~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံသို့ အလည်အပတ်ဗီဇာဖြင့် လာရောက်ပြီး တောင်းရမ်းစားသောက်နေသည့် တရုတ်နိုင်ငံသား (၆) ဦးကို ဖမ်းဆီးအရေးယူ
*********
ထိုင်းနိုင်ငံ၊ ဘန်ကောက်မြို့လမ်းများတွင် တောင်းရမ်းစားသောက်နေသည့် တရုတ်နိုင်ငံသား (၆)ဦးကို ရဲတပ်ဖွဲ့ကဖမ်းဆီးလိုက်ပြီး (၃)ဦးမှာ မသန်စွမ်းများဖြစ်ကြောင်း ဘန်ကောက်ပို့စ်သတင်းဖေါ်ပြချက်အရ သိရသည်။

တရုတ်နိုင်ငံသား အမျိုးသား (၄)ဦးနှင့် အမျိုးသမီး(၂)ဦးပါဝင်သည့်အဖွဲ့ကို ဖမ်းဆီးထားကြောင်း ရဲတပ်ဖွဲ့က ၂၀၁၉ ခုနှစ်၊ ဖေဖေါ်ဝါရီလ(၆)ရက်နေ့က သတင်းစာရှင်းပွဲပြုလုပ်လိုက်ခြင်းဖြစ်ပြီး ၎င်းတို့သည် အလည်အပတ်ဗီဇာဖြင့် ထိုင်းနိုင်ငံသို့ လာရောက်သူများဖြစ်ကြောင်း သိရသည်။

အဆိုပါ တရုတ်နိုင်ငံသားများသည် ဟိုတယ်အခန်းများငှားရမ်းနေထိုင်နေကြပြီး နံနက်ပိုင်းတွင် အခန်းမှထွက်ကာ ဘန်ကောက်မြို့တွင်းနေရာအနှံ့အပြား သွားရောက်တောင်းရမ်း၍ ရရှိငွေများကို စတိုးဆိုင်များ၌ လဲလှယ်ကာ ညနေပိုင်းတွင် အခန်းပြန်လာလေ့ရှိကြောင်း သိရသည်။

ရဲတပ်ဖွဲ့က ၎င်းတို့အား မိုးပျံရထားဘူတာအနီးတွင် ဖေဖေါ်ဝါရီလ (၁)ရက်နေ့က ထိန်းသိမ်းထားနိုင်ခဲ့ခြင်းဖြစ်ပြီး အများစုမှာ နေထိုင်ခွင့်သက်တမ်းကျော်လွန်နေပြီဖြစ်ကြောင်း သိရသည်။

အမျိုးသမီး (၂)ဦးနှင့် အမျိုသား (၁)ဦးမှာ မသန်စွမ်းများဖြစ်ကြပြီး ဖမ်းဆီးခံရသူ (၆)ဦးမှာ တောင်းရမ်းစားသောက်သူများထိန်းချုပ်ရေးအက်ဥပဒေ ၂၀၁၆ အရ အရေးယူခံရမည်ဖြစ်ကာ အမြင့်ဆုံးအပြစ်ဒဏ်မှာ ထောင်ဒဏ် (၁)လ သို့မဟုတ် ဒဏ်ငွေ ဘတ်တစ်သောင်း သို့မဟုတ် ထောင်ဒဏ်နှင့် ငွေဒဏ်နှစ်ရပ်လုံး ချမှတ်နိုင်ကြောင်း သိရသည်။
Tachileik News Agency
Ref: Bangkokpost