~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံတွင်း အကြောင်းအမျိုးမျိုးကြောင့် ဖမ်းဆီးခံရပြီး ပြန်လည်လွတ်မြောက်လာသည့် မြန်မာနိုင်ငံသားများကို ထိုင်းနိုင်ငံက မြန်မာနိုင်ငံနယ်စပ်ဒေသမြို့များသို့ ပြန်လည်လွှဲပြောင်းပေးလေ့ရှိရာ ရှမ်းပြည်နယ်အရှေ့ပိုင်း တာချီလိတ်မြို့သို့ အမျိုးသား (၇)ဦးနှင့် အမျိုးသမီး (၉)ဦး အပါအဝင် ကလေးငယ်(၁)ဦးကို ၂၀၁၉ ခုနှစ်၊ ဇန်နဝါရီလ (၁၀)ရက်နေ့ နံနက်(၁၀)နာရီခွဲကျော်က လာရောက် လွှဲပြောင်းပေးခြင်းဖြစ်သည်။

ယင်းကဲ့သို့ လွှဲပြောင်းပေးလာသည့် မြန်မာနိုင်ငံသားများကို အလုပ်သမား လူဝင်မှုကြီးကြပ်ရေးနှင့် ပြည်သူ့အင်အားဆိုင်ရာ ဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်အလုပ်သမား ညွှန်ကြားမှုဦးစီးဌာန၊ လူကုန်ကူးမှုတိုက်ဖျက်ရေးရဲတပ်ဖွဲ့နှင့် ထိုင်းနိုင်ငံမယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးနှင့် စေ့စပ်ညှိနှိုင်းရေးကော်မတီ (CNCMC ) တို့က စိစစ်လက်ခံကြကြောင်း သိရသည်။

လာရောက်လွှဲပြောင်းပေးလာသူများအတွင် မြန်မာနိုင်ငံသားမဟုတ်ဘဲ အခြားနိုင်ငံသားများ ပါဝင်လာခြင်း ရှိမရှိကို သေချာစွာ စိစစ်ပြီးမှ လက်ခံလေ့ရှိပြီး မြန်မာနိုင်ငံသား မဟုတ်ဘဲ အခြားနိုင်ငံသားများ ရောနှော ပါဝင်လာပါက ချက်ခြင်း ပြန်လည်လွှဲပြောင်းပေးမှုများ ရှိခဲ့ကြောင်း သိရှိရသည်။

Tachileik News Agency
ဓာတ်ပုံ - CNCMC