~~~~~~~~⊰❂ unicode ❂⊱~~~~~~~~

ဓာတ်စာ၊ ဖြည့်စွက်စာများ၏ ကြော်ငြာများကို FDA တင်ပြပြီးမှ အသုံးပြုရမည်
*************
ဓာတ်စာ၊ ဖြည့်စွက်စာများ၏ကြော်ငြာများကို အစားအသောက်နှင့် ဆေးဝါးကွပ်ကဲရေးဦးစီးဌာန(FDA)မှ စိစစ်ခွင့်ပြုချက်တင်ပြရယူပြီး ခွင့်ပြုထားသည့် ကြော်ငြာကိုသာ အသုံးပြုရန်နှင့် လိုက်နာခြင်းမရှိပါက တည်ဆဲဥပဒေများအရ အရေးယူမည်ဖြစ်ကြောင်း FDA က အသိပေးကြေညာထားသည်။

လက်ကမ်းစာစောင်၊ လူမှုကွန်ရက်အမျိုးမျိုးအပါအဝင် နည်းလမ်းမျိုးစုံဖြင့် အသုံးပြုသည့်ကြေငြာများကို FDA ကိုတင်ပြပြီး စိစစ်ခွင့်ပြုချက်လိုအပ်ခြင်းဖြစ်ပြီး အဆိုပါကုန်ပစ္စည်းများ တင်သွင်းခွင့်အတွက် သွင်းကုန်လိုင်စင် လျှောက်ထားရန် FDA က စိစစ်ထုတ်ပေးသည့် ထောက်ခံချက် (Import Recommendation) သည် သွင်းကုန်လိုင်စင်လျှောက်ထားနိုင်ရန်အတွက်သာ ထုတ်ပေးခြင်းဖြစ်၍ အဆိုပါ ကုန်ပစ္စည်းများအတွက် ထုတ်ပေးထားသကဲ့သို့ ထင်ယောင်ထင်မှား အသုံးပြုခွင့်မရှိကြောင်းကိုလည်း တားမြစ်ထားသည်။

“သွင်းကုန်လိုင်စင်လျှောက်ထားဖို့အတွက်ကို ထောက်ခံပါတယ်ဆိုတာ ထောက်ခံချက် (Import Recommendation) ပေးလိုက်တာက သူတို့ကို (ကုန်ပစ္စည်းတင်သွင်းသူ) register လုပ်ထားတဲ့အနေနဲ့သာ ပေးထားတာဖြစ်ပြီး သွင်းကုန်ကျန်းမာရေးထောက်ခံချက် (Import Health Certificate) ကသာလျှင် အစားအသောက်အရည်အသွေးအတွက် ထောက်ခံတာဖြစ်ပါတယ်”ဟု ရှမ်းပြည်နယ် အစားအသောက်နှင့် ဆေးဝါးကွပ်ကဲရေးဦးစီးဌာန၊ အစားအသောက်ဌာနခွဲ ဒုကြီးကြပ်ရေးမှူး ဦးစည်သူစိုးက တာချီလိတ်သတင်းအေဂျင်စီသို့ ပြောသည်။

ပြည်ပမှ အစားအသောက်၊ဖြည့်စွက်စာစသည်တို့ကို တင်သွင်းခွင့် သွင်းကုန်လိုင်စင်လျှောက်ထားရာတွင် FDA က စစ်ဆေးပြီးထုတ်ပေးလိုက်သည့် ထောက်ခံချက် (IR)မှာ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၌ သွင်းကုန်လိုင်စင် လျှောက်ထားခြင်းအတွက်သာဖြစ်ပြီး တင်သွင်းလာသည့်ပစ္စည်းများကို တင်သွင်းသည့်အကြိမ်တိုင်း ထပ်မံအစစ်ဆေးခံကာ FDA ထောက်ခံချက်ရယူရန်လိုအပ်ကြောင်း သိရသည်။
“ကုန်ပစ္စည်းတစ်ခုကို မြန်မာပြည်တွင်း တင်သွင်းတော့မယ်ဆိုရင် ကနဦးအနေနဲ့ စီးပွားကူးသန်းကနေ သွင်းကုန်လိုင်စင်လျှောက်ရတယ်။ အဲဒီလိုလျှောက်ဖို့အတွက်ကို သူတို့တင်သွင်းတဲ့အစားအသောက်က ဘေးအန္တရာယ်ကင်းရှင်းတယ်ဆိုတာ ထောက်ခံချက်ပေးလိုက်တာ။ အဲဒီထောက်ခံချက်ရပြီးသွားရင် ဥပမာ ယိုးဒယားကနေ ဂျယ်လီနဲ့ အချိုရည်တင်သွင်းမယ်ဆိုပါစို့။ သွင်းကုန်လိုင်စင်လျှောက်ထားခြင်းအတွက် ထောက်ခံချက်(IR) ကို အရင်လျှောက်ရတယ်။ တင်သွင်းခွင့်လိုင်စင်ကို IR နဲ့တွဲတင်ရတယ်။ ပြီးသွားရင် တင်သွင်းလာတဲ့ကုန်ပစ္စည်းတွေအတွက် သွင်းကုန်ကျန်းမာရေးထောက်ခံချက် (Import Health Certificate -IHC) ဆိုတာ ထပ်ယူရတယ်။ သွင်းကုန်ကျန်းမာရေးထောက်ခံချက်က သူတို့အနေနဲ့ တင်သွင်းရတဲ့ပစ္စည်းကို ကားတစ်စီးစာ သယ်လာတယ်ဆို အဲဒီတစ်စီးစာကိုပဲ IHC ပေးတာ။ နောက်တစ်ခါတင်သွင်းချင်ရင် နောက်ထပ် ထပ်လျှောက်ရတယ်။ လျှောက်ထားချိန် ပျမ်းမျှတစ်လကြာပါတယ်”ဟု ရှမ်းပြည်နယ် အစားအသောက်နှင့် ဆေးဝါးကွပ်ကဲရေးဦးစီးဌာန၊ အစားအသောက်ဌာနခွဲ ဒုကြီးကြပ်ရေးမှူး ဦးစည်သူစိုးက ပြောသည်။

တင်သွင်းခွင့်ထောက်ခံချက်(IR) ထုတ်ပေးခြင်းသည် ရည်ညွှန်းကုန်ပစ္စည်း၏ ဘေးအန္တရာယ်ကင်းရှင်းမှုနှင့် အာနိသင်ထိရောက်မှုကို အလုံးစုံ အာမခံပေးခြင်းမဟုတ်သဖြင့် ယင်းသို့ ထင်မှတ်စေသော ရေးသားချက်၊ ဖော်ပြချက်များနှင့် ဖြည့်စွက်စာ၊ဖြည့်စွက်အဟာရများသည် ကျန်းမာရေးအထောက်အကူပြု အစားအသောက်များသာ ဖြစ်သည့်အတွက် ရောဂါအခြေအနေတစ်စုံတစ်ရာကို ကုသ၊ ပျောက်ကင်း၊ သက်သာစေနိုင်သည်ဟု ညွှန်းဆိုဖော်ပြ ကြော်ငြာရောင်းချခြင်းများကိုလည်း FDA က တားမြစ်လိုက်သည်။
Tachileik News Agency