~~~~~~~~⊰❂ Unicode Version ❂⊱~~~~~~~~

မိုင်းဆတ်မြို့၌ မော်တော်ယာဉ်၊ မော်တော်ဆိုင်ကယ်သက်တမ်းတိုးနှင့် ယာဉ်မောင်းလိုင်စင်များ ကွင်းဆင်းဆောင်ရွက်ပေးနေ
*************
ရှမ်းပြည်နယ်အရှေ့ပိုင်း၊ မိုင်းဆတ်မြို့ ပြည်သူ့ဝန်ဆောင်မှုရုံးတွင် မော်တော်ယာဉ်၊ မော်တော်ဆိုင်ကယ်များ သက်တမ်းတိုးခြင်း၊ ယာဉ်မောင်းလိုင်စင်ပြုလုပ်ပေးခြင်းလုပ်ငန်းများကို ၂၀၁၉ ခုနှစ်၊ မတ်လ (၁၂)ရက်နေ့တွင် ကွင်းဆင်းဆောင်ရွက်ပေးသည့် နောက်ဆုံးနေ့အဖြစ် ညနေ(၄)နာရီအထိ လုပ်ငန်းဆောင်ရွက်ပေးမည်ဖြစ်ကြောင်း သိရသည်။

ကျိုင်းတုံမြို့၊ ကုန်းလမ်းပို့ဆောင်ရေးဦးစီးဌာနမှ ဦးစီးအရာရှိ  ဦးသိန်းဝင်း ဦးဆောင်သောအဖွဲ့က မိုင်းဆတ်မြို့ပြည်သူ့ဝန်ဆောင်မှုရုံး၌ မတ် (၁၀) ရက်နေ့မှစ၍ (၃)ရက်ကြာဆောင်ရွက်ပေးနေခဲ့ခြင်းဖြစ်ပြီး မော်တော်ယာဉ်၊ မော်တော်ဆိုင်ကယ် သက်တမ်းတိုးခြင်းအပြင် မော်တော်ဆိုင်ကယ်မောင်း “က”လိုင်စင်နှင့် ယာဉ်မောင်းအသင် “သ”လိုင်စင်ကိုပါ လုပ်ပေးနေခြင်းဖြစ်ကြောင်း သိရသည်။

အဆိုပါ “က”နှင့် “သ”လိုင်စင်များ သက်တမ်း (၃)လပြည့်ပြီးပါက ကျိုင်းတုံကညနရုံးတွင်  “ခ” ယာဉ်မောင်းလိုင်စင် လာရောက်ဖြေဆိုနိုင်မည်ဖြစ်ပြီး သက်တမ်းတိုးယာဉ်၊ ဆိုင်ကယ်များကိုလည်း (၃)လကြို သက်တမ်းတိုးပေးထားခြင်းဖြစ်ကြောင်း သိရသည်။

ယင်းအပြင် မော်တော်ဆိုင်ကယ်လိုင်စင်နံပါတ်ပြားများကို ယခင်က မြန်မာအက္ခရာမှ အင်္ဂလိပ်အက္ခရာသို့ ပြောင်းလဲတပ်ဆင်ပေးမည်ဖြစ်ရာ လုပ်ငန်းဆောင်ရွက်ပြီး(၂)လကျော်ပါက ယာဉ်မှတ်ပုံတင်စာအုပ်နှင့် နံပါတ်ပြားအဟောင်းကို ကျိုင်းတုံကညနရုံးသို့ တင်ပြပြီး အသစ်ထုတ်ယူနိုင်မည်ဖြစ်ကြောင်း သိရသည်။

ကွင်းဆင်းဆောင်ရွက်မှုအတွင်း ယာဉ်စည်းကမ်း၊ လမ်းစည်းကမ်းဆိုင်ရာ ဟောပြောပို့ချမှုကိုလည်း လုပ်ဆောင်ပေးထားကြောင်း သိရသည်။

သတင်း #သန်းဇော်
ဓါတ်ပုံ - Tiger Wan