~~~~~~~~⊰❂ unicode ❂⊱~~~~~~~~

“လာစစ်ဆေးတဲ့ အဖွဲ့က တွေ့ရှိချက်နဲ့ အကြံပြုချက်တွေ တင်လိုက်တဲ့အပေါ်မှာ ပြည်နယ်အစိုးရက အရေးယူတာကိုး။ အဲဒီလို အရေးယူတဲ့ အခါမှာ အရင်ကွာဟတဲ့ ငွေနဲ့ပတ်သက်လို့ ပြန်သွင်းဖို့ဆိုတာ မပါဘူး။ မပါဘဲနဲ့ အဲဒီအမှန်တကယ်သတ်ဖြတ်နေတဲ့ အကောင်ရေကို ဖော်ထုတ်တင်ပြဆောင်ရွက်ရန်ဆိုလို့ အဲဒီအတိုင်း ဆောင်ရွက်ပြီးဖြစ်ပါတယ်။ အရင် ငွေသိန်းထောင်ချီကွာဟတယ် ဆိုတာကို ပြန်သွင်းဖို့ဆိုတာ မပါဘူးခင်ဗျ။ ညွှန်ကြားချက် မပါတဲ့အတွက် အဲဒီဟာကို ဆောင်ရွက်ထားခြင်း မရှိပါဘူး။ လက်ရှိမြပြေင်မှာ သတ်တဲ့ကောင်ရေကို အနီးစပ်ဆုံးဖြစ်အောင် စိစစ်ပြီး ငွေစာရင်းမှာ ဝင်အောင် လက်ရှိမှာ ကျွန်တော်တို့ ဆောင်ရွက်နေပါတယ်”ဟု ကျိုင်းတုံမြို့နယ် စည်ပင်သာယာရေးဌာန အမှုဆောင်အရာရှိ ဦးမျိုးမြင့်အောင်က တာချီလိတ်သတင်းအေဂျင်စီသို့ ပြောသည်။

စည်ပင်ကော်မတီ၏ တင်ပြချက်အရ ဝက်သားသတ်လိုင်စင်မှ ငွေကျပ်သိန်းထောင်ချီ ကွာဟနေသည့် ကိစ္စအား ခုံရုံးဖွဲ့စစ်ဆေးရန် ၂၀၁၇ ခုနှစ်၊ သြဂုတ်လ(၂၂)ရက်နေ့တွင် ရှမ်းပြည်နယ်ဝန်ကြီးချုပ်က ညွှန်ကြားခဲ့ခြင်း ဖြစ်ကြောင်း သိရသည်။

“ကျွန်တော်တို့ ကျိုင်းတုံမှာက ဘတ်ဂျတ်က အရမ်းနည်းတဲ့ အချိန်မှာ အဲဒီပိုက်ဆံကွာဟနေတဲ့ ကိစ္စကို ပြန်ယူမယ်ဆိုရင် လမ်းတစ်လမ်းတော့ ရနိုင်မယ်ပေါ့နော်။ အဲဒီတော့ သမ္မတဦးထင်ကျော်လက်ထက်မှာ ကျွန်တော်တို့ စာတင်ခဲ့ပါတယ်။ ဒီတော့ ရှမ်းပြည်နယ်ဝန်ကြီးချုပ်ကနေ ခုံရုံးဖွဲ့ပြီးစစ်ဆေးဖို့ ခရိုင်မင်းကြီးကို ညွှန်ကြားခဲ့ပါတယ်။ စစ်ဆေးတဲ့အခါမှာ တစ်ကယ်လည်း ကွာဟနေတဲ့အတွက် ဝန်ထမ်းကို အရေးယူတယ်လို့တော့ ကြားတယ်”ဟု ကျိုင်းတုံမြို့နယ်စည်ပင်သာယာရေးကော်မတီဝင် ဦးစိုင်းလုံခမ်းက ဆိုသည်။

စည်ပင်ဘတ်ဂျက် နည်းနေသဖြင့် ဝက်သားသတ် လိုင်စင်လုပ်ငန်းမှ ကွာဟနေသည့် ငွေပမာဏကို စည်ပင်ဘတ်ဂျက်တွင် ပြန်လည် ထည့်သွင်းနို်င်ရေး အတွက် ရွေးကောက်တင်မြှောက်ခံရသည့် အဖွဲ့ဝင်(၄)ဦး ပါသည့် စည်ပင်သာယာရေးကော်မတီက တင်ပြခဲ့ခြင်းဖြစ်သော်လည်း ကွာဟနေသည့် ငွေပမာဏကို စည်ပင်ဘတ်ဂျက်တွင် ပြည်လည်ထည့်သွင်းရန် ညွှန်ကြားထားခြင်းမရှိကြောင်း သိရသည်။

ယင်းကဲ့သို့ ငွေကြေးကွာဟမှုမှာ ယခင်က သားသတ်လုပ်ငန်းများက အမှန်တကယ်ထုတ်လုပ်သည့် ကောင်ရေ စာရင်းအတိုင်း ကွင်းဆင်း စိစစ်ကောက်ခံခဲ့ခြင်း မဟုတ်ဘဲ အဆိုပါလုပ်ငန်းများက ထုတ်လုပ်မည်ဟု တင်ပြသည့် အကောင်ရေစာရင်းအတိုင်းသာ အခွန်ကောက်ခံခဲ့ခြင်းကြောင့်ဖြစ်ကြောင်း သိရသည်။

“အဲဒီမှာ ကွာဟတယ်ဆိုတာ အရင်ကတော့ လိုင်စင်စီ သားသတ်လုပ်ငန်းရှင်တွေကို သူတို့သတ်တဲ့ အကောင်ရေ စာရင်း တောင်းတယ်။ အဲဒီအတိုင်းကို ကျွန်တော်တို့က ပြည်နယ်အထိ တင်ပြအတည်ပြုချက် ယူတယ်။ အဲဒီအတိုင်းကို ကျွန်တော်တို့ကို ငွေစာရင်းမှာဝင်အောင် ဆောင်ရွက်တယ်။ သူတို့ အပြင်မှာ ခိုးသတ်နေတာတို့၊ ပိုသတ်နေတာတို့ ရှိတာပေါ့။ အဲဒီဟာတွေက ကျွန်တော်တို့ဆီကို မဝင်ဘူး။ ကျွန်တော်တို့ကလည်း ဝန်ထမ်း အင်အားအရ အဲဒီလောက်အထိ လိုက်မစစ်နိုင်ဘူး။ စာရင်းအရ အကောင်ရေအလိုက် ငွေစာရင်းမှာ ဝင်အောင်ကို ကြိုးစားဆောင်ရွက်ရတာပါ”ဟု ကျိုင်းတုံမြို့နယ် စည်ပင်သာယာရေးဌာန အမှုဆောင်အရာရှိ ဦးမျိုးမြင့်အောင်က ယခင်က လိုင်စင်စီများထံမှ အခွန်ကောက်ခံသည့် အခြေအနေကို ရှင်းပြသည်။

အဆိုပါ ငွေကြေး ကွာဟမှုကြောင့် ဝက်သားသတ်လုပ်ငန်း လိုင်စင်တာဝန်ယူရသည့် ဝန်ထမ်းကို အခြားရာထူး တာဝန်သို့ ပြောင်းရွှေ့ခြင်း အပြင် ပြည်နယ်သို့တွဲ၍ တာဝန်ထမ်းဆောင်စခြေင်းဖြင့် အရေးယူ ထားကြောင်း သိရသည်။

ယခင်က ဝက်သားသတ်လုပ်ငန်းက တစ်ရက်လျှင် ဝက်(၃၂)ကောင်နှုန်းသာ စာရင်းဝင်သော်လည်း စုံစမ်းစစ်ဆေးပြီးနောက်ပို်င်းတွင် တစ်ရက်လျှင် ဝက်(၄၆)ကောင်အထိ စာရင်းဝင်လာကြောင်း စည်ပင်သာယာရေးကော်မတီထံမှ သိရသည်။

Tachileik News Agency