~~~~~~~~⊰❂ unicode ❂⊱~~~~~~~~

အဆိုပါ လမ်းပိုင်းတွင် တံတား (၁၂၄)စင်းရှိနပြေီး ခရိုင်ချင်းဆက်လမ်းအား ဦးစားပေးပြင်ဆင်ရေးအတွက် ရန်ပုံငွေ တင်ပြခြင်းများကို ဆက်လက်ဆောင်ရွက်သွားမည်ဖြစ်ကြောင်း ပြည်နယ်အစိုးရအဖွဲ့ဝင် လမ်းပန်းဆက်သွယ်ရေးဝန်ကြီး ဦးခွန်ရဲထွေးက ၂၀၁၈ ခုနှစ်၊ ဒီဇင်ဘာလ ( ၁၈ )ရက်နေ့က ကျင်းပသည့် ရှမ်းပြည်နယ်လွှတ်တော်အစည်းအဝေးတွင် မိုင်းဆတ်မှ ပြည်နယ်လွှတ်တော်ကိုယ်စားလှယ် ဦးဒါဝိ၏ မေးမြန်းချက်ကို ပြန်လည်ဖြကြေားခဲ့ခြင်းဖြစ်သည်။

အဆိုပါ ခရိုင်ချင်းဆက်လမ်းအပါအဝင် ကျေးလက်လမ်းများကို “ဝ”အထူးဒေသ(၂)ထံမှ ၂၀၁၈ ခုနှစ်၊ နိုဝင်ဘာလ (၃၀) ရက်နေ့ နံနက် (၉) နာရီ၌ ပြည်နယ်အစိုးရဝန်ကြီးများဦးစီးသည့် အဖွဲ့က လွှဲပြောင်း လက်ခံခဲ့ခြင်းဖြစ်ပြီး ခရိုင်ချင်းဆက်လမ်းကို လမ်းတံတားဦးစီးဌာနအပိုင် ပြည်နယ်အစိုးရ၏ စီမံခန့်ခွဲမှု အောက်တွင် ထားရှိခြင်းဖြစ်ကြောင်း သိရသည်။

မိုင်းဆတ် - တာချီလိတ်ခရိုင်ချင်းဆက်လမ်းကို ၁၉၉၇ ခုနှစ်၊ အောက်တိုဘာလတွင် “ဝ”အထူးဒေသ(၂) စစ်ဒေသ (၁၇၁)မှ ဖောက်လုပ်ခဲ့ကာ ၁၉၉၉ ခုနှစ် ဖေဖော်ဝါရီလတွင် အမာခံလမ်းအဖြစ် ဖွင့်လှစ်ခဲ့ခြင်း ဖြစ်ကြောင်း သိရသည်။

လမ်း၏ အခက်ခဲ အကြမ်းတမ်းဆုံးအပိုင်းဖြစ်သော လွယ်ဆမ်ဆုံတောင် အတက်အဆင်း (၆)မိုင်အား ၂၀၀၄ ခုနှစ်နှင့် ၂၀၀၅ ခုနှစ်များတွင် ကတ္တရာလမ်းခင်းခဲ့ပြီး ၂၀၀၄ ခုနှစ်မှ ၂၀၀၇ ခုနှစ်များအတွင်း (၃၅)မိုင် (၂)ဖာလုံအား ကျောက်စီလမ်းခင်းခြင်း၊ (၁၄)မိုင်အား အမာခံလမ်းခင်းခြင်းနှင့် (၄)မိုင် (၄)ဖာလုံအား မြေလမ်းခင်းခြင်းအဖြစ် တည်ဆောက်ခဲ့ကာ “ဝ”အထူးဒေသ(၂) စစ်ဒေသ (၁၇၁)က ကြီးကြပ်ပြင်ဆင် ထိန်းသိမ်းနေခဲ့သည့် လမ်းဖြစ်သည်။

တာချီလိတ် - မိုင်းဆတ်ကားလမ်း ဆိုးဝါးစွာပျက်စီးနေမှုအား ရာသီမရွေးသွားလာနိုင်မည့်လမ်းအဖြစ် ပြုပြင်ပေးရန် ပြည်သူ့လွှတ်တော်တွင် မိုင်းတုံမဲဆန္ဒနယ်မှ ဦးအောင်ကျော်ဦးက ၂၀၁၇ ခုနှစ် နိုဝင်ဘာလ (၁)ရက်နေ့က မေးခွန်းမေးမြန်းခွင့် တင်ပြထားခဲ့ပြီးနောက် ခြောက်လကျော်အကြာ မေလတွင် အဆိုပါ မေးခွန်းအား လွှတ်တော်၌ တင်ပြခွင့်ရခဲ့ခြင်းဖြစ်သည်။

အဆိုပါလမ်းပိုင်း လွှဲပြောင်းစီမံခန့်ခွဲခွင့်ရရှိရေးအတွက် ၂၀၁၈ ခုနှစ် ဧပြီလ (၂၅)ရက်နေ့တွင် ရှမ်းပြည်နယ်အစိုးရအဖွဲ့ လမ်းပန်းဆက်သွယ်ရေးဝန်ကြီး ဦးခွန်ရဲထွေးနှင့် စည်ပင်သာယာရေးဝန်ကြီး ဦးစွံဆိုင်းဦးစီးသည့် အဖွဲ့က “ဝ”အထူးဒေသ(၂) စစ်ဒေသ (၁၇၁)အခြေစိုက်သည့် ဝမ်ဟုန်သို့ ပထမအကြိမ် သွားရောက်ဆွေးနွေးညှိနှိုင်းရာ ဧပြီလ(၂၈)ရက်နေ့တွင် လမ်းများအား လာရောက် လွှဲပြောင်းလက်ခံရန် စစ်ဒေသ (၁၇၁)က ပြန်လည်အကြောင်းကြားခဲ့ခြင်းဖြစ်ကြောင်း သိရသည်။

ယင်းနောက် နှစ်ဖက်ညှိနှိုင်းဆွေးနွေးမှုများကို ၂၀၁၈ ခုနှစ်အတွင်း မေလ(၆)ရက်၊ နိုဝင်ဘာလ(၁၁)ရက်၊ နိုဝင်ဘာလ (၁၉)ရက်တို့တွင် လုပ်ဆောင်ခဲ့ကြပြီးနောက် နိုဝင်ဘာလ (၃၀)ရက်နေ့တွင် လွှဲပြောင်းမှုကို လက်ခံနိုင်ခဲ့ခြင်းဖြစ်သည်။

လွှဲပြောင်းမှုသဘောတူညီချက်အရ အဆိုပါလမ်းပိုင်းကို ဒေသခံများအတွက် လက်ဆောင်အဖြစ် “ဝ”အထူးဒေသက ပေးအပ်ခြင်းဖြစ်ပြီး UWSA အား လမ်းအသုံးပြုခကောက်ခံခြင်းမပြုရန်၊ မှတ်ပုံတင်ပြုလုပ်ပေးရန် အပါအဝင် “ဝ”ဒေသမှ လူထု၏ လိုအပ်ချက်များအား ဆောင်ရွက်ပေးရန်တို့လည်း ပါဝင်ကြောင်း သိရသည်။

Tachileik News Agency