~~~~~~~~⊰❂ unicode ❂⊱~~~~~~~~

“ယာဉ်မှတ်ပုံတင်ထုတ်ပေးခြင်းကို ရုံးဖွင့်ရက်တွေမှာ ကညနရုံးဝင်းမှာပဲ ရုံးချိန်အတွင်း လုပ်ပေးသွားပါမယ်။ ကညနရုံး မရှိတဲ့ ဒေသတွေ ဥပမာ မိုင်းဆတ်တို့၊ မိုင်းဖြတ်တို့လို ဒေသမှာ ယာဉ်မှတ်ပုံတင် လုပ်ချင်သူတွေများ နေတယ်ဆိုရင် ရုံးပိတ်ရက်တွေအတွင်း သက်ဆိုင်ရာ မြို့နယ်အုပ်ချုပ်ရေးရုံးတွေမှာ သွားလုပ်ပေးမှာ ဖြစ်ပါတယ်။ ကျွန်တော်တို့တွေ ယာဉ်မှတ်ပုံတင် လာလုပ်ပေးနိုင်တယ်ဆိုတာကိုလည်း မြို့နယ်ထွေအုပ်တွေကို စာထွက်ပြီး ဖြစ်ပါတယ်”ဟု တာချီလိတ်ခရိုင် ကုန်းလမ်းပို့ဆောင်ရေး ညွှန်ကြားမှုဦးစီးဌာနမှ ခရိုင်ဦးစီးမှူး ဦးစိုင်းလုံကျောက်က တာချီလိတ်သတင်းအေဂျင်စီသို့ ပြောသည်။

တာချီလိတ်ခရိုင်အတွင်းရှိ အခြားမြို့များမှ ယာဉ်မှတ်ပုံတင်ဆောင်ရွက် လိုသူများရှိပါက သက်ဆိုင်ရာ မြို့နယ်အုပ်ချုပ်ရေးမှူးရုံးများတွင် ရုံးပိတ်ရက်များ၌ ဆောင်ရွက်ပေးသွားမည်ဖြစ်ပြီး ယာဉ်မှတ်ပုံတင် ဆောင်ရွက်လိုသူများ အနဖြေင့် နိုင်ငံသားစိစစ်ရေးကတ်၊ နေရပ်လိပ်စာ မှန်ကန်စေရေးအတွက် အိမ်ထောင်စု မူရင်း (ပုံစံ-၁၀)မူရင်း မိတ္တူ၊ ကျေးရွာရပ်ကွက်တွင်နေထိုင်ကြောင်း အုပ်ချုပ်ရေးမှူး ထောက်ခံစာ မူရင်းတို့ ယူဆောင်လာရန်လိုအပ်ကြောင်း သိရသည်။

သုံးဘီးမော်တော်ယာဉ်များအား မှတ်ပုံတင်ပေးခြင်း စီမံချက်ပြီးပါက မှတ်ပုံတင်မဲ့ မော်တော်ယာဉ်များ ဆက်လက် အသုံးပြုသည်ကို တွေ့ရပါက ယာဉ်အား နိုင်ငံတော်ဘဏ္ဍာအဖြစ် သိမ်းဆည်း သွားမည်ဖြစ်ကြောင်း သိရသည်။

မှတ်ပုံတင်ဆောင်ရွက်ပေးမည့် စီမံချက်တွင် ၂၀၀၈ ခုနှစ်နှင့်အထက် မော်ဒယ်များကိုသာ ဆောင်ရွက် ပေးမည်ဖြစ်ပြီး အိုမင်းဟောင်းနွမ်းများ၊ လူစီးသုံးဘီးမော်တော်ယာဉ်များ၊ ဆိုင်ကယ်ဘေးတွဲများ၊ တောတွင်းနှင့် ကမ်းစပ်သုံးသည့် လေးဘီးပါမော်တော်ဆိုင်ကယ်များ၊ မှတ်ပုံတင်ထားပြီး သက်တမ်း (၅)နှစ်ကျော်ပြတ်နေသော သုံးဘီးဆိုင်ကယ်များကို မှတ်ပုံတင်ဆောင်ရွက်ပေးမည်မဟုတ်ကြောင်း သိရသည်။

သုံးဘီးမော်တော်ယာဉ်များအား စီမံချက်ဖြင့် မှတ်ပုံတင်ပေးခြင်းကို ၂၀၁၀ ခုနှစ်၊ ၂၀၁၂ ခုနှစ်နှင့် ၂၀၁၄ ခုနှစ်များတွင် ဆောင်ရွက်ပေးခဲ့ခြင်းဖြစ်ကြောင်း သိရသည်။

ယာဉ်မှတ်ပုံတင်ရာတွင် ကုန်းလမ်းပို့ဆောင်ရေးညွှန်ကြားမှုဦးစီးဌာန၊ မြန်မာ့အာမခံလုပ်ငန်း၊ မြန်မာ့စီးပွားရေးဘဏ်တို့သို့ ပေးသွင်းရမည့် စုစုပေါင်းကုန်ကျစရိတ်မှာ သုံးဘီးဆိုင်ကယ်တစ်စီးလျှင် စုစုပေါင်း ကျပ်(၄၁,၃၅၀)၊ လျှပ်စစ်သုံးဘီးဆိုင်ကယ် တစ်စီးလျှင် ကျပ်(၄၅,၃၅၀)စီနှင့် အကောက်ခွန် စည်းကြပ်နှုန်းထားတို့ ပေးသွင်းရမည်ဖြစ်ကြောင်း သိရသည်။

သတင်း - ဆန်းဖြိုးထွန်း