~~~~~~~~⊰❂ Unicode Version ❂⊱~~~~~~~~

တာချီလိတ်လေထုအရည်အသွေးအညွှန်းကိန်းကျလာသော်လည်း ကျန်းမာရေးသတိထားရန်လိုအပ်နေဆဲ
***********
ရှမ်းပြည်နယ်အရှေ့ပိုင်း၊ တာချီလိတ်မြို့တွင် ၂၀၁၉ ခုနှစ်၊ မတ်လ(၁၇)ရက်နေ့ ညနေ (၃)နာရီ (၁၆)မိနစ်အထိ တိုင်းတာမှုရလဒ်အရ လေထုအရည်အသွေး အညွှန်းကိန်း (၂၇၆)ရှိသဖြင့် ကျန်းမာရေးအတွက် စိုးရိမ်ရသည့် အခြေအနေတွင် ရှိနေဆဲဖြစ်ကြောင်း သိရသည်။

လေထုအရည်အသွေးအညွှန်းကိန်း (၁၀၀) အထိကို သန့်စင်သည့်လေထုအဖြစ်သတ်မှတ်ထားခြင်းဖြစ်ပြီး လက်ရှိတွင် အညွှန်းကိန်း (၂၇၆)အထိရှိနေပြီး လေထုအတွင်း အမှုန်ပါဝင်မှုမြင့်နေကာ ဆာလဖာဒိုင်အောက်ဆိုဒ် ပါဝင်မှု အတန်အသင့်များနေဆဲဖြစ်သဖြင့် ကလေးများ၊ သက်ကြီးရွယ်အိုများ၊ အသက်ရှုလမ်းကြောင်းဆိုင်ရာ ရောဂါရှိသူများအနေဖြင့် တတ်နိုင်သမျှ နေအိမ်အတွင်း နေထိုင်ကြရန်၊ အပြင်ထွက်ပါက နှာခေါင်းစည်းများ တပ်ဆင်ကြရန်၊ မျက်စိစပ်ခြင်းဖြစ်ပေါ်ပါက လက်ဖြင့်ပွတ်သပ်ခြင်းမပြုဘဲ သန့်ရှင်းသော ရေစိုဝတ်ဖြင့် သုတ်ခြင်း၊ ရေသန့်ဖြင့်ဆေးကြောခြင်းများ ပြုလုပ်ကြရန် ကျန်းမာရေးဌာနက အကြံပြုထားသည်။

ကျန်းမာရေးအပေါ် သက်ရောက်မှုရှိသည့် လေထုအရည်အသွေးတိုင်းတာရာတွင် လေထုအတွင်း အိုဇုန်းမော်လီကျူး၊ အမှုန်ပါဝင်မှု၊ ကာဗွန်မိုနောဆိုဒ်နှင့် ဆာလဖာဒိုင်အောက်ဆိုဒ်တို့ ပါဝင်မှုနှုန်းကို တိုင်းတာသတ်မှတ်ခြင်းဖြစ်ပြီး (ဝ) မှ (၅၀)အထိမှာ ကောင်းမွန်သည့်အနေအထား၊ (၅၁)မှ (၁၀၀)အထိမှာ အတန်အသင့်ကောင်းမွန်သည့်အနေအထား၊ (၁၀၁)မှ (၁၅၀)အထိမှာ ဓါတ်မတည့်မှုဖြစ်ပွားလွယ်သူများအတွက် ထိခိုက်စေနိုင်သည့်အနေအထား၊ (၁၅၁)မှ (၂၀၀)အထိမှာ ကျန်းမာရေး ထိခိုက်စေသည့်အနေအထား၊ (၂၀၁)မှ (၃၀၀)အထိ ကျန်းမာရေးကို အလွန်ထိခိုက်စေသည့်အနေအထားနှင့် (၃၀၁)မှ (၅၀၀)အထိကို အန္တရာယ်ဖြစ်စေသည့်အနေအထားအဖြစ် အမေရိကန်ပြည်ထောင်စု သဘာဝပတ်ဝန်းကျင်ထိန်းသိမ်းရေးအေဂျင်စီက စံနှုန်းသတ်မှတ်ထားခြင်းဖြစ်သည်။

မြန်မာနှင့်ထိုင်း နှစ်နိုင်ငံလုံးတွင် စိုက်ပျိုးရာသီအတွက် တောင်ယာမီးရှို့ခြင်း၊ စိုက်ပျိုးမြေများ မီးရှို့ခြင်းများကြောင့် ကာလရှည်ကြာမီးခိုးမြူဖုံးလွှမ်းမှုကြောင့် လေထုအရည်အသွေးကျဆင်းသည့်ဒဏ်ကို ခံစားနေကြရခြင်းဖြစ်ပြီး တာချီလိတ်မြို့တွင် မီးခိုးမြူလျှော့ချရေးအတွက် ကျန်းမာရေးဌာနအပါအဝင် သက်ဆိုင်ရာဌာနအသီးသီးပါဝင်သည့် ခရိုင်နှင့်မြို့နယ်စီမံခန့်ခွဲရေးကော်မတီက ဆောင်ရွက်နေခြင်းဖြစ်သည်။

မီးခိုးမြူဖုံးလွှမ်းခြင်းနှင့်ပတ်သက်၍ လူထုအားကျန်းမာရေးအသိပေးခြင်း၊ နှာခေါင်းစည်းများ အခမဲ့ဝေငှခြင်း၊ မီးခိုးမြူများလျော့ကျရန်အတွက် မီးသတ်ယာဉ်များဖြင့် မြို့တွင်း ရေမှုန်ရေမွှားများဖျန်းပေးခြင်းတို့ လုပ်ဆောင်နေသည့်အပြင် တောင်ကြီးမြို့ရှိ ပတ်ဝန်းကျင်ထိန်းသိမ်းရေးဌာနအကူအညီဖြင့် လေထုအရည်အသွေး တိုင်းတာခြင်းကို မတ်လ (၁၅)ရက်နေ့ ညနေမှစတင် တိုင်းတာနေခြင်းဖြစ်သည်။

Tachileik News Agency
ဓါတ်ပုံ #ကျော်ဇင်ဟိန်း