~~~~~~~~⊰❂ Unicode Version ❂⊱~~~~~~~~

မြန်မာ - ထိုင်းနယ်စပ်ဒေသ တာချီလိတ်မြို့တွင် ၂၀၁၉ခုနှစ် မတ်လအတွင်း မီးခိုးမြူမှုန်များနှင့် မီးခိုးပြာများကျဆင်းမှုဖြစ်ပေါ်နေသဖြင့် ပြည်သူများကျန်းမာရေးကာကွယ် စောင့်ရှောက်မှုများလုပ်ဆောင်ပေးနိုင်ရန်အတွက် ထိုင်းနိုင်ငံဘက်မှ လေထုအရည်အသွေးတိုင်းတာထားသည့် ရလဒ်များကို တောင်းခံရယူကာ ဆောင်ရွက်ပေးသွားမည်ဖြစ်ကြောင်း သိရသည်။

"လေထုထဲမှာ ဘာတွေပါတယ်ပေါ့။ လေထုအရည်အသွေးစမ်းထားတဲ့ဟာပေါ့။ လေထုထဲမှာ ကာဗွန်ဒိုင်အောက်ဆိုဒ်တွေများတယ်။ ကာဗွန်မိုနောက်ဆိုဒ်တွေများတယ်။ အဲဒါတွေ သိရင်တော့ ကျွန်တော်တို့ဘာတွေလုပ်သင့်တယ် ဆိုတာဆုံးဖြတ်လို့ရတာပေါ့။ သူတို့ဆီက ရလဒ် ဘာရလဲ မေးကြည့်ရမှာပေါ့။ စမ်းသပ်တဲ့ဟာကိုတော့ သူတို့ဆီက အလွယ်တကူ ယူရုံပဲရှိတော့မယ်"ဟု တာချီလိတ်ခရိုင်ဆေးရုံအုပ်ကြီး ဒေါက်တာရွှေဝင်းက တာချီလိတ်သတင်းအေဂျင်စီသို့ မတ်လ(၁၃)ရက်နေ့တွင် ပြောသည်။

တာချီလိတ်မြို့တွင် လေထုအရည်အသွေးတိုင်းတာရေးအတွက် စက်ကိရိယာပစ္စည်းမရှိသကဲ့သို့ မည်သည့်ဌာနမှတာဝန်ယူဆောင်ရွက်တိုင်းတာမည်ကို မသိရှိရသဖြင့် ထိုင်းနိုင်ငံမှ လေထုအရည်အသွေးတိုင်းတာထားမှုရလဒ်များနှင့် ထိုင်းနိုင်ငံကျန်းမာရေးဌာနမှ ဆောင်ရွက်ထားရှိမှုများကို တောင်းခံလေ့လာသွားမည်ဖြစ်ကြောင်း သိရသည်။

မီးခိုးမြူများကြောင့် မျက်ခမ်းစပ်ရောဂါ၊ အာသီးရောင်ရောဂါ၊ အသက်ရှုလမ်းကြောင်းဆိုင်ရာ ရောဂါများဖြစ်ပွားတတ်ပြီး ယခုရက်ပိုင်းအတွင်း နှာခေါင်းသွေးလျှံသည့် လူနာများ၊ အသက်ရှုကြပ်ပြီး အာသီးရောင်သည့် လူနာများ ဆေးခန်းများသို့ လာရောက်မှုများရှိနေကြောင်းသိရသည်။

"အပြင်ဘာညာထွက်မယ်ဆိုလို့ရှိရင် နှာခေါင်းစည်းပေါ့။ နှာခေါင်းစည်းမှာမှ ရေလေးနည်းနည်းစွတ်ပြီးတော့ ထားရင်တော့ ပိုကောင်းတာပေါ့။ နှာခေါင်းစည်းလက်ဝယ် မရှိဘူးဆိုရင်လည်းရတယ်၊ ကိုယ့်လက်ကိုင်ပဝါဖြစ်ဖြစ် သန့်တဲ့ဟာကိုရေစွတ်အုပ်ပြီး အဲဒီလိုသုံးလို့ရတယ်။ ကလေးငယ်တွေ သက်ကြီးရွယ်အိုတွေက အိမ်ထဲမှာနေရင် အသင့်တော်ဆုံးဖြစ်လိမ့်မယ်။ နောက်ပြီး ပန်းနာရင်ကြပ်ရှိတဲ့သူ၊ နှလုံးရောဂါရှိတဲ့သူတွေ အိမ်ထဲမှာနေရင် အသင့်တော်ဆုံးဖြစ်လိမ့်မယ်"ဟု အထွေထွေရောဂါကုဆရာဝန် ဒေါက်တာပြည့်မြင့်မြတ်က တာချီလိတ်သတင်းအေဂျင်စီသို့ ပြောသည်။

တာင်ယာမီးရှိုမှုများကြောင့် တာချီလိတ်မြို့တွင်နှစ်စဉ် မတ်လအတွင်း မီးခိုးမြူများနှင့် ပြာမှုန်များမြို့တွင်း လမ်းမများထက်တွင် နေ့စဉ်ကျရောက်တတ်သလို လေယာဉ်များဆင်းသက်ရန်လည်း အခက်အခဲများဖြစ်ပေါ်တတ်လေ့ရှိကြောင်းနှင့် တာချီလိတ်မြို့တွင် စက်ရုံများနည်းပါးကာ မော်တော်ယာဉ်များလည်းနည်းပါးသဖြင့် မီးခိုးထွက်ရှိမှုနည်းပါးနပြေီး လက်ရှိပြဿနာများပြေလည်စေရန်မှာ တောင်ယာမီးရှိုမှုများ ထိန်းချုပ်ရန်လိုအပ်ကြောင်း၎င်းကဆိုသည်။

မြန်မာ - ထိုင်းနယ်စပ်တစ်လျှောက် တောမီးများကြောင့် မီးခိုးပြာမှုန့်များဖုံးလွှမ်းမှုဖြစ်စဉ်သည် ယခုနှစ်မှစတင်ခြင်း မဟုတ်ပဲ ပြီးခဲ့သည့် ၂၀၁၄ ခုနှစ် မတ်လ(၂၀)ရက်နေ့က တောမီးခိုးတွေကြောင့် တာချီလိတ်လေဆိပ်မှတဆင့် ပြေးဆွဲနေသည့် လေယာဉ်ခရီးစဉ်များ အချိန်ပြောင်းလဲပြေးဆွဲခြင်း၊ ခရီးစဉ်ဖျက်သိမ်းခဲ့ခြင်းများဖြစ်ခဲ့သည့်အထိ ဖြစ်ပွားခဲ့ဖူးကြောင်း သိရသည်။

သတင်း - ဟန်စိုးထိုက်
ဓာတ်ပုံ - ကျော်ဇင်ဟိန်း