~~~~~~~~⊰❂ unicode ❂⊱~~~~~~~~

နိုဝင်ဘာလ(၂၆)ရက်နေ့တွင် ပြုလုပ်မည့် အခမ်းအနားသို့ တာချီလိတ်မြို့နယ်အတွင်းမှ ဂီတပညာရှင်များ၊ တေးသံရှင်များ၊ တေးရေးဆရာများ၊ သီချင်းခွေထုတ်ထားပြီးသူများ နှင့် သီချင်းခွေ မထုတ်ထားသေးသူများ အပါအဝင် ဂီတကို ဝါသနာပါသူများ စသည်ဖြင့် ဂီတနှင့် ပတ်သက်သူများ မည်သူမဆို တက်ရောက် လေ့လာနိုင်ပြီး အဖွဲ့ဝင်အဖြစ်လည်း လျှောက်ထားနိုင်မည်ဖြစ်ကြောင်း သိရသည်။

"အခုတော့ ရန်ကုန်လိုမျိုးလုပ်ဖို့အတွက် အလွှာ(၆)လွှာ ပါဝင်ပြီး အင်အားတောင့်တောင့်လေး ဖြစ်အောင်လုပ်သွားဖို့ပါ၊ ဂီတနဲ့ပတ်သက်ပြီး တေးရေးအပိုင်း၊ တေးဆိုအပိုင်း၊ စက်မှုအပိုင်း၊ အတီးပိုင်း၊ ခွေထုတ်ဖူးသူလည်း ခွေထုတ်ဖူးသူ၊ ခွေမထုတ်ဖူးသေးသူလည်း ပါဝင်နိုင်အောင် တက်ရောက် လေ့လာပြီးတော့မှ ပါဝင်နိုင်ရန်အတွက် လျှောက်လွှာတွေပေးမှာပါ၊ မည်သူမဆို လာရောက် လေ့လာနိုင်ပါတယ်၊ ပါဝင်သူတွေအနေနဲ့လည်း လျှောက်လွှာ ဖြည့်လို့ရပါမယ်၊ လျှောက်လွှာတွေကို ဗဟိုကို ပေးပို့သွားမှာပါ"ဟု တာချီလိတ်မြို့နယ်ဂီတအစည်းအရုံး ဥက္ကဌ ဦးစိုင်းလွိုင်ခမ်းက တာချီလိတ်သတင်း အေဂျင်စီသို့ ပြောသည်။

အဆိုပါ အခမ်းအနားအား ၂၀၁၈ခုနှစ် နိုဝင်ဘာလ(၂၆)ရက်နေ့ ညနေ(၃)နာရီအချိန်တွင် တာချီလိတ်မြို့၊ မြို့နယ်ဘောလုံးကွင်းအနီးရှိ (၂၉)ဘတ် စားသောက်ဆိုင်၌ ကျင်းပပြုလုပ်မည်ဖြစ်ကြောင်း သိရသည်။

မြန်မာနိုင်ငံဂီတအစည်းအရုံး(ဗဟို)က တာချီလိတ်သို့ လာရောက်၍ တာချီလိတ်မြို့နယ်ဂီတ အစည်းအရုံးအား ၂၀၁၅ခုနှစ် ဇွန်လ(၁၄)ရက်နေ့က ဖွဲ့စည်း တာဝန်ပေးအပ်ပွဲခဲ့ပြီးနောက် တာချီလိတ်မြို့နယ်ဂီတအစည်းအရုံး အလုပ်အမှုဆောင်များတွင် ဥက္ကဌ အဖြစ် ဦးစိုင်းလွယ်ခမ်း၊ ဒုတိယ ဥက္ကဌ အဖြစ် ဦးထွန်းအောင်၊ အတွင်းရေးမှူးအဖြစ် ဦးစိန်လွင်၊ တွဲဖက်အတွင်းရေးမှူးအဖြစ် ဦးအိုက်ခမ်း၊ စည်းရုံးရေးမှူး အဖြစ် ဦးစိုင်းထွန်းအေး၊ ပြန်ကြားရေးမှူးအဖြစ် ဦးစိုင်းခမ်းလူ နှင့် ဘဏ္ဍာရေးမှူးအဖြစ် ဒေါ်နန်းခမ်းနွဲ့အပြင် အဖွဲ့ဝင်များအဖြစ် ဦးစိုင်းရှဲန်းဝန်း၊ ဦးစိုင်းမျိုးနောင်၊ ဦးဝင်းမြင့် နှင့် ဒေါ်နန်းဆောင်နွန်းတို့ ပါဝင်ခဲ့ကြကြောင်း သိရသည်။

Tachileik News Agency