~~~~~~~~⊰❂ Unicode Version ❂⊱~~~~~~~~

ထိုင်းဘုရင့်အစ်မတော်အနေဖြင့် နိုင်ငံရေးတွင် ပါဝင်မည်ကို ဘုရင်က ကန့်ကွက်လိုက်ပြီး ပြိုင်ဘက်ပါတီကလည်း ကန့်ကွက်ထား
**********
ထိုင်းဘုရင်၏အစ်မတော် အူဘိုရာသာနာအနေဖြင့် တော်ဝင်မိသားစုဝင်ဖြစ်နေ၍ နိုင်ငံရေးတွင် မပါဝင်သင့်ကြောင်း ထိုင်းဘုရင်က ၂၀၁၉ ခုနှစ်၊ ဖေဖေါ်ဝါရီလ (၈)ရက်နေ့တွင် ကြေညာချက်ထုတ်လိုက်ပြီး အူဘိုရာသာနာအနေဖြင့် ဝန်ကြီးချုပ် အမည်စာရင်းပေးသွင်းခြင်းမှာ ဥပဒေနှင့်မညီကြောင်း PRP ပါတီကလည်း ရွေးကောက်ပွဲကော်မရှင်ကို ကန့်ကွက်ထားကြောင်း သိရသည်။

ထိုင်းဘုရင့်အစ်မတော်က သက်ဆင်ကိုထောက်ခံသည့် TRC မှ ဝန်ကြီးချုပ်နေရာ ဝင်ရောက်ယှဉ်ပြိုင်ရန် အတည်ပြုလိုက်ကြောင်း ဖေဖေါ်ဝါရီလ (၈)ရက်နေ့က သတင်းထုတ်ပြန်ပြီးနောက် လက်ရှိဝန်ကြီးချုပ် ပရာယွတ်ချန်အိုချာကလည်း PRP ပါတီမှ ဝန်ကြီးချုပ်နေရာအတွက် ဝင်ရောက်ယှဉ်ပြိုင်မည်ဖြစ်ကြောင်း သတင်းများထုတ်ပြန်လာခြင်းဖြစ်သည်။

အူဘိုရာသာနာက ၁၉၇၂ ခုနှစ်တွင် တော်ဝင်မင်းသမီးဘွဲ့ကို စွန့်လွှတ်ခဲ့ပြီးဖြစ်သဖြင့် ရွေးကောက်ပွဲဥပဒေနှင့် ညီညွတ်သည်ဟု TRC ပါတီက ထုတ်ပြန်ထားသည်။

မင်းသမီးသည် တော်ဝင်မင်းသမီးဘွဲ့ကို စွန့်လွှတ်ထားသည့်တိုင် တော်ဝင်မိသားစုဝင်ဖြစ်နေဆဲဖြစ်ပြီး နိုင်ငံရေးရာထူးများ၏အထက်တွင်ရှိနေသည့် တော်ဝင်မိသားစုများက နိုင်ငံရေးတွင် မပါဝင်သင့်ကြောင်း ဘုရင်၏ထုတ်ပြန်ချက်တွင် ပါဝင်သည်။

အူဘိုရာသာနာ၏ အမည်စာရင်းတင်သွင်းမှုထွက်လာပြီးနောက် လူမှုကွန်ယက်စာမျက်နှာတွင် သူမအား ထောက်ခံသူများနှင့် ပြင်းပြင်းထန်ထန်ကန့်ကွက်သူများ ရှိလာခြင်းဖြစ်သည်။

အူဘိုရာသာနာက သူမအနေဖြင့် သာမန်နိုင်ငံသားတစ်ဦးအနေဖြင့် ရရှိခံစားခွင့်ရှိသည့် လွတ်လပ်ခွင့်၊ အခွင့်အရေးများအတိုင်း ရွေးကောက်ပွဲဝင်ရန်ဆုံးဖြတ်ခြင်းဖြစ်သည်ဟု အင်စတာဂရမ်တွင် ရေးသားခဲ့သည်။

Ref: Bangkok Post, PBS