~~~~~~~~⊰❂ Unicode Version ❂⊱~~~~~~~~

လူမှုကွန်ယက်စာမျက်နှာများ နှောင့်ယှက်ခံရမှု ဖြေရှင်းပြီးသွားပြီး  DDoS တိုက်ခိုက်ခံရမှုမဟုတ်ဟုဆို
*************
လူမှုကွန်ယက်စာမျက်နှာများကို ကမ္ဘာတစ်လွှားအသုံးပြုသူများ အခက်အခဲဖြစ်ခဲ့ရပြီးနောက် ယင်းပြဿနာကို ဖြေရှင်းလိုက်နိုင်ပြီဖြစ်ပြီး DDoS တိုက်ခိုက်ခံရမှုမဟုတ်ကြောင်း Facebook က ထုတ်ပြန်လာသည်။

Facebook ကုမ္ပဏီက ပိုင်ဆိုင်သည့် လူမှုကွန်ယက် Application များတွင် အကောင့်ဝင်မရတော့ခြင်း၊ ပုံတင်မရခြင်း၊ စာသားများ ပြန်လည်မျှဝေ၍ မရခြင်းစသည့် မတူညီသည့်ပြဿနာများကို အသုံးပြုသူများကြုံတွေ့ခဲ့ကြရခြင်းဖြစ်ပြီး လက်ရှိတွင် Facebook မှ ယင်းပြဿနာများကို ဖြေရှင်းပြီး ဖြစ်သော်လည်း Instgram နှင့် Whatsapp များကို ဖြေရှင်းနေဆဲဖြစ်ကြောင်း သိရသည်။

အဆိုပါ လူမှုကွန်ယက် application များတွင် အသုံးပြုမရဖြစ်နေသည့် ပြဿနာများကို ကမ္ဘာတစ်လွှားမှ အသုံးပြုသူများက Twitter တွင် ရေးသားဖေါ်ပြခဲ့ကြပြီး facebook ကလည်း  Twitter မှနေ၍ အဆိုပါပြဿနာများကို ဖြေရှင်းနေကြောင်း ရေးသားဖေါ်ပြခဲ့ခြင်းဖြစ်သည်။

အမေရိကန်ပြည်ထောင်စု၊ ဥရောပနှင့် တောင်အမေရိကဒေသတစ်လျှောက်တွင် Facebook၊ Instgram နှင့် Messenger အကောင့်များ ယာယီအသုံးပြုမရတော့ဘဲဖြစ်သွားကာ WhatsApp မှာ အခြား Application များကဲ့သို့ ဆိုးဝါးစွာထိခိုက်မှုမဖြစ်ခဲ့ကြောင်း သိရသည်။

အမြန်ဆုံးဖြေရှင်းနိုင်ဖို့ ကြိုးစားလုပ်ဆောင်နေကြပါတယ်။ ဒါပေမဲ့ ဒါက DDoS တိုက်ခိုက်ခံရမှုနဲ့တော့ မဆိုင်ပါဘူး ဟု Facebook က ရေးသားခဲ့ခြင်းဖြစ်သည်။

Tachileik News Agency
Ref: Daily Mail