက်ခြင်းဖြစ်ပြီး ကုန်ကျစရိတ်ကို Htoo Foundation ၊ AGD Bank၊ FNI တို့၏ ဥက္ကဌ ဦးတေဇ (၅၄)နှစ်မြောက် မွေးနေ့အထိမ်းအမှတ်အဖြစ် ထောက်ပံ့ပေးခြင်းဖြစ်ကြောင်း သိရသည်။

"အဖိုးတို့က ပိုက်ဆံလည်းမတတ်နိုင်တော့ ရွာမှာပိုက်ဆံတတ်နိုင်သူအချို့ သွားတွေတပ်ပြီး  စားနေဝါးနေတာတွေ့ရတယ်။ သူတို့ရီရင်မောရင်စကားပြောရင်လည်း လွတ်လွတ်လပ်လပ် သွားတွေပေါ်အောင် ပြောဆိုနေတာတွေ့တော့အရမ်းတပ်ချင်ခဲ့တယ်"ဟု အံကပ်တစ်စုံရရှိသွားသည့် အဖိုးအိုတစ်ဦးက ပြောသည်။

လာရောက်ပြသသည့် လူနာ (၂၇၀)ကျော်ကို သွားနှုတ်ခြင်း၊ ရောင်ခြည်ဖြင့် သွားဖာထေးကုသခြင်း၊ ကျောက်ခြစ်ခြင်း၊ သွားဖုံးရောဂါကုသခြင်း၊ မေးရိုးကျိုးလူနာ(၁)ဦးနှင့် မေးရိုးအထူးခွဲစိတ်လူနာ(၁)ဦးတို့ကို ကုသပေးခဲ့သည့်အပြင် သွားလုံးဝမရှိသူ (၂၇)ဦးကိုပါ အပေါ်အောက် အံကပ်အစုံ (၂၇)စုံ စီစဉ်ပေးခဲ့ကြောင်း သိရသည်။

"အဖွားက သွားတပ်လိုက်မှ ကိုယ့်ရုပ်က (၂၀)လောက် ပြန်ငယ်သွားတယ်”ဟု အံကပ်တစ်စုံရသွားသည့် အဖွားတစ်ဦးက ပြောသည်။

အဆိုပါ နယ်လှည့်ကုသရေးအဖွဲ့ ကုသမှုကာလအတွင်း နေထိုင်စားသောက်ရေးကို မြို့နယ်အုပ်ချုပ်ရေးမှူး ဦးတင်မြင့်၊ ကျိုင်းတုံ သွားဆရာဝန်အသင်းခွဲဥက္ကဌ ဒေါက်တာစိုပြေဝင်းနှင့် အသင်းသူ၊ အသင်းသားများ၊ Oasis music band မှ ဆရာသနိုးထူး၊ ရပ်ကျေးအုပ်ချုပ်ရေးမှူးများ၊ လားဟူနှစ်ချင်းအဖွဲ့ချုပ်၊ ပန်လေအသင်းတော်နှင့် လက်တင်ရဆရာတော် ဆရာတော်ဂျက်ကော့ပန်းနှင့်ဇနီးတို့က စီစဉ်ပေးကြပြီး လားဟူတိုင်းရင်းသားရေးရာဝန်ကြီးကလည်း အလှူငွေကျပ် (၃၀၀၀၀၀) ပေးလှူကြောင်း သိရသည်။
Tachileik News Agency
ဓါတ်ပုံ #ဒေါက်တာဝဏ္ဏစိုး