~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံတွင် လူဝင်မှုကြီးကြပ်ရေးဥပဒေချိုးဖောက်မှုဖြင့် မြန်မာနိုင်ငံသား (၂၂၇)ဦးအပါအဝင် နိုင်ငံခြားသား စုစုပေါင်း (၄၃၅)ဦးကို နေရာပေါင်း (၂၂၀)တွင် ၂၀၁၉ ခုနှစ်၊ ဖေဖော်ဝါရီလအတွင်း ပူးပေါင်းအဖွဲ့ဖြင့် စစ်ဆေးမှုအတွင်း ဖမ်းဆီးရမိထားကြောင်း ထိုင်းသတင်းဌာနများ၏ ဖော်ပြချက်အရ သိရသည်။

အဆိုပါ ဖမ်းဆီးရမိမှုနှင့် ဆက်စပ်သည့် ထိုင်းနိုင်ငံသား (၈၇)ဦးကိုပါ ထိန်းသိမ်းထားသဖြင့် စုစုပေါင်း ဖမ်းဆီးထိန်းသိမ်းခံရသူမှာ (၅၂၂)ဦးရှိကြောင်း လူဝင်မှုကြီးကြပ်ရေးဌာနမှ အရာရှိတစ်ဦးက မီဒီယာများကို ဖေဖော်ဝါရီလ (၁၅)ရက်နေ့က ပြောကြားကြောင်း သိရသည်။

ရဲတပ်ဖွဲ့၊ လူဝင်မှုကြီးကြပ်ရေး၊ ကမ္ဘာလှည့်ခရီးသွားရဲနှင့် အခြားသက်ဆိုင်ရာဌာနများပါဝင်သည့် ပူးပေါင်းအဖွဲ့ဖြင့် ဘန်ကောက် အပါအဝင် အခြားခရိုင်များတွင် စစ်ဆေးမှုမှ ယင်းကဲ့သို့ ဖမ်းမိခြင်းဖြစ်ကြောင်း သိရသည်။

ဖမ်းဆီးခံရသူများ အနက် မြန်မာ (၅)ဦး၊ ကမ္ဘောဒီးယား (၄)ဦး၊ လာအို(၃)ဦး၊ ဗီယက်နမ်၊ အိန္ဒိယနှင့် ဒိန်းမတ် (၁)ဦးစီ စုစုပေါင်း (၁၅)ဦးမှာ ဗီဇာသက်တမ်း ကျော်လွန်နေထိုင်မှုဖြင့်လည်းကောင်း၊ မြန်မာ (၁၄၃)ဦး၊ လာအို(၁၀၂)ဦး၊ ကမ္ဘောဒီးယား (၃၈)ဦး၊ အိန္ဒိယ(၃)ဦးနှင့် ဘင်္ဂလားဒေ့ရှ်(၁)ဦး စုစုပေါင်း (၂၈၇)ဦးမှာ တရားမဝင် ဝင်ရောက်မှုဖြင့်လည်းကောင်း ဖမ်းဆီးခံရခြင်းဖြစ်ကြောင်း သိရသည်။

ကျန်ရှိသည့် ထိုင်း (၈၇)ဦး၊ မြန်မာ (၇၉)ဦး၊ ကမ္ဘောဒီးယား (၃၁)ဦး၊ တရုတ် (၇)ဦး၊ လာအို(၅)ဦး၊ ဗီယက်နမ်နှင့် တူရကီမှ (၃)ဦးစီ၊ အစ္စရေး၊ အိန္ဒိယ၊ ဖိလစ်ပိုင်၊ အီရတ်တို့မှ တစ်ဦးစီနှင့် နိုင်ငံသားအတည်မပြုနိုင်သူ (၁)ဦး စုစုပေါင်း (၂၂၀)ဦးတို့မှာ လူဝင်မှုကြီးကြပ်ရေးဆိုင်ရာ ဥပဒေ ချိုးဖောက်မှုများဖြင့် ဖမ်းဆီးထားခြင်းဖြစ်ကြောင်း သိရသည်။

Tachileik News Agency
Ref:Bangkok Post