~~~~~~~~⊰❂ unicode ❂⊱~~~~~~~~

ရွှေတိဂုံစေတီတော် ရွှေသင်္ကန်းကပ်လှူသည့်ကိစ္စနှင့်ပတ်သက်၍ သာသနာရေးနှင့် ယဉ်ကျေးမှုဝန်ကြီးဌာနက ရှင်းလင်းချက်ထုတ်ပြန်
*************
ရန်ကုန်မြို့ရှိ ရွှေတိဂုံစေတီတော် ရွှေသင်္ကန်းကပ်လှူမည့်ကိစ္စနှင့်ပတ်သက်၍ လူမှုကွန်ရက်စာမျက်နှာတွင် အယူအဆမျိုးစုံဖြင့် မဟုတ်မမှန်လုပ်ကြံရေးသားဖေါ်ပြမှုများသည် အများပြည်သူ ထင်ယောင်ထင်မှားဖြစ်စေပြီး ပြည်တွင်းရေး မငြိမ်မသက်ဖြစ်စေနိုင်ကြောင်း သာသနာရေးနှင့် ယဉ်ကျေးမှုဝန်ကြီးဌာနက ၂၀၁၈ ခုနှစ်၊ စက်တင်ဘာလ(၁၃)ရက်နေ့တွင် သတင်းထုတ်ပြန်ချက်တွင် ဖေါ်ပြလိုက်သည်။

စေတီတော်၏ ကြာမှောက်၊ ကြာလှန် မဲနေသည့်ဧရိယာမှ ရွှေစင်ပြားသင်္ကန်း (၁၀)ချပ်ခွာ၍ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ရွှေပန်းတိမ်ပညာရှင်များ၊ တီထွင်ဆန်းသစ်မှုဦးစီးဌာနမှ ပညာရှင်များဖြင့် စစ်ဆေးနေခြင်းသာဖြစ်ပြီး စေတီတော်တစ်ဆူလုံးမှ ရွှေသင်္ကန်းအား ခွာယူစစ်ဆေးခြင်း မဟုတ်ကြောင်း သိရသည်။

ဆက်လက်လှူဒါန်းမှုများတွင် လက်ရှိလှူဒါန်းနေသည့် ရွှေစင်ပြား (gold coating)များအစား စေတီတော်အား ရွှေသင်္ကန်းကပ်လှူသည့် အလှူရှင်များ လှူဒါန်းလိုသည့်အတိုင်း ရွှေစင်ရွှေပြားအစစ်၊ ရွှေမျက်ပါး၊ရွှေဆိုင်း၊ ရွှေသင်္ကန်းအစစ်များဖြင့်သာ ကပ်လှူသွားကြရန် ဂေါပကအဖွဲ့အား ညွှန်ကြားထားခြင်းသာဖြစ်ကြောင်း သိရသည်။

Tachileik News Agency