ထိုင်းနိုင်ငံ စမုစခွန်ခရိုင်၊ မဟာချိုင်တွင် ဗီဇာအတုဖြင့် တရားမဝင်လမ်းကြောင်းမှ ပို့ဆောင်ခံရသည့် မြန်မာလုပ်သား (၆၈)ဦးအနက် (၃၄)ဦးကို အလုပ်သမားသံအရာရှိရုံးနှင့် MWRNအဖွဲ့ ပူးပေါင်း ကယ်ထုတ်နိုင်ခဲ့ပြီး မြန်မာနိုင်ငံဘက်သို့ ပြန်လည် ပို့ဆောင်နိုင်ခဲ့သော်လည်း ကျန်လူများမှာ ဖမ်းဆီးထိန်းသိမ်းခံနေရကြောင်း သိရသည်။

မြန်မာလုပ်သား(၃၄)ဦးကို အလုပ်သမားသံအရာရှိရုံးနှင့် MWRNအဖွဲ့တို့က ၂၀၁၈ ခုနှစ်၊ နိုဝင်ဘာလ(၁၃)ရက် နေ့တွင် မြန်မာနိုင်ငံဘက်သို့ မြဝတီနယ်စပ်မှတစ်ဆင့် ပြန်လည်ပို့ဆောင်ပေးနိုင်ခဲ့ကြောင်း သိရပြီး ပွဲစားကိုလည်း ဖမ်းဆီးရမိထားကြောင်း သိရသည်။

အဆိုပါ မြန်မာလုပ်သားများကို ထိုင်းနိုင်ငံ စမုစခရိုင် ၊ မဟာချိုင်ရှိ ကော်ပစ္စည်းစက်ရုံတစ်ခုတွင် အလုပ်သွင်းပေးထားခြင်းဖြစ်ပြီး အလုပ်ဝင်ပြီးဒုတိယမြောက်နေ့တွင် ထိုင်းတာဝန်ရှိသူများက စက်ရုံအား ဝင်ရောက်စစ်ဆေးရာ ပွဲစားက အလုပ်သမားများကို တိမ်းရှောင်နေစေခဲ့ခြင်းဖြစ်ကြောင်း သိရသည်။

မြန်မာလုပ်သားများက အလုပ်သမားသံအရာရှိရုံးသို့ ဆက်သွယ်အကူအညီတောင်းသဖြင့် အဆိုပါနယ်မြေရှိ လူမှုကူညီရေးအဖွဲ့တစ်ခုဖြစ်သည့် MWRN နှင့်အတူ သွားရောက်စုံစမ်းရာ မြန်မာလုပ်သား (၁၃)ဦးကို တွေ့ရှိရသဖြင့် ၎င်းတို့၏ နေထိုင်ခွင့်ဆိုင်ရာအထောက်အထားများကို စစ်ဆေးရာ ဗီဇာအတုများဖြစ်သည်ကို စစ်ဆေးတွေ့ရှိရခြင်းဖြစ်ကြောင်း သိရသည်။
၎င်းတို့ (၆၈)ဦးကို ပွဲစားက ဗီဇာလုပ်ဆောင်ပေးပြီး ထားဝယ်မှတစ်ဆင့် ထိုင်းနိုင်ငံ မောတောင် - ပကျွတ်မြို့မှတစ်ဆင့် မဟာချိုင်သို့ ပို့ဆောင်ပေးထားခြင်းဖြစ်ကြောင်းနှင့် ၎င်းတို့နှင့်အတူလာသူများလည်း ရှိကြောင်း မြန်မာလုပ်သားများ၏ပြောကြားချက်အရ ဆက်လက်ဆက်သွယ်ရာ နောက်ထပ် မြန်မာလုပ်သား (၂၁)ဦးကို ထပ်မံကယ်ထုတ်နိုင်ခဲ့ခြင်းဖြစ်ကြောင်း သိရသည်။

အဆိုပါလုပ်သားများအား မြန်မာပြည်ပအလုပ်အကိုင်ဝန်ဆောင်မှုလုပ်ငန်းရှင်များအဖွဲ့ချုပ် (MOEAF)သို့
ခေါ်ယူခဲ့ကာ ထိုင်းနိုင်ငံလူဝင်မှုကြီးကြပ်ရေးဦးစီးဌာနနှင့် ညှိနှိုင်းပြီး မြန်မာနိုင်ငံသို့ ပို့ဆောင်ပေးခဲ့ခြင်းဖြစ်ကြောင်း သိရသည်။

ပွဲစားက အလုပ်သမားတစ်ဦးလျှင် မြန်မာငွေကျပ်ငွေ (၇)သိန်းခွဲ၊ ဘတ်(၂၀၀၀)စီတောင်းခံပြီး တရားမဝင်ပို့ဆောင်ခဲ့ခြင်းဖြစ်ကြောင်း သိရသည်။

ထိုင်းနိုင်ငံလူဝင်မှုကြီးကြပ်ရေးဥပဒေအရ စာရွက်စာတမ်းအတုပြုလုပ်သူများအား ထောင်ဒဏ်တစ်နှစ်အထက်၊ စာရွက်စာတမ်းအတုကိုင်ဆောင်ပါက ထောင်ဒဏ် (၆) လအထိကျခံရမည်ဖြစ်ပြီး ထိုင်းနိုင်ငံသို့ အကြောင်းအမျိုးမျိုးဖြင့်ရောက်ရှိလာပြီး ဗီဇာ၊ ပတ်စပို့အတုဖြင့် အခက်အခဲရှိနေသူများရှိပါက ဘန်ကောက်မြို့ရှိ မြန်မာအလုပ်သမားသံအရာရှိရုံးသို့ ဆက်သွယ်အကူအညီတောင်းခံနိုင်ကြောင်း သိရသည်။
Tachileik News Agency