~~~~~~~~⊰❂ unicode ❂⊱~~~~~~~~

ဓါးထိုးမှုဖြင့် အမှုဖွင့်ခံထားရသူကို မိုင်းလား အထူးဒေသ(၄)အဖွဲ့က မိုင်းယုနယ်မြေရဲတပ်ဖွဲ့သို့ လွှဲပြောင်းပေး
*********
ရှမ်းပြည်နယ်(အရှေ့ပိုင်း) တာချီလိတ်ခရိုင်၊ မိုင်းယုမြို့တစ်ဖက်ကမ်း မိုင်းလား အထူးဒေသ(၄)နယ်မြေရှိ ငှက်ပျောခြံတွင် စက်တင်ဘာလ(၉)ရက်နေ့က အရက်အတူသောက်ရင်း သူငယ်ချင်းဖြစ်သူအား ဓါးဖြင့် ထိုးမှုဖြင့် အမှုဖွင့်ခံထားရသူကို မိုင်းလား အထူးဒေသ(၄) အဖွဲ့က မိုင်းယုနယ်မြေရဲစခန်းသို့ ၂၀၁၈ ခုနှစ် စက်တင်ဘာလ (၁၂)ရက်နေ့တွင် လွှဲပြောင်းပေးလိုက်ကြောင်း သိရသည်။

မိုင်းယုမြို့တစ်ဖက်ကမ်း မိုင်းလား အထူးဒေသ(၄)နယ်မြေရှိ နမ့်ပန်ဒေသ ဝမ်ဖြတ်ကျေးရွာအနီး ငှက်ပျောခြံတွင် ၂၀၁၈ ခုနှစ်၊ စက်တင်ဘာလ (၉)ရက်နေ့ နေ့လယ်(၁)နာရီဝန်းကျင်က ခြံလုပ်သားများဖြစ်သည့် သက်နိုင်ဝင်းနှင့် ဇော်ကြီးတို့ အရက်အတူသောက်နေရင်း ခိုက်ရန်ဖြစ်ပွားပြီး ဇော်ကြီးက သက်နိုင်ဝင်းအား ကြက်သွန်လှီးဓါးဖြင့် ဝမ်းဗိုက်ကို တစ်ချက်ထိုးသွင်းလိုက်ခြင်းဖြစ်ကြောင်း သိရသည်။

သက်နိုင်ဝင်းမှာ ဒဏ်ရာပြင်းထန်သဖြင့် မိုင်းယုဆေးရုံမှတစ်ဆင့် ကျိုင်းတုံပြည်သူ့ဆေးရုံသို့ လွှဲပြောင်း ကုသပေးထားရပြီး အဆိုပါ ဓါးထိုးမှုကို မိုင်းယုနယ်မြေရဲစခန်းတွင် (ပ)၁/၂၀၁၈၊ ရာဇသတ်ကြီးပုဒ်မ ၃၂၆ ဖြင့် အမှုဖွင့်ထားခြင်းဖြစ်ကြောင်း သိရသည်။

ဓါးထိုးမှုဖြင့် အမှုဖွင့်ခံထားရသည့် ဇော်ကြီးအား မိုင်းလား အထူးဒေသ(၄)အဖွဲ့မှ ဒုဆက်ဆံရေးမှူး လော်ဂျီနှင့်အဖွဲ့က မိုင်းယု - ကျိန်းယဲန်းတံတားတွင် စက်တင်ဘာလ(၁၂)ရက်နေ့ ညနေ(၄)နာရီကျော်၌ လာရောက်လွှဲပြောင်းပေးရာ မိုင်းယုမြို့အုပ်ချုပ်ရေးမှူး ဦးကျော်စွာနှင့် မိုင်းယုနယ်မြေစခန်းမှူး ရဲအုပ် ဟိန်းဝဏ္ဏမောင်တို့ ဦးဆောင်သည့်အဖွဲ့က လွှဲပြောင်းလက်ခံခဲ့ခြင်းဖြစ်ကြောင်း သိရသည်။

သတင်း #ကိုကိုနိုင်(MYU)
ဓါတ်ပုံ -ရဲတပ်ဖွဲ့