~~~~~~~~⊰❂ unicode ❂⊱~~~~~~~~

"မိုင်းဆတ် - တာချီလိတ်ကားလမ်းလွှဲပြောင်း လက်ခံနိုင်ရေးက ဆွေးနွေးညှိနှိုင်းနေဆဲဖြစ်ပါတယ်။ အခုလမ်းက ဆိုးရွားစွာ ပျက်စီးနေတဲ့အတွက် လတ်တလော ခရီးသွားပြည်သူတွေ သွားလာမှု အဆင်ပြေအောင် ပြုပြင်ဆောင် ရွက်ဖို့ ညှိနှိုင်းဆွေးနွေးခဲ့ပါတယ်"ဟု မိုင်းဆတ်ခရိုင်အုပ်ချုပ်ရေးမှူး ဦးနေမျိုးအောင်က ပြောသည်။

တာချီလိတ် - မိုင်းဆတ်လမ်းပိုင်းမှာ စုစုပေါင်း (၆၀.၄)မိုင်ရှည်လျားပြီး ၁၉၉၂ ခုနှစ်တွင် "ဝ"အထူးဒေသ(၂) တောင်ပိုင်းက ဟုန်ပန်းကုမ္ပဏီဖြင့် ဖောက်လုပ်ခဲ့ကာ ယာဉ်ဖြတ်သန်းခ ကောက်ခံနခြေင်း ဖြစ်သော်လည်း လမ်းပို်င်း ပျက်စီးမှုကို ပြုပြင်နိုင်ခြင်း မရှိသဖြင့် ဆောက်လုပ်ရေးဝန်ကြီးဌာနသို့ လွှဲပြောင်းပေးရန် ၂၀၁၈ ခုနှစ်အတွင်း ဆွေးနွေးခဲ့ခြင်းဖြစ်သည်။

လက်ရှိအချိန်တွင် အဆိုပါ လမ်းပိုင်း၌ ချိုင့်လမ်းဘေးရှိ ခြုံနွယ်များကြောင့် မြင်ကွင်းမရှင်း၍ ယာဉ်တိမ်းမှောက်မှုနှင့် ယာဉ်တိုက်မှုအန္တရာယ် မဖြစ်စေရန် ဂရုစိုက်၍ မောင်းနှင်နေရသဖြင့် ယခင်က (၄) နာရီကျော်သာ မောင်းနှင်ရသည့်ခရီးကို ယခုအခါ (၇) နာရီခန့်အထိ မောင်းနှင်နေရသည့်အတွက် ဒေသခံပြည်သူများက အမြန်ဆုံးပြုပြင် ဆောင်ရွက်ပေးရန် မျှော်လင့်လျက်ရှိသည်။

အဆိုပါ ဆွေးနွေးပွဲသို့ ခရိုင်အုပ်ချုပ်ရေးမှူး ဦးနေမျိုးအောင်၊ ခရိုင်လမ်းဦးစီးဌာန၊ ခရိုင်နယ်စပ်ဒေသနှင့် တိုင်းရင်းသားလူမျိုးများဖွံ့ဖြိုးတိုးတက်ရေးဦးစီးဌာနတို့ပါဝင်သောအဖွဲ့နှင့် “ဝ”အထူးဒေသ(၂)မှ တပ်မဟာနိုင်ငံရေးမှူး ဦးအားဖူ ဦးဆောင်သော အဖွဲ့ဝင်(၈)ဦးတို့ တက်ရောက်ခဲ့ကြောင်း သိရသည်။

သတင်း/ဓာတ်ပုံ - သန်းဇော်ဦး