~~~~~~~~⊰❂ Unicode Version ❂⊱~~~~~~~~

မူးယစ်ဆေးဝါးရောင်းဝယ်မှုနှင့်ဆက်နွှယ်သည့်ငွေကြေး ခဝါချမှုဖြင့် တာချီလိတ်မှ အမျိုးသမီးတစ်ဦးကို ထိုင်းတရားရုံးက သေဒဏ်ချမှတ်
*************
မူးယစ်ဆေးဝါးရောင်းဝယ်မှုနှင့်ဆက်နွှယ်သည့် ငွေကြေးခဝါချမှုဖြင့် ထိုင်းနိုင်ငံတွင် ၂၀၁၇ ခုနှစ်၊ နိုဝင်ဘာလကတည်းက ဖမ်းဆီးခံထားရသည့် ရှမ်းပြည်နယ်အရှေ့ပိုင်း၊ တာချီလိတ်မြို့မှ နန်းမြင့်သိန်းအေးအား ထိုင်းတရားရုံးက သေဒဏ်ချမှတ်လိုက်ကြောင်း ထိုင်းနိုင်ငံသတင်းဌာနများတွင် ဇန်နဝါရီလ (၂၅)ရက်နေ့က ဖေါ်ပြထားသည်။

အသက်(၃၄)နှစ်အရွယ် နန်းမြင့်သိန်းအေးမှာ မူးယစ်ဆေးဝါးရောင်းဝယ်ရေးလုပ်ငန်းမှ ငွေကြေးခဝါချမှုအပါအဝင် စွဲချက်များတွင် ပြစ်မှုကျူးလွန်ကြောင်းထင်ရှားသဖြင့် သေဒဏ်ချမှတ်လိုက်ခြင်းဖြစ်သည်ဟု ဖေါ်ပြထားသည်။

ထိုင်းမူးယစ်တပ်ဖွဲ့အနေဖြင့် နန်းမြင့်သိန်းအေးအား ၂၀၁၇ ခုနှစ်၊ မေလ (၅)ရက်နေ့ကတည်းက ဖမ်းဝရမ်းထုတ်ထားခြင်းဖြစ်သည်ဟု နိုဝင်ဘာလတွင် ဘန်ကောက်မြို့ လမ်းမပေါ်၌ နန်းမြင့်သိန်းအေးစီးနင်းလာသည့်ကားကို တားဆီး၍ ဖမ်းဆီးမိပြီးနောက် ထိုင်းမူးယစ်တပ်ဖွဲ့အရာရှိက ပြောကြားခဲ့သည်။

ဖမ်းဆီးခံရစဉ်အချိန်က နန်းမြင့်သိန်းအေးသည် ဘန်ကောက်သို့ ဆေးကုရန်လာရောက်ခြင်းသာဖြစ်ပြီး ထိုင်း - မြန်မာ ငွေလဲလုပ်ငန်းကိုသာ လုပ်ကိုင်သူဖြစ်ကြောင်းနှင့် စွဲချက်တင်ထားသည့်ကိစ္စရပ်များနှင့်ပတ်သက်၍ သိရှိခြင်းမရှိကြောင်း ချေပခဲ့သော်လည်း ထိုင်းမူးယစ်တပ်ဖွဲ့က ချင်းရိုင်းခရိုင်၊ မယ်ဆိုင်မြို့တွင် မူးယစ်ဆေးဝါးရောင်းဝယ်သူတစ်ယောက်အား သေနတ်ဖြင့်ဖမ်းဆီးရမိမှုမှ ဆက်စပ်ဖေါ်ထုတ်ချက်အရ ၎င်းသည် ဘတ် (၁၃)သန်းခွဲအား မယ်ဆိုင်တွင် အမျိုးသမီးတစ်ဦး၏ ဘဏ်စာရင်းတွင် ထည့်ပေးရခြင်း၊ မူးယစ်ဆေးဝါးရောင်းဝယ်မှုမှ ငွေကြေးများကို မြန်မာနှင့် ထိုင်းနှစ်နိုင်ငံတွင် ရွှေဆိုင်၊ ရတနာဆိုင်များနှင့် ဟိုတယ်လုပ်ငန်းများ၌ ရင်းနှီးမြုပ်နှံခြင်းဖြင့် ငွေကြေးခဝါချမှုလုပ်ကိုင်နေခြင်းဖြစ်ကြောင်း စစ်ဆေးဖေါ်ထုတ်ရရှိကတည်းက နန်းမြင့်သိန်းအေးအား အလိုရှိစာရင်းတွင် ထည့်သွင်းထားခဲ့ခြင်းဖြစ်သည်ဟု သိရသည်။

ယင်းနောက် ၂၀၁၇ ခုနှစ်၊ ဒီဇင်ဘာလအတွင်း အခြားဆက်စပ်သူတစ်ဦးကိုလည်း ရဲတပ်ဖွဲ့က ဖမ်းဆီးရမိခဲ့ခြင်းဖြစ်ကြောင်း သိရသည်။

နန်းမြင့်သိန်းအေးသည် မူးယစ်ရာဇာများ၊ မူးယစ်ဆေးရောင်းဝယ်မှုမှ ငွေကြေးများအား ဘဏ်စာရင်းမှ လက်ခံယူကာ ခဝါချပေးနေသူ (၄)ဦးတွင် အပါအဝင်ဖြစ်သည်ဟု ရဲတပ်ဖွဲ့ကပြောကြားထားသည်။

Ref: The Nation၊ CTN News