~~~~~~~~⊰❂ unicode ❂⊱~~~~~~~~

တောင်တွင်းကြီးမြို့တွင် ယောက္ခမဖြစ်သူ၏နေအိမ်တွင် အသတ်ခံရသည့်အမျိုးသမီး၏ ခင်ပွန်းဖြစ်သူကို လူသတ်မှုဖြင့် တရားစွဲဆိုထား
*********
မကွေးတိုင်းဒေသကြီး၊ တောင်တွင်းကြီးမြို့တွင် ယောက္ခမဖြစ်သူ၏နေအိမ်အတွင်း ၂၀၁၈ ခုနှစ်၊ အောက်တိုဘာ (၁၀)ရက်နေ့က အသတ်ခံရသည့်အမျိုးသမီး၏အမှုနှင့်ပတ်သက်၍ သံသယရှိသည့် ၎င်း၏ခင်ပွန်းဖြစ်သူ ရဲကျော်သူကို နိုဝင်ဘာလ (၁၉) ရက်နေ့က မကွေးခရိုင်တရားရုံးသို့ ရာကြီးမှုအမှတ် ၈၅/၂၀၁၈၊ ရာဇသတ်ကြီးဥပဒေပုဒ်မ ၃၀၂ ဖြင့် တရားစွဲဆိုတင်ပို့ထားပြီးဖြစ်ကြောင်း သိရသည်။

သေဆုံးသွားသည့် မအိဖြူအောင်မှာ အိမ်ထောင်ကျပြီး ယောက္ခမအိမ်တွင်လိုက်နေရာမှ ခင်ပွန်းဖြစ်သူက ကွာရှင်းခွင့်တောင်းခံသည်ကို လက်မခံသဖြင့် ခင်ပွန်းဖြစ်သူက နေအိမ်မှတိမ်းရှောင်နေခဲ့ခြင်းဖြစ်ကြောင်း သိရသည်။

ယင်းနောက် မအိဖြူအောင်ကို အောက်တိုဘာလ(၁၀)ရက်နေ့တွင် ယောက္ခမဖြစ်သူ၏နေအိမ်ဖြစ်သည့် တောင်တွင်းကြီးမြို့ အုန်းတော(၁)ရပ်ကွက် မီးရထားဝန်းအတွင်းရှိ နေအိမ်မီးဖိုအတွင်း၌ မေးစေ့အောက်(၃) လက္မခန့် ပြတ်ရှဒဏ်ရာ၊ ယာဘက်လည်ပင်း ညိုမဲဒဏ်ရာ၊ ယာဘက်မျက်လုံးညိုမဲဒဏ်ရာများဖြင့် သေဆုံးနေသည်ကို တွေ့ခဲ့ရခြင်းဖြစ်ကြောင်း သိရသည်။

မအိဖြူအောင် အသတ်ခံရခြင်းနှင့်ပတ်သက်၍ အမှုဖွင့်တိုင်ကြားသူမှာ တရားစွဲခံရသူ၏မိသားစုဖြစ်နေသဖြင့် အမှုမှန်မပေါ်မည်ကို စိုးရိမ်ကြောင်း မအိဖြူအောင်၏ဖခင်ဖြစ်သူက နိုဝင်ဘာ(၂၆)ရက်နေ့တွင် တောင်တွင်းကြီးမြို့၌ သတင်းစာရှင်းလင်းပွဲ ပြုလုပ်သည်။

“ကျွန်တော့်သမီးလေးအသတ်ခံရမှုနဲ့ပတ်သက်ပြီး အမှုမှန်ဖြစ်စေရေးအတွက် သတင်းစာရှင်းလင်းပွဲ ပြုလုပ်ရခြင်းဖြစ်ပါတယ်။ ကျွန်တော့်သမီးအိမ်ထောင်ကျတာ(၂)နှစ်လောက်ပဲရှိသေးပြီး ယောက္မအိမ်မှာ လိုက်နေပါတယ်။ သူ့ယောကျာ်းက (၂)လလောက်ပဲ အတူပေါင်းသင်းနေထိုင်ပြီး ဟိုအလုပ်လုပ်သွားတယ်၊ ဒီအလုပ်လုပ်သွားတယ်နဲ့ အိမ်ပြန်မလာတော့ဘူးလို့ကြားရတာကြောင့် သမီးကိုမေးတော့လည်း အဆင် ပြေပါတယ်ပဲပြောပြီး ယောက္မမအိမ်မှာပဲ ဆက်နေခဲ့တာပါ။ ပြီးခဲ့တဲ့ (၁၀)လပိုင်း (၁၀)ရက်နေ့မှာတော့ သမီးအသတ်ခံရတယ်လို့ သိလိုက်ရတာပါပဲ။ ရဲစခန်းမှာ သမီးရဲ့ယောက္ခမက တရားလိုပြုလုပ်ပြီးအမှုဖွင့် တာပါ။ အမှုနဲ့ပတ်သက်ပြီး ရဲက တရားလိုပါ မိသားစု (၄)ဦးကို ဖမ်းဆီးစစ်ဆေးခဲ့ပြီး သမီးယောကျာ်းကိုတော့ မကွေးခရိုင်ကို ပို့လိုက်ပြီလို့ပဲ နောက်ဆုံးသိရပြီး ဒီနေ့အထိ တရားခံအစစ်အမှန်ဖော်ထုတ်ရမိပြီလို့ သိရှိရခြင်းမရှိသေးတာကြောင့် အမှုမှန်ပျောက်သွားမှာ ကို စိုးရိမ်နေပါတယ်”ဟု အသတ်ခံရသူ၏ ဖခင် ကုလားကန်အုပ်စု ကုလားကန်ကျေးရွာနေ ဦးမောင်သောင်းက ရှင်းလင်းသည်။

တရားခံဟု သံသယရှိ၍ အစစ်ဆေးခံနေရသူများမှာ တရားလိုကိုယ်တိုင်နှင့် တရားလို၏မိသားစုဖြစ်နေ၍ အမှုမှန်ပျောက်ကွယ်သွားမည်ကို စိုးရိမ်သဖြင့် ၎င်းအနေဖြင့် တရားလိုပြုလုပ်၍ ထပ်မံအမှုဖွင့်လိုသည်ဟု ဆိုသော်လည်း ယင်းကဲ့သို့လုပ်ဆောင်ပါက သေဆုံးသူ၏ဖခင်မှာ သေဆုံးသည့်အခင်းဖြစ်ရပ်နှင့်ပတ်သက်၍ သိရှိသူမဟုတ်သဖြင့် အမှုအားနည်းသွားနိုင်သည်ဟု အမှုစစ်အရာရှိက အကြံပြုထားကြောင်း သိရသည်။

“ကျွန်တော်တို့က အမှုတစ်ခုကို (၂)ခါပြန်ပြီးဖွင့်လို့မရပါဘူး။ သူတို့အနေနဲ့ဖွင့်ရင် ပိုဆိုးသွားနိုင်တယ်။ ဒီဖြစ်စဉ်ကို သူတို့က ရွာမှာနေသူတွေဖြစ်လို့ ဘာမှ မသိနိုင်ဘူး။တရားလိုလုပ်သူ ကလေးမရဲ့ ယောက္ခမအနေနဲ့က အခင်းဖြစ်စဉ်နဲ့ အနီးစပ်ဆုံးမှာရှိနေသူဖြစ်လို့ရယ် ချွေးမနဲ့သားပင်ဖြစ်စေ အခင်းဖြစ်စဉ်နဲ့ပတ်သက်ပြီး သူကိုယ်တိုင်က ကျွန်မသားလုပ်တာပဲနေမှာ။ ကျွန်မသားကို ဖမ်းပေးဆိုပြီး အများရှေ့မှာ ထွက်ဆိုခဲ့သူဖြစ်လို့ အမှုလမ်းကြောင်းကို ထိခိုက်စေမှာမဟုတ်ပါဘူး”ဟု တောင်တွင်းကြီးမြို့မစခန်းမှူး ဒုရဲမှူးသိန်းထွန်းက တာချီလိတ်သတင်းအေဂျင်စီသို့ ပြောသည်။

အဆိုပါအမှုနှင့်ပတ်သက်၍ ရဲတပ်ဖွဲ့က သံသယရှိသူများအား စစ်ဆေးခဲ့ပြီးနောက် သက်သေများထံမှ အထောက်အထားများအရ ပြစ်မှုကျူးလွန်သူဟု သံသရှိသည့် သေဆုံးသူ၏ယောကျ်ားဖြစ်သူကို တရားစွဲဆို တင်ပို့ထားခြင်းဖြစ်ကြောင်း သိရသည်။

သတင်း၊ဓာတ်ပုံ #ဖီးနစ်