~~~~~~~~⊰❂ unicode ❂⊱~~~~~~~~

လားရှိုးမြို့တွင် မီးပွိုင့်တပ်ဆင်မှုအခြေအနေများကို ပြည်သူ့လွှတ်တော်တွင် မေးမြန်း
***************
ရှမ်းပြည်နယ်(မြောက်ပိုင်း) လားရှိုးမြို့တွင် မီးပွိုင့် တပ်ဆင်မှုအခြေအနေများကို လားရှိုးမဲဆန္ဒနယ်မှ ဒေါက်တာ စိုင်းမောက်ခမ်းက ၂၀၁၈ ခုနှစ်၊ နိုဝင်ဘာလ (၃၀) ရက်နေ့တွင် ကျင်းပသော ဒုတိယအကြိမ် ပြည်သူ့လွှတ်တော် ဒသမပုံမှန်အစည်းအဝေး နဝမမြောက်နေ့အစည်းအဝေးတွင် မေးမြန်းခဲ့သည်။

အဆိုပါမေးခွန်းနှင့်ပတ်သက်၍ ပို့ဆောင်ရေးနှင့်ဆက်သွယ်ရေး ဒုတိယဝန်ကြီး ဦးကျော်မျိုးက ဖြေကြားပေးခဲ့ရာတွင် မီးပွိုင့်တပ်ဆင်၍မရသည့်နေရာများဖြစ်သည့် လားရှိုးမြို့၊ မြို့တော်ခန်းမ အဝိုင်းပတ်လမ်းဆုံ (ရပ်ကွက်-၂)နေရာတွင် အဝိုင်းပတ်နှင့် စည်းလုံးညီညွတ်ခြင်းရုပ်ထုကို ဖျက်သိမ်းဖယ်ရှားရန်၊ ကုန်းအဆင်း/အတက်၊ အကွေ့နေရာဖြစ်သည့် သိန္နီလမ်းနှင့် ကွတ်ခိုင်လမ်း ရေပန်းလမ်းဆုံ၊ ရပ်ကွက်-၂ နေရာတွင် သိန္နီလမ်းထောင့်ရှိ မြင်ကွင်းကွယ်နေသော ထရမ်စဖော်မာကို လျှပ်စစ်ဓာတ်အားဖြန့်ဖြူးရေးလုပ်ငန်းနှင့်ညှိနှိုင်း၍ နေရာရွှေ့ပြောင်းရန်တို့ကို လုပ်ဆောင်မည်ဖြစ်ကြောင်း ဖြေကြားခဲ့သည်။

အရှိန်လျှော့သွားလာစေရေး သတိပေးမှိတ်တုတ် မီးဝါများကို ရေကန်လမ်းနှင့် ခိုင်ရွှေဝါလမ်းဆုံ (ရပ်ကွက်-၅)၊ သိန္နီလမ်းနှင့် ဟတ်ကာလမ်းဆုံ ရပ်ကွက်-၁၂၊ သိန္နီလမ်းနှင့် ဟူးမွန်ဆည်လမ်းဆုံ (ရပ်ကွက်-၈-၁၂/ပ မန်ဆူအနီး)တို့တွင် ၂၀၁၈-၁၉ ဘဏ္ဍာရေးနှစ် ပထမခြောက်လအတွင်း တပ်ဆင်ပေးမည်ဖြစ်ပြီး သိန္နီလမ်းနှင့် ဟူးမွန်ဆည်လမ်းဆုံ (ရပ်ကွက်-၈-၁၂/ပမန်ဆူအနီး)တွင် ရပ်/ကြည့်/သွား ဆိုင်းဘုတ်တစ်ခုကိုပါ တပ်ဆင်ပေးမည်ဖြစ်ကြောင်း သိရသည်။

Tachileik News Agency
ဓါတ်ပုံ - ပြည်သူ့လွှတ်တော်