~~~~~~~~⊰❂ Unicode Version ❂⊱~~~~~~~~

မူးယစ်ငွေခဝါချမှုဖြင့် ဖမ်းဆီးခံရသည့် မြန်မာနှင့် လာအိုနိုင်ငံသူများနှင့် ဆက်စပ်သည့် မူးယစ်ဆေး အဓိကဖြန့်ဖြူးသူ ထိုင်းအမျိုးသမီးကို ၎င်း၏ခင်ပွန်း၊ရည်းစားတို့နှင့်အတူ ဖမ်းဆီးလိုက်ပြီး ဘတ်သန်း(၁၀၀)ကျော် ပိုင်ဆိုင်မှုများ သိမ်းဆည်း
***************
ထိုင်းနိုင်ငံတွင် ဘဏ်စာရင်းဖွင့်လှစ်ပြီး မြန်မာမူးယစ်ဂိုဏ်းများသို့ ငွေကြေးလွှဲပြောင်းပေးမှုဖြင့် ဖမ်းဆီးခံထားရသည့် မြန်မာနိုင်ငံသူ နန်းမြင့်သိန်းအေးနှင့် လာအိုနိုင်ငံသူ Mon Phet-aroon တို့၏အမှုနှင့် ဆက်စပ်နေသည့် မူးယစ်ဆေးအဓိကဖြန့်ဖြူးသူ အမျိုးသမီးကို ၎င်း၏ခင်ပွန်း၊ ရည်းစားဖြစ်သူတို့နှင့်အတူ ဖမ်းဆီးမိပြီး ဘတ်သန်း(၁၀၀)ကျော် ပိုင်ဆိုင်မှုများကို သိမ်းဆည်းလိုက်ကြောင်း သိရသည်။

ထိုင်းနိုင်ငံတွင် မူးယစ်ဆေးအဓိကဖြန့်ဖြူးနေသူ(၃)ဦးကို  ၂၀၁၉ ခုနှစ်၊ ဖေဖေါ်ဝါရီလ (၁၉)ရက်နေ့၌ ဖမ်းဆီးလိုက်ပြီး ဘန်ကောက်မြို့ နေရာ(၆)နေရာမှ ၎င်းတို့၏ ဘတ်သန်း (၁၀၀)ကျော်တန်ဖိုးရှိသည့် ပိုင်ဆိုင်မှုများကို သိမ်းဆည်းလိုက်ကြောင်း ထိုင်းရဲတပ်ဖွဲ့က သတင်းထုတ်ပြန်သည်ဟု ဘန်ကောက်ပို့စ်သတင်းတွင် ရေးသားဖေါ်ပြထားသည်။

ရဲတပ်ဖွဲ့နှင့်သက်ဆိုင်ရာဌာနများပါဝင်သည့် ပူးပေါင်းအဖွဲ့သည် မူးယစ်မှုဖြင့်ဝရမ်းထုတ်ခံရသူများဖြစ်သည့် အသက် (၄၂)နှစ်အရွယ်အမျိုးသမီး Piyachat Witchadilok နှင့် ခင်ပွန်းဖြစ်သူ အသက်(၃၀)အရွယ် Krittipong Uthensut တို့ကို နံနက်(၅)နာရီအချိန်တွင် ဘန်ကောက်ရှိ ၎င်းတို့၏နေအိမ်တွင် ဝင်ရောက်ဖမ်းဆီးခဲ့ခြင်းဖြစ်ကြောင်း သိရသည်။

ဘန်ကောက်မြို့ နေရာ (၆)နေရာရှိ ၎င်းတို့၏ပိုင်ဆိုင်မှုများကို သိမ်းဆည်းရာတွင် Piyachat Witchadilok ၏ ရည်းစားဖြစ်သူ အသက်(၃၉)နှစ်အရွယ် Amporn Heemman နေထိုင်သည့် အဆင့်မြင့်အိမ်ရာတစ်ခုမှ နေအိမ်လည်း သိမ်းဆည်းခံရကြောင်း သိရသည်။

Piyachat Witchadilok သည် အိမ်နီးချင်းနိုင်ငံများနှင့် မူးယစ်ဆေးဆက်သွယ်ရောင်းဝယ်နေသူဖြစ်ပြီး မူးယစ်ဆေးများကို နိုင်ငံမြောက်ပိုင်းမှတစ်ဆင့် ဘန်ကောက်၊ နိုင်ငံအလယ်ပိုင်းနှင့် အရှေ့ပိုင်းသို့ ပို့ဆောင်ရောင်းချနေသူဖြစ်သည်ဟု ရဲတပ်ဖွဲ့က သတင်းထုတ်ပြန်သည်။

၎င်းသည် ၂၀၁၇ ခုနှစ်က ထိုင်းနိုင်ငံအတွင်း ဖမ်းဆီးရမိပြီး ၂၀၁၉ ခုနှစ်၊ ဇန်နဝါရီလက သေဒဏ် ချမှတ်ခံထားရသည့် မြန်မာနိုင်ငံသူ တာချီလိတ်မြို့မှ နန်းမြင့်သိန်းအေးနှင့် ငွေကြေးပမာဏအမြောက်အများ ချိတ်ဆက်ဆောင်ရွက်နေသည့်အပြင် ထိုင်းနိုင်ငံတွင် ဘဏ်စာရင်းဖွင့်လှစ်ပြီး မူးယစ်ဂိုဏ်းများမှငွေများကို မြန်မာနိုင်ငံသို့ လွှဲပြောင်းနေမှုဖြင့် ၂၀၁၇ ခုနှစ်အတွင်း ဖမ်းဆီးခံထားရသည့် လာအိုနိုင်ငံသူ စီးပွားရေးလုပ်ငန်းရှင် Mon Phet-aroon ၏ ငွေကြေးခဝါချမှုနှင့်လည်း ဆက်စပ်သည်ဟုဆိုသည်။

Piyachat Witchadilok အနေဖြင့် အတည်တကျလုပ်ငန်းမရှိသော်လည်း ဘတ်သန်း (၁၀၀)ကျော်ပိုင်ဆိုင်ထားပြီး ပိုင်ဆိုင်မှုအများစုမှာ ခင်ပွန်းဖြစ်သူ၏ အမည်ဖြင့်ထားရှိခြင်းဖြစ်ကြောင်း သိရသည်။

ဇနီးဖြစ်သူမှာ မူးယစ်ဆေးရောင်းဝယ်မှုလုပ်သော်လည်း ၎င်းအနေဖြင့် ပါဝင်ခြင်းမရှိကြောင်း ခင်ပွန်းဖြစ်သူက ငြင်းဆိုထားပြီး ၎င်း၏ပိုင်ဆိုင်မှုများမှာ ယခင်စားသောက်ဆိုင်လုပ်ငန်းမှဝင်ငွေဖြင့် အရစ်ကျဝယ်ယူထားသည်များသာဖြစ်သည်ဟု ပြောဆိုထားကြောင်း သိရသည်။

Ref:Bangkok Post
Photo: Police TV