~~~~~~~~⊰❂ Unicode Version ❂⊱~~~~~~~~

NGO နှင့် INGO ဝန်ထမ်းများ လစာဝင်ငွေခွန်ထမ်းဆောင်ရန် ပြည်တွင်းအခွန်များဦးစီးဌာန အသိပေး
**********
NGO နှင့် INGO များတွင် တာဝန်ထမ်းဆောင်နေသည့်ဝန်ထမ်းများ လစာဝင်ငွေခွန် ထမ်းဆောင်ကြရန်နှင့် အဆိုပါဝန်ထမ်းများအား လစာငွေထုတ်ပေးရန်တာဝန်ရှိသူများအနေဖြင့်  ဝန်ထမ်းများပေးဆောင်ရမည့် ဝင်ငွေခွန်များ ပေးဆောင်စေရေးအတွက် လုပ်ဆောင်ကြရန် ပြည်တွင်းအခွန်များဦးစီးဌာနက အသိပေးကြေညာထားသည်။

NGO နှင့် INGO ဝန်ထမ်းများအားလစာငွေထုတ်ပေးရန် တာဝန်ရှိသူအနေဖြင့် ဝန်ထမ်းများအနေဖြင့် ပေးသွင်းရန် ကျသင့်အခွန်ငွေတွက်ချက်နှုတ်ယူပြီး (၇)ရက်အတွင်း သက်ဆိုင်ရာ အခွန်ဦးစီးဌာနရုံးများ၏ ငွေစာရင်းသို့ ပေးသွင်းရမည်ဖြစ်ပြီး ယင်းကဲ့သို့လုပ်ဆောင်ရန် ပျက်ကွက်ပါက ဝင်ငွေခွန်ဥပဒေပုဒ်မ ၁၆၊ ပုဒ်မခွဲ(ဃ)အရ အရေးယူနိုင်ကြောင်း သိရသည်။

မြို့နယ်အခွန်ဦးစီးဌာနမှူး၊ တိုင်းဒေသကြီး/ပြည်နယ်အခွန်ဦးစီးဌာနမှူး သို့မဟုတ် အခွန်ထမ်းကြီးများဆိုင်ရာ အခွန်ရုံး သို့မဟုတ် အလယ်အလတ် အခွန်ထမ်းများဆိုင်ရာအခွန်ရုံးဌာနမှူးတို့က ဝင်ငွေခွန်နှင့် စပ်လျဉ်း၍ သိလိုသောသတင်းအချက်များကို သက်ဆိုင်ရာ INGO နှင့် NGO များအနေဖြင့် ဖြေကြားပေးပို့ကြရန်ကိုလည်း ပြည်တွင်းအခွန်များဦးစီးဌာနက အသိပေးထားသည်။

၁၉၅၄ ခုနှစ်၊ ကမ္ဘာ့ကုလသမဂ္ဂအဖွဲ့(အခွင့်အရေးများနှင့် ကင်းလွတ်ခွင့်များ) အက်ဥပဒေအရလည်းကောင်း၊ ၁၉၆၁ ခုနှစ် သံတမန်ဆက်ဆံရေးနှင့် စပ်လျဉ်းသည့် ဗီယင်နာကွန်ဗင်းရှင်းသဘောတူစာချုပ်အရလည်းကောင်း၊ နှစ်နိုင်ငံအပြန်အလှန် လက်မှတ်ရေးထိုးထားသည့် နားလည်မှုစာချွန်လွှာများ စာချုပ်များအရလည်းကောင်း ဝင်ငွေခွန်ကင်းလွတ်ခွင့်ပြုထားခြင်းမရှိသည့် NGO နှင့် INGO များတွင် တာဝန်ထမ်းဆောင်သူများအားလုံး ဝင်ငွေခွန်ပေးဆောင်ရမည်ဖြစ်ကြောင်း သိရသည်။
ယင်းသို့ပေးဆောင်ရမည့် ဝင်ငွေခွန်တွင်လစာ၊ လုပ်ခ၊ နှစ်စဉ်ကြေး၊ လစာနှင့်လုပ်ခအပြင် ထပ်ဆောင်းရရှိ အခကြေးငွေ၊ ကော်မရှင်ရငွေတို့မှာ လစာခေါင်းစဉ်ဖြင့် ဝင်ငွေခွန်ပေးဆောင်ရန် တာဝန်ရှိကြောင်း သိရသည်။

လစာဝင်ငွေ တစ်နှစ်လျှင် ကျပ် (၄၈)သိန်းထက်ကျော်လွန်သူတိုင်း  လစာဝင်ငွေခွန်နှုန်းထားသတ်မှတ်၍ ၂၀၁၈ ခုနှစ်၊ ဧပြီလ (၁)ရက်နေ့မှစပြီး အခွန်စည်းကြပ်နေခြင်းဖြစ်ရာ NGO၊ INGO ဝန်ထမ်းများအနေဖြင့် လစာဝင်ငွေခွန်ပေးဆောင်ကြရန် အသိပေးထားခြင်းဖြစ်သည်။

အခွန်ကိစ္စနှင့်ပတ်သက်၍ မရှင်းလင်းသည့်အချက်များရှိပါက သက်ဆိုင်ရာမြို့နယ်အခွန်ဦးစီးဌာနမှူးရုံး (သို့မဟုတ်) အခွန်ဆိုင်ရာ ဝန်ဆောင်မှုရုံး (နေပြည်တော်) ရုံးအမှတ် ၄၆၊ ပြည်တွင်းအခွန်များဦးစီးဌာန၊ ဖုန်းနံပါတ်- ၀၆၇-၃၄၃၀၅၂၂၊ ၀၆၇-၃၄၃၀၅၃၃ (သို့မဟုတ်) အခွန်ဆိုင်ရာဝန်ဆောင်မှုရုံး (ရန်ကုန်) အမှတ် ၅၉/၆၁၊ မြေညီထပ်၊ ပန်းဆိုးတန်းလမ်း၊ ကျောက်တံတားမြို့နယ်၊ ဖုန်းနံပါတ်- ၀၁-၃၇၈၃၇၀၊ ၀၁-၃၇၈၃၇၂ (သို့မဟုတ်) အခွန်ဆိုင်ရာဝန်ဆောင်မှုရုံး (မန္တလေး) ၆၅ လမ်း၊ ၂၂x၂၃ လမ်းကြား၊ ဖုန်းနံပါတ်- ၀၂-၄၀၃၀၁၉၂ တို့သို့ မေးမြန်းစုံစမ်းနိုင်ကြောင်း သိရသည်။

Tachileik News Agency