~~~~~~~~⊰❂Unicode Version ❂⊱~~~~~~~~

အာခါစာပေနှင့် ယဉ်ကျေးမှုဗဟိုကော်မတီက ကျိုင်းတုံမြို့ ဝေါ်နိမ့်ရွာတွင် အာခါတိုင်းရင်းသား စုပေါင်းနှစ်သစ်ကူးပွဲတော် စတင်ခဲ့သူများအား ဂုဏ်ပြုပွဲကျင်းပ
***************
အာခါတိုင်းရင်းသား စုပေါင်းနှစ်သစ်ကူးပွဲတော် စတင်ခဲ့သူများအား ဂုဏ်ပြုပွဲအခမ်းအနားကို အာခါစာပေနှင့် ယဉ်ကျေးမှုဗဟိုကော်မတီက ၂၀၁၈ ခုနှစ်၊ ဒီဇင်ဘာလ(၂၈)ရက်နေ့ နံနက်ပိုင်း၌ ရှမ်းပြည်နယ် အရှေ့ပိုင်း၊ ကျိုင်းတုံမြို့၊ စွမ်ဆပ်ကုန်းရှိ ဝေါ်နိမ့်ရွာတွင် ကျင်းပသည်။

“ဒီနေ့ ဒီလို ဖြစ်လာရတဲ့ အကြောင်းအရင်းက အာခါနှစ်သစ်ကူးပွဲပြုလုပ်တဲ့ စင်မြင့်ထက်မှာ အစဉ်အဆက်က အာခါလူမျိုးအများစု အသုံးပြုတဲ့ ပေါင်းစည်းအာခါစာကို မသုံးဘဲနဲ့ လူနည်းစုသာ သုံးတဲ့ ဟောင်ဂူး အာခါစာကို စင်မြင့်ပေါ်မှာ သုံးတဲ့အတွက် အခုလို တစ်ကွဲတစ်ပြားစီ ကျင်းပနေရတာပါ။ ဒါကြောင့်မို့လို့ မဖြစ်သင့် မဖြစ်ထိုက်တာကို ဖြစ်နေရတာပါ။ အမြဲတမ်းတော့ ဒီလိုဖြစ်နေမှာ မဟုတ်ပါဘူး”ဟု အာခါစာပေနှင့် ယဉ်ကျေးမှုကော်မတီမှ ဒေါ်အားစွန်းက တာချီလိတ်သတင်းအေဂျင်စီသို့ပြောသည်။

ကျိုင်းတုံမြို့တွင် (၄၃)ကြိမ်မြောက်အထိ အာခါစုပေါင်းနှစ်သစ်ကူးပွဲတော်အဖြစ် ကျင်းပလာရာမှ ယခုနှစ်တွင် စုပေါင်းနှစ်သစ်ကူးပွဲတော်၊ အာခါအမျိုးသားနေ့ ခေါင်းစဉ်ဖြင့် အာခါတိုင်းရင်းသားရေးရာဝန်ကြီး ဦးအာဗေလ ဦးဆောင်သည့် (၄၄)ကြိမ်မြောက် အာခါတိုင်းရင်းသား စုပေါင်းနှစ်သစ်ကူးပွဲတော်၊ အာခါအမျိုးသားနေ့ ကျင်းပရေးဦးစီးကော်မတီက ဦးဆောင်၍ ဒီဇင်ဘာလ(၂၇)ရက်နေ့မှ (၂၉)ရက်နေ့အထိ ကျင်းပရာတွင် အာခါအမျိုးသားနေ့ဟု သုံးနှုန်းရန် အာခါတိုင်းရင်းသားများ၏သဘောထားရယူမှုမရှိခြင်း၊ အာခါတိုင်းရင်းသားတို့ အသုံးပြုနေသည့် ပေါင်းစည်းအာခါစာနှင့် ဟောင်ဂူး အာခါစာတို့ရှိသည့်အနက် ဟောင်းဂူးအာခါစာ တစ်မျိုးတည်းကိုသာ အသုံးပြုထားသဖြင့် အခမ်းအနားတစ်ခုကို ထပ်မံကျင်းပခြင်းဖြစ်ကြောင်း သိရသည်။

“ အာခါတိုင်းရင်းသားတွေအတွက်ကတော့ အခုလို ကွဲပြားနေတာကတော့ မကောင်းပါဘူး။ ကျွန်တော်တို့လည်း စိတ်မကောင်းပါဘူး။ ဒီလိုအခြေအနေကလည်း အမြဲတမ်းဖြစ်နေမှာ မဟုတ်ပါဘူး။ အာခါတိုင်းရင်းသားတွေရဲ့ စည်းလုံးညီညွှတ်မှု ပြန်တည်ဆောက်နိုင်ဖို့အတွက် ကျွန်တော်တို့ကလည်း ကြိုးစားသွားမှာပါ။ ကြိုးစားတဲ့နေရာမှာ ကျွန်တော်တို့ရဲ့ ဆန္ဒအတိုင်းမသွားဘဲနဲ့ လူမျိုးစုအများစုရဲ့ သွားစေချင်တဲ့ လမ်းကြောင်းအတိုင်း သွားပါမယ်”ဟု အာခါစာပေနှင့်ယဉ်ကျေးမှု ဗဟိုကော်မတီမှ ဒုတိယဥက္ကဌ ဦးဝင်းမြတ်က တာချီလိတ်သတင်းအေဂျင်စီသို့ပြောသည်။

အဆိုပါနှစ်သစ်ကူးပွဲသို့ ၁၉၇၄- ၇၅ ခုနှစ်က ကျိုင်းတုံမြို့၌ ပထမဆုံးအကြိမ်ကျင်းပသည့် အာခါတိုင်းရင်းသားများ စုပေါင်း နှစ်သစ်ကူးပွဲတွင် လူငယ်ခေါင်းဆောင်များအဖြစ် ပါဝင်ခဲ့ကြသည့် ဒေါ်အားညွှန်း၊ ဒေါ်ဘူးရာ၊ ဒေါ်မီညူးကတ်သလင်းညို၊ ဒေါ်ဘူးယေ့၊ ဦးအားဘာနှင့် ဦးအားရဲတို့လည်း တက်ရောက်ကြကြောင်း သိရသည်။
လက်ရှိကျင်းပနေသည့်  (၄၄) ကြိမ်မြောက် အာခါတိုင်းရင်းသား စုပေါင်းနှစ်သစ်ကူးပွဲတော် “အာခါအမျိုးသားနေ့”ကျင်းပရေးအတွက် အစည်းအဝေးများတွင်လည်း အာခါစာပေနှင့်ယဉ်ကျေးမှု ဗဟိုကော်မတီအား ဖိတ်ကြားခဲ့ခြင်း မရှိခဲ့ကြောင်း သိရသည်။

အာခါအမျိုးသားနေ့အဖြစ် သတ်မှတ်ခြင်းကို အာခါစာပေနှင့်ယဉ်ကျေးမှု ဗဟိုကော်မတီအနေဖြင့် ကြိုဆိုသော်လည်း ထိုကဲ့သို့သတ်မှတ်လိုက်ခြင်းကို အာခါလူမျိုးတစ်စုလုံးကို ဦးစွာချပြပြီးမှ လူမျိုးစုတစ်ခုလုံး၏ သဘောတူညီမှုကို ရယူဆောင်ရွက်သင့်သည်ဟု ဆိုသည်။

အာခါနှစ်သစ်ကူးပွဲတော်ကို ၁၉၇၅ ခုနှစ်၊ ဒီဇင်ဘာ ၂၈ ရက်နေ့တွင် ကျိုင်းတုံမြို့ရှိ စွမ်စပ်ကုန်းတွင် ကတ်သလစ်လူငယ်များမှ စတင်ကျင်းပခဲ့ပြီးနောက် ဒီဇင်ဘာလ(၂၈)ရက်နေ့ ကို အာခါနှစ်သစ်ကူးအဖြစ် စတင် သတ်မှတ်လာခြင်းဖြစ်ကြောင်း သိရသည်။

ထိုစဉ်က အာခါစာပေ(၄)မျိုးအထိရှိနေသည့်အတွက် စင်မြင့်ပေါ်မှ စာသားများကို ၁၉၇၅ ခုနှစ်မှ ၁၉၈၅ ခုနှစ်အထိ ဗမာစာနှင့် ကတ်သလစ်အာခါစာ၊ ၁၉၈၆ ခုနှစ်မှ ၁၉၈၉ ခုနှစ်အထိ ကတ်သလစ် အာခါစာကိုသာ သုံးလာခဲ့ပြီး ၁၉၉၀ ခုနှစ်မှ ၂၀၀၄ ခုနှစ်အထိ နှစ်ခြင်းအာခါစာကိုသုံးခဲ့ခြင်းဖြစ်ကြောင်း သိရသည်။

ယင်းနောက် ၂၀၀၄ ခုနှစ်တွင် အာခါလူမျိုးအားလုံးအတွက် အာခါစာတစ်မျိုးတည်း အသုံးပြုနိုင်ရန် ပေါင်းစည်း အာခါသတ်ပုံကို တီထွင်ကာ တရားဝင် အသုံးပြုရန် အာခါယဉ်ကျေးမှုဗဟိုကော်မတီက ဆုံးဖြတ်ခဲ့သည့်အတွက် ၂၀၀၅ ခုနှစ်က ကျင်းပခဲ့သည့် နှစ်သစ်ကူးပွဲတော်မှ စတင်ကာ ပေါင်းစည်း အာခါစာကို စင်မြင့်ပေါ်မှ နောက်ခံစာသားအဖြစ် အသုံးပြုခဲ့သည်မှာ (၄၁)ကြိမ်မြောက် စုပေါင်း အာခါရိုးရာနှစ်သစ်ကူးပွဲတော် အထိဖြစ်ပြီး (၄၂)ကြိမ်မြောက် အရောက်တွင် မြန်မာစာတစ်မျိုးတည်းကိုသာ အသုံးပြုခဲ့ပြီး (၄၃)ကြိမ်မြောက်တွင် မြန်မာစာအပြင် ပေါင်းစည်းအာခါစာနှင့် ဟောင်ဂူးအာခါစာတို့ကို အသုံးပြုခဲ့ပြီး ယခုနှစ်တွင် မြန်မာစာနှင့် ဟောင်ဂူးအာခါစာတို့ကိုသာ အသုံးပြုထားကြောင်း သိရသည်။

အာခါစာပေနှင့် ယဉ်ကျေးမှု ဗဟိုကော်မတီ၏ သက်တမ်းမှာ နှစ်ပေါင်း(၄၀)ကျော်ခန့်ရှိနေပြီဖြစ်ပြီး ကော်မတီကို အာခါလူမျိုးများ ဖွံ့ဖြိုးတိုးတက်လာရန် ရည်ရွယ်၍ ဖွဲ့စည်းခဲ့ခြင်း ဖြစ်သည့်အပြင် အာခါယဉ်ကျေးမှု မပျောက်ပျက်ရန်၊ နှစ်စဉ် အာခါတိုင်းရင်းသားစုပေါင်းနှစ်သစ်ကူးပွဲတော်ကျင်းပရန်နှင့် အာခါ ယဉ်ကျေးမှု ပြက္ခဒိန်ထုတ်ရန်၊ အာခါလူမျိုးများအားလုံး အာခါစာပေ တစ်ခုတည်းကိုသာ အသုံးပြုသွားရန်တို့ကို ရည်ရွယ်ထားခြင်းဖြစ်ကြောင်း သိရသည်။

ဝေါ်နိမ့်ရွာတွင်ကျင်းပသော အခမ်းအနားသို့  အာခါတိုင်းရင်းသား စုပေါင်းနှစ်သစ်ကူးပွဲတော် စတင်ပျိုးထောင်ခဲ့သူများနှင့်တကွ တာချီလိတ်နှင့် ကျိုင်းတုံမြို့များမှ အာခါတိုင်းရင်းသားများ တက်ရောက်ခဲ့ကြသည်။

သတင်း၊ဓါတ်ပုံ #ဇွဲမြတ်