~~~~~~~~⊰❂ Unicode Version ❂⊱~~~~~~~~

တာချီလိတ်လေထုအရည်အသွေးကျဆင်းနေသဖြင့် အသက်ရှုလမ်းကြောင်းဆိုင်ရာရောဂါများ သတိထားရန် အသိပေးနှိုးဆော်ထား
***********
ရှမ်းပြည်နယ်အရှေ့ပိုင်း၊ တာချီလိတ်မြို့၏ လေထုအရည်အသွေးတိုင်းတာသည့် ပထမနေ့ဖြစ်သည့် ၂၀၁၉ ခုနှစ်၊ မတ်လ(၁၆)ရက်နေ့ ရလဒ်အရ လေထုအရည်အသွေးအညွှန်းကိန်း (၃၀၂)ရှိနေသဖြင့် လူထုအနေဖြင့် နှာခေါင်းစည်းများတပ်ဆင်ခြင်းအပါအဝင် အသက်ရှုလမ်းကြောင်းဆိုင်ရာရောဂါများကို သတိထားကြရန် မြို့နယ်စီမံခန့်ခွဲရေးကော်မတီက သတင်းထုတ်ပြန်ထားသည်။

တာချီလိတ်မြို့တွင် မတ်လ (၁၅)ရက်နေ့ ညနေ (၃)နာရီ (၁၆)မိနစ်မှ မတ်လ (၁၆) ရက်နေ့ ညနေ (၃)နာရီ (၁၆)မိနစ်အတွင်း တိုင်းတာမှုအရ လေထုအတွင်း အမှုန်ပါဝင်မှုအလွန်များပြားနေသည်ကို တွေ့ရကာ အန္တရာယ်ဖြစ်စေနိုင်သည့် ဓါတုပစ္စည်းပါဝင်မှုနည်းပါးပြီး အောက်ဆီဂျင်ပါဝင်မှုနှုန်း မြင့်မားနေဆဲဖြစ်သည်ဟု သတင်းထုတ်ပြန်ထားခြင်းဖြစ်သည်။

လေထုအတွင်း အမှုန်ပါဝင်မှုများနေသဖြင့် ကလေးများ၊ သက်ကြီးရွယ်အိုများ၊ အသက်ရှုလမ်းကြောင်းဆိုင်ရာ ရောဂါရှိသူများအနေဖြင့် တတ်နိုင်သမျှ နေအိမ်အတွင်း နေထိုင်ကြရန်၊ အပြင်ထွက်ပါက နှာခေါင်းစည်းများ တပ်ဆင်ကြရန်၊ မျက်စိစပ်ခြင်းဖြစ်ပေါ်ပါက လက်ဖြင့်ပွတ်သပ်ခြင်းမပြုဘဲ သန့်ရှင်းသော ရေစိုဝတ်ဖြင့် သုတ်ခြင်း၊ ရေသန့်ဖြင့်ဆေးကြောခြင်းများ ပြုလုပ်ကြရန် အသိပေးနှိုးဆော်ထားခြင်းဖြစ်သည်။

ကျန်းမာရေးအပေါ် သက်ရောက်မှုရှိသည့် လေထုအရည်အသွေးတိုင်းတာရာတွင် လေထုအတွင်း အိုဇုန်းမော်လီကျူး၊ အမှုန်ပါဝင်မှု၊ ကာဗွန်မိုနောဆိုဒ်နှင့် ဆာလဖာဒိုင်အောက်ဆိုဒ်တို့ ပါဝင်မှုနှုန်းကို တိုင်းတာသတ်မှတ်ခြင်းဖြစ်ပြီး (ဝ) မှ (၅၀)အထိမှာ ကောင်းမွန်သည့်အနေအထား၊ (၅၁)မှ (၁၀၀)အထိမှာ အတန်အသင့်ကောင်းမွန်သည့်အနေအထား၊ (၁၀၁)မှ (၁၅၀)အထိမှာ ဓါတ်မတည့်မှုဖြစ်ပွားလွယ်သူများအတွက် ထိခိုက်စေနိုင်သည့်အနေအထား၊ (၁၅၁)မှ (၂၀၀)အထိမှာ ကျန်းမာရေး ထိခိုက်စေသည့်အနေအထား၊ (၂၀၁)မှ (၃၀၀)အထိ ကျန်းမာရေးကို အလွန်ထိခိုက်စေသည့်အနေအထားနှင့် (၃၀၁)မှ (၅၀၀)အထိကို အန္တရာယ်ဖြစ်စေသည့်အနေအထားအဖြစ်  စံနှုန်းသတ်မှတ်ထားခြင်းဖြစ်သည်။

လက်ရှိတွင် တာချီလိတ်မြို့၌ဖြစ်ပေါ်နေသည့် လေထုအရည်အသွေးကျဆင်းမှုနှင့်ပတ်သက်၍ ကျန်းမာရေးဝန်ကြီးဌာနအနေဖြင့် လိုအပ်သည့်ဆောင်ရွက်ချက်များ လုပ်ဆောင်ပေးနိုင်ရန် တင်ပြထားကြောင်း တာချီလိတ်ခရိုင်ပြည်သူ့ဆေးရုံမှ လက်ထောက်ဆရာဝန် ဒေါက်တာ ဟန်လင်းစိုးထံမှ သိရသည်။

လက်ရှိတွင် ကျန်းမာရေးဌာနအနေဖြင့် သက်ဆိုင်ရာဌာနအသီးသီးပါဝင်သည့် မြို့နယ်စီမံခန့်ခွဲရေး ကော်မတီနှင့်အတူပူးပေါင်း၍ လူထုအားကျန်းမာရေးအသိပေးခြင်း၊ နှာခေါင်းစည်းများ အခမဲ့ဝေငှခြင်း၊ မီးခိုးမြူများလျော့ကျရန်အတွက် မီးသတ်ယာဉ်များဖြင့် မြို့တွင်း ရေမှုန်ရေမွှားများဖျန်းပေးခြင်းတို့ လုပ်ဆောင်နေကြောင်း သိရသည်။

တာချီလိတ်မြို့၏ လေထုအရည်အသွေးတိုင်းတာခြင်းကို ဆက်လက်လုပ်ဆောင်နေပြီး မတ်လ (၁၇)ရက်နေ့ ညနေ (၃)နာရီ (၁၆)မိနစ်အထိ တိုင်းတာမှုအခြေအနေများကိုလည်း မြို့နယ်စီမံခန့်ခွဲရေးကော်မတီမှ ထပ်မံထုတ်ပြန်ပေးသွားမည်ဖြစ်ကြောင်း သိရသည်။

Tachileik News Agency