~~~~~~~~⊰❂ Unicode Version ❂⊱~~~~~~~~

တရုတ်ရဲတပ်ဖွဲ့တွင် မျိုးဗီဇဖြင့်ကိုယ်ပွားဖန်တီးထားသည့် အနံ့ခံခွေး စတင်အသုံးပြုရန် လေ့ကျင့်နေ
*************
တရုတ်ရဲတပ်ဖွဲ့မှ အတော်ဆုံးအနံ့ခံခွေး၏မျိုးရိုးဗီဇကိုအသုံးပြု၍ ကိုယ်ပွားဖန်တီးထားသည့်ခွေးကို စတင်လေ့ကျင့်ပေးနေပြီဖြစ်ကြောင်း သိရသည်။

မျိုးဗီဇကိုယ်ပွားဖန်တီးသည့်ခွေးတစ်ကောင်ကို တရုတ်ရဲတပ်ဖွဲ့အနေဖြင့် ပထမဆုံး စတင်အသုံးပြုလိုက်ခြင်းဖြစ်ပြီး နှစ်လသားအရွယ်ခွေးမလေးအား ယူနန်ပြည်နယ်ရှိ၊ ကူမင်းရဲတပ်ဖွဲ့မှ ခွေးလေ့ကျင့်ရေးစခန်းတွင် စတင်လေ့ကျင့်ပေးနေခြင်းဖြစ်ကြောင်း သိရသည်။

အဆိုပါ ခွေးအားဖန်တီးလိုက်သည့် သုတေသနလုပ်ငန်းကို ဆောင်ရွက်သည့် ယူနန်စိုက်ပျိုးရေးတက္ကသိုလ်နှင့် Sinogene သည် အိမ်မွေးတိရစ္ဆာန်များအား ပုံတူမျိုးပွားဖန်တီးပြီး ဈေးကွက်တွင်ရောင်းချနိုင်ရန် လုပ်ဆောင်နေခြင်းဖြစ်ပြီး ၎င်းတို့ဖန်တီးပေးထားသည့်ရဲခွေးသည် လူများနှင့်ရင်းနှီးလွယ်ပြီး သတိကောင်းမွန်ကာ ကြောက်လန့်မှုမရှိ၊ အနံ့ခံအလွန်ကောင်းသည်ဟု ဆိုသည်။

တရုတ်ရဲတပ်ဖွဲ့မှ ဆုတံဆိပ်ရခွေး၏မျိုးဗီဇကိုရယူကာ ဓါတ်ခွဲခန်းတွင် သန္ဓေလောင်းဖန်တီးပြီးနောက် အထူးရွေးချယ်ထားသည့် ဘီးဂဲလ်စ်တစ်ကောင်ကို ကိုယ်ဝန်ဆောင်မွေးဖွားစေခြင်းဖြစ်ကြောင်း သိရသည်။

အဆိုပါဓါတ်ခွဲခန်းအနေဖြင့် မျိုးဗီဇပွားယူခြင်းအတွက် ဘီးဂဲလ်စ်များကို အသုံးပြုလေ့ရှိပြီး ဘီးဂဲလ်စ်တစ်ကောင်မှ မျိုးဗီဇပွားယူဖန်တီးတိုင်း ဘတ်(၁.၈)မီလီယံခန့် အသုံးပြုရလေ့ရှိကြောင်း သိရသည်။

တရုတ်ရဲတပ်ဖွဲ့အတွက် ရဲခွေးများ ဗီဇမျိုးပွားပုံတူဖန်တီးခြင်းကို စမ်းသပ်နေဆဲဖြစ်ပြီး လာမည့် (၁၀)နှစ်တာကာလအတွင်း ကျယ်ကျယ်ပြန့်ပြန့်အသုံးပြုဖွယ်ရှိသည်ဟု ဆိုထားသည်။

ရဲတပ်ဖွဲ့တွင် ဗီဇမျိုးပွားခွေးဖန်တီးအသုံးပြုခြင်းကို တောင်ကိုရီးယားနိုင်ငံက ၂၀၀၇ ခုနှစ်တွင် ပထမဆုံး စတင်အသုံးပြုခဲ့ခြင်းဖြစ်သည်။

တိရိစ္ဆာန်များကို ဈေးကွက်တင်ရောင်းချရန်နှင့် သုတေသနစမ်းသပ်မှုများတွင်အသုံးပြုရန် ပုံတူမျိုးပွားဖန်တီးခြင်းကို တရုတ်နိုင်ငံအနေဖြင့် တိုး၍လုပ်ဆောင်လာနေပြီး မကြာသေးမီအချိန်ကလည်း စိတ်ကျန်းမာရေးချို့တဲ့သူများအတွက် ထုတ်လုပ်မည့်ဆေးစမ်းသပ်ရန် ဗီဇမျိုးပွားမျောက် (၅)ကောင်ကို ဖန်တီးထားခြင်းဖြစ်သည်။

Tachileik News Agency
Ref: Bangkok Post