~~~~~~~~⊰❂ unicode ❂⊱~~~~~~~~

 မိုင်းဆတ်မြို့တွင် ယခင်နှစ်အမြင့်ဆုံးမိုးရေချိန်ထက် (၁)လက်မကျော်ပိုသဖြင့် တစ်ရက်အတွင်း လူနေအိမ် (၁၇၀)ကျော်နှင့် လယ်မြေဧက(၃၀)ကျော် ရေနစ်မြုပ်
*************
ရှမ်းပြည်နယ်(အရှေ့ပိုင်း) မိုင်းဆတ်မြို့၌ ၂၀၁၈ ခုနှစ်၊ သြဂုတ်လ (၂၃)ရက်နေ့က မိုးရေချိန် (၃.၅၈)လက်မ ရွာသွန်းရာ ယခင်နှစ် အမြင့်ဆုံးမိုးရေချိန်ထက် (၁.၀၂)လက်မပိုခဲ့ပြီး တောင်ကျရေကြောင့် လူနေအိမ် (၁၇၀)ကျော်နှင့် လယ်မြေဧက(၃၀)ကျော် ရေနစ်မြုပ်သွားကြောင်း သိရသည်။

သြဂုတ်လ (၂၃) ရက်နေ့ နံနက်အစောပိုင်းက မိုးသည်းထန်စွာရွာသွန်းပြီး တောင်ကျရေများစီးဆင်းလာရာ နံနက် (၆ )နာရီခန့်က ဟိုနားကျေးရွာရှိ မိုင်းဆတ်-မိုင်းခုတ်လမ်းရေကျော်သွားကာ လူနေအိမ်(၂)လုံးရေနှစ်မြုပ်ပြီး ခြံစည်းရိုး အုတ်တံတိုင်းပေ(၄၀)ခန့်ပြိုကျပျက်စီးခြင်း၊ နံနက် (၈) နာရီခန့်က မယ်ဆွမ်တောင်ချောင်းရေမြင့်တက် လာမှုကြောင့် မယ်ဆွမ်တောင်ရပ်ကွက်၊ နောင်ဟီးရပ်အတွင်းရှိ လူနေအိမ်(၁၅၀)ခန့်မှာ နည်းဆုံး(၁)ပေမှ အများဆုံး (၂)ပေခွဲခန့်ထိ ရေနှစ်မြုပ်မှုဖြစ်ပွားခြင်းနှင့် နံနက် (၁၁) နာရီခွဲခန့်က မယ်ဆတ်ချောင်း တောင်ကျရေ စီးဆင်းမှုကြောင့် မယ်ဆွမ်မြောက်ရပ်ကွက်အတွင်းရှိ လူနေအိမ်နှင့် ဌာနဆိုင်ရာရုံး(၂၀)ခန့်မှာ ရေဝင်ရောက်ဖြစ်ပွားခြင်းနှင့် ဆိုက်ခေါင်ကျေးရွာရှိ လယ်မြေဧက(၃၀)ကျော်ရေနှစ်မြုပ်သွားခြင်းဖြစ်ကြောင်း သိရသည်။

အဆိုပါ ရေနှစ်မြုပ်သည့် လူနေအိမ်များသို့ ခရိုင်စီမံခန့်ခွဲမှုကော်မတီဥက္ကဌ ဦးနေမျိုးအောင်နှင့် ခေတ္တ မြို့နယ်စီမံခန့်ခွဲမှုကော်မတီဥက္ကဌ မြို့နယ်ရဲတပ်ဖွဲ့မှူး ရဲမှူးအောင်နိုင်ရွှေ ဦးဆောင်သော ရဲတပ်ဖွဲ့ဝင်များ၊ မီးသတ် တပ်ဖွဲ့ဝင်များနှင့် ဌာနဆိုင်ရာဝန်ထမ်းများက ကူညီကယ်ဆယ်ရေးလုပ်ငန်းများဆောင်ရွက်ပေးပြီး ရေနှင့်စား သောက်ဖွယ်ရာများ ပေးပို့ထားကြောင်း သိရသည်။ 

သတင်း၊ဓါတ်ပုံ #သန်းဇော်